ಪಾಕ್‌ ಸರಕಾರ-ಸೇನೆ ನಡುವೆ ಹೊಸ ಬಿಕ್ಕಟ್ಟು

ಇಸ್ಲಾಮಾಬಾದ್‌: ಪಾಕಿಸ್ಥಾನದಲ್ಲಿ ಬಲಿಷ್ಠ ಸೇನೆ ಮತ್ತು ಸರಕಾರದ ನಡುವೆ ಹೊಸದಾಗಿ ತಿಕ್ಕಾಟ ಶುರುವಾಗಿದೆ. ಭದ್ರತಾ ಮಾಹಿತಿ ಸೋರಿಕೆ ಪ್ರಕರಣ ಸಂಬಂಧ ಪ್ರಧಾನಿ ನವಾಜ್‌ ಷರೀಫ್ ಅವರು ವಿದೇಶಾಂಗ ವ್ಯವಹಾರಗಳ ವಿಶೇಷ ಸಹಾಯಕ ತರೀಕ್‌ ಫ‌ತೇಮಿ ಅವರನ್ನು ಹುದ್ದೆಯಿಂದ ವಜಾ ಮಾಡಿದ್ದಾರೆ. ಆದರೆ, ಇದಾದ ಕೆಲವೇ ಗಂಟೆಗಳಲ್ಲಿ ಪ್ರಧಾನಿಯ ಆದೇಶವನ್ನೇ ತಿರಸ್ಕರಿಸಿರುವ ಸೇನೆ, ಫ‌ತೇಮಿ ವಜಾ ಆದೇಶಕ್ಕೆ ತಡೆಯೊಡ್ಡಿದೆ.

ಉನ್ನತ ಮಟ್ಟದ ಭದ್ರತಾ ಸಭೆಯಲ್ಲಿನ ಮಾಹಿತಿಯನ್ನು “ಡಾನ್‌’ ಪತ್ರಿಕೆಗೆ ಸೋರಿಕೆ ಮಾಡಿದ್ದ ಪ್ರಕರಣದಲ್ಲಿ ಅವರು ತಪ್ಪಿತಸ್ಥರು ಎಂದು ತನಿಖಾ ಸಮಿತಿ ವರದಿ ನೀಡಿದ ಹಿನ್ನೆಲೆಯಲ್ಲಿ ಷರೀಫ್ ವಜಾ ಆದೇಶ ಹೊರಡಿಸಿದ್ದರು. ಆದರೆ ಇದಾದ ಬಳಿಕ ಸೇನೆಯು, “ಷರೀಫ್ ನಿರ್ದೇಶನ ಅಪೂರ್ಣವಾಗಿದೆ. ಅದು ತನಿಖಾ ಮಂಡಳಿಯ ಶಿಫಾರಸಿಗೆ ಅನುಗುಣವಾಗಿಲ್ಲ. ಹಾಗಾಗಿ, ಆದೇಶವನ್ನು ತಿರಸ್ಕರಿಸುತ್ತಿದ್ದೇವೆ’ ಎಂದು ಟ್ವೀಟ್‌ ಮಾಡಿದೆ. ಇದರಿಂದ ಕೆಂಡಾಮಂಡ ಲವಾದ ಸಚಿವ ನಿಸಾರ್‌ ಅಲಿ ಖಾನ್‌, “ಟ್ವಿಟರ್‌ ಮೂಲಕ ಪ್ರತಿಕ್ರಿಯಿಸುವುದು ದೇಶಕ್ಕೆ ಅಪಾಯ’ ಎಂದಿದ್ದಾರೆ.