ದೆಹಲಿ: ಈಗಿನ ಕಾಲದಲ್ಲಿ ಪ್ರೀತಿ ಮೂಡಲು ಮುಖತಃ ಭೇಟಿ ಆಗಬೇಕಿಲ್ಲ. ಮೊಬೈಲ್‌ ನಲ್ಲಿ ಒಂದು ಮೆಸೇಜ್‌, ಚಾಟಿಂಗ್‌ ಮಾಡಿದರೂ ಅದು ಸ್ನೇಹವಾಗಿ ಪ್ರೀತಿಯ ಬಂಧಕ್ಕೆ ತಿರುಗಬಹುದು.! ಈ ಮಾತಿಗೆ ಉದಾಹರಣೆಯಾಗಿದೆ ಗ್ರೇಟರ್‌ ನೋಯ್ಡಾದಲ್ಲಿ ನಡೆದ ಒಂದು ಘಟನೆ.
ಗ್ರೇಟರ್‌ ನೋಯ್ಡಾ ಮೂಲದ ನಿವಾಸಿಯಾಗಿರುವ ಸಚಿನ್‌ ಜನಪ್ರಿಯ ಮೊಬೈಲ್‌ ಗೇಮ್‌ ಪಬ್‌ ಜೀ ಆಡುತ್ತಾ ಆಡುತ್ತಾ ಅದರ ಮೂಲಕವೇ ಒಬ್ಬ ಮಹಿಳೆಗೆ ಮೆಸೇಜ್‌ ಮಾಡಿ ಆಕೆಯನ್ನೇ ಪ್ರೀತಿಸಲು ತೊಡಗಿದ್ದಾರೆ. ಆ ಮಹಿಳೆಗೆ ಈಗಾಗಲೇ ನಾಲ್ಕು ಮಕ್ಕಳಿದ್ದು, ಆಕೆ ಪಾಕಿಸ್ತಾನ ಮೂಲದವಳು ಆಗಿದ್ದಾಳೆ ಎನ್ನುವುದು ಅರಿತುಕೊಂಡಿದ್ದರೂ ಆಕೆಯೊಂದಿಗೆ ನಿರಂತರವಾಗಿ ಚಾಟಿಂಗ್‌ ಮಾಡತೊಡಗಿದ್ದಾರೆ.
ಹಲವು ಸಮಯದಿಂದ ಪಬ್‌ ಜೀ ಗೇಮ್‌ ಆಡುತ್ತಾ ಮೆಸೇಜ್‌ ಮಾಡಿದ ಸಚಿನ್‌ ಗೆ ಪಾಕ್‌ ಮೂಲದ ನಾಲ್ಕು ಮಕ್ಕಳ ತಾಯಿ ಸೀಮಾ ಗುಲಾಮ್ ಹೈದರ್ ಯೊಂದಿಗೆ ಪ್ರೇಮಾಂಕುರ ಆಗಿದೆ. ಅತ್ತ ಕಡೆಯಿಂದ ಸೀಮಾ ಕೂಡ ಸಚಿನ್‌ ನನ್ನು ಪ್ರೀತಿಸ ತೊಡಗಿದ್ದಾರೆ. ಇದಾದ ಬಳಿಕ ಸೀಮಾ ತನ್ನ ನಾಲ್ಕು ಮಕ್ಕಳೊಂದಿಗೆ ಅಕ್ರಮವಾಗಿ ನೇಪಾಳದ ಮೂಲಕ ಭಾರತಕ್ಕೆ ಬಂದು ಸಚಿನ್‌ ಇರುವ ಗ್ರೇಟರ್‌ ನೋಯ್ಡಾಕ್ಕೆ ಬಂದಿದ್ದಾರೆ.
ಸಚಿನ್‌ ಹಾಗೂ ಸೀಮಾ ಗ್ರೇಟರ್‌ ನೋಯ್ಡಾದ ರಬುಪುರ ಪ್ರದೇಶದ ಒಂದು ಅಪಾರ್ಟ್‌ ಮೆಂಟ್‌ ನಲ್ಲಿ ಬಾಡಿಗೆ ನಿವಾಸಿಯಾಗಿ ವಾಸಿಸಲು ಶುರು ಮಾಡಿದ್ದಾರೆ.
ಪೊಲೀಸರು ಪಾಕಿಸ್ತಾನದ ಮಹಿಳೆಯೊಬ್ಬಳು ಅಕ್ರಮವಾಗಿ ನೋಯ್ಡಾದಲ್ಲಿ ನೆಲೆಸಿದ್ದಾಳೆ ಎನ್ನುವ ಮಾಹಿತಿಯನ್ನು ಪಡೆದು ಹುಡುಕಾಟ ನಡೆಸಿದ್ದಾರೆ. ಈ ವೇಳೆ ಸಚಿನ್‌ – ಸೀಮಾ ಹಾಗೂ ಅವರ ಮಕ್ಕಳನ್ನು ಹಿಡಿದುಕೊಂಡು ನೋಯ್ಡಾದಿಂದ ಪರಾರಿಯಾಗಿದ್ದಾರೆ.
ಈ ಬಗ್ಗೆ ಪೊಲೀಸರು ಅಪಾರ್ಟ್‌ ಮೆಂಟ್‌ ನ ಮಾಲೀಕ ಬ್ರಿಜೇಶ್, ಬಳಿ ಪ್ರಶ್ನಿಸಿದ್ದಾರೆ. “ಮೇ ತಿಂಗಳಿನಿಂದ ಅವರು ಬಾಡಿಗೆ ಮನೆಯಲ್ಲಿದ್ದಾರೆ. ಕೋರ್ಟಿನಲ್ಲಿ ಮದುವೆಯಾಗಿದ್ದೇವೆ ತಮಗೆ ನಾಲ್ವರು ಮಕ್ಕಳಿದ್ದಾರೆ ಎಂದಿದ್ದರು. ಮಹಿಳೆ ಪಾಕಿಸ್ತಾನದವರಂತೆ ತೋರುತ್ತಿಲ್ಲ, ಅವರು ಸಲ್ವಾರ್ ಸೂಟ್ ಮತ್ತು ಸೀರೆಗಳನ್ನು ಧರಿಸಿದ್ದರು” ಎಂದು ಪೊಲೀಸರಿಗೆ ತಿಳಿಸಿದ್ದಾರೆ.
ಸದ್ಯ ಪೊಲೀಸರು ಸಚಿನ್‌ ಹಾಗೂ ಸೀಮಾರನ್ನು ಬಂಧಿಸಿ, ಹೆಚ್ಚಿನ ವಿಚಾರಣೆಯನ್ನು ನಡೆಸುತ್ತಿದ್ದಾರೆ ಎಂದು ವರದಿ ತಿಳಿಸಿದೆ.
