ಐಎಎಫ್ ವಾಯು ದಾಳಿಗೆ 250ಕ್ಕೂ ಹೆಚ್ಚು ಜೈಶ್‌ ಉಗ್ರರು ಬಲಿ: ಅಮಿತ್‌ ಶಾ

ಅಹ್ಮದಾಬಾದ್‌ : ಭಾರತೀಯ ವಾಯು ಪಡೆ ಕಳೆದ ಫೆ.27ರ ನಸುಕಿನ ವೇಳೆ ಪಾಕಿಸ್ಥಾನದ ಖೈಬರ್‌ ಫ‌ಖ್‌ತೂನ್‌ಖ್ವಾ ಪ್ರಾಂತ್ಯದ ಬಾಲಾಕೋಟ್‌ ನಲ್ಲಿನ ಜೈಶ್‌ ಉಗ್ರ ಶಿಬಿರದ ಮೇಲೆ ನಡೆಸಿದ ಬಾಂಬ್‌ ದಾಳಿಗೆ 250ಕ್ಕೂ ಹೆಚ್ಚು ಜೈಶ್‌ ಉಗ್ರರು ಬಲಿಯಾಗಿರುವುದಾಗಿ ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಇಂದು ಸೋಮವಾರ ಹೇಳಿದ್ದಾರೆ. 

‘ಭಾರತೀಯ ವಾಯು ಪಡೆ ನಡೆಸಿದ ಬಾಂಬ್‌ ದಾಳಿಯಲ್ಲಿ ಜೈಶ್‌ ಉಗ್ರರು ಸತ್ತಿದ್ದಾರೆಯೇ, ಸತ್ತಿದ್ದರೆ ಅವರ ಸಂಖ್ಯೆ ಎಷ್ಟು; ಅದಕ್ಕೆ ಸಾಕ್ಷ್ಯವೇನು’ ಎಂಬಿತ್ಯಾದಿ ಪ್ರಶ್ನೆಗಳನ್ನು ಕೇಳಿರುವ ವಿರೋಧ ಪಕ್ಷಗಳನ್ನು ಕಟುವಾಗಿ ಟೀಕಿಸಿದ ಅಮಿತ್‌ ಶಾ, ಐಎಎಫ್ ಬಾಂಬ್‌ ದಾಳಿಯಲ್ಲಿ 250ಕ್ಕೂ ಅಧಿಕ ಉಗ್ರರು ಸತ್ತಿರುವುದು ನಿಜ ಎಂದು ಹೇಳುವ ಮೂಲಕ ವಿಪಕ್ಷಗಳ ಬಾಯಿ ಮುಚ್ಚಿಸುವ ಯತ್ನ ಮಾಡಿದರು. 

ಎನ್‌ಡಿಎ ಸರಕಾರದ ಅವಧಿಯಲ್ಲಿ ಕಳೆದ ಐದು ವರ್ಷಗಲ್ಲಿ ಸೇನೆ ಉಗ್ರರ ಮೇಲೆ ಎರಡು ಪ್ರಮುಖ ದಾಳಿ ನಡೆಸಿದೆ ಎಂದು ಅಮಿತ್‌ ಶಾ ಅವರು ನಗರದಲ್ಲಿ ಏರ್ಪಡಿಸಲಾಗಿದ್ದ ‘Lakshya JITO’ ಕಾರ್ಯಕ್ರಮದಲ್ಲಿ ಮಾತನಾಡುತ್ತಾ ಹೇಳಿದರು. 

ಜೈಶ್‌ ಆತ್ಮಾಹುತಿ ಬಾಂಬ್‌ ದಾಳಿಕೋರ 40 ಸಿಆರ್‌ಪಿಎಫ್ ಯೋಧರನ್ನು ಬಲಿ ಪಡೆದ ಪುಲ್ವಾಮಾ ದಾಳಿಯ ಬಳಿಕ ಪ್ರತಿಯೊಬ್ಬರು ಈ ಬಾರಿ ಸರ್ಜಿಕಲ್‌ ದಾಳಿಯನ್ನು ನಡೆಸಲಾಗದು; ಈಗೇನಾಗುವುದು ಎಂಬ ತಳಮಳ ಹೊಂದಿದ್ದರು. ಆದರೆ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರಕಾರ ಪುಲ್ವಾಮಾ ದಾಳಿಯ 13ನೇ ದಿನ ವಾಯು ದಾಳಿ ನಡೆಸಿ, ನಮ್ಮ ಕಡೆಯಲ್ಲಿ ಯಾವುದೇ ಹಾನಿ ಉಂಟಾಗದಂತೆ,  250ಕ್ಕೂ ಹೆಚ್ಚು ಉಗ್ರರನ್ನು ಬಲಿಪಡೆಯಿತು ಎಂದು ಅಮಿತ್‌ ಶಾ ಹೇಳಿದರು.