ಒಲಿಂಪಿಕ್ಸ್‌  ಬಾಕ್ಸಿಂಗ್‌: ಭಾರತೀಯರ ತೂಕ ವಿಭಾಗ ಬದಲು

ಹೊಸದಿಲ್ಲಿ: ಅಂತಾರಾಷ್ಟ್ರೀಯ ಬಾಕ್ಸಿಂಗ್‌ ಸಂಸ್ಥೆ ಮುಂದಿನ ವರ್ಷದ ಒಲಿಂಪಿಕ್ಸ್‌ ನಲ್ಲಿ ಯಾವ್ಯಾವ ತೂಕ ವಿಭಾಗದಲ್ಲಿ ಸ್ಪರ್ಧೆಗಳು ಇರಲಿವೆ ಎನ್ನುವುದನ್ನು ಅಂತಿಮಗೊಳಿಸಿದೆ. ಪರಿಣಾಮ ಭಾರತದ ಖ್ಯಾತ ಬಾಕ್ಸರ್‌ಗಳಾದ ಅಮಿತ್‌ ಪಂಗಲ್‌, ಶಿವ ಥಾಪ, ಮನೀಷ್‌ ಕೌಶಿಕ್‌ ಈಗಿರುವ ತೂಕ ವಿಭಾಗಗಳನ್ನು ಬಿಟ್ಟು ಬೇರೆ ವಿಭಾಗಕ್ಕೆ ನೆಗೆಯಬೇಕಾಗಿದೆ.

ಪಂಗಲ್‌  52 ಕೆಜಿ ವಿಭಾಗ
49 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸುತ್ತಿದ್ದ ಏಶ್ಯನ್‌ ಗೇಮ್ಸ್‌ ಚಿನ್ನದ ಪದಕ ವಿಜೇತ ಅಮಿತ್‌ ಪಂಗಲ್‌ ಇನ್ನು 52 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಲಿದ್ದಾರೆ. 60 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸುತ್ತಿದ್ದ ಶಿವ ಥಾಪ, ಮನೀಶ್‌ ಕೌಶಿಕ್‌ 63 ಕೆಜಿ ವಿಭಾಗಕ್ಕೆ ಬದಲಾಯಿಸಿಕೊಳ್ಳಲಿದ್ದಾರೆ. ಈ ಬಗ್ಗೆ ಮೊದಲೇ ಸುಳಿವು ಲಭಿಸಿದ್ದರಿಂದ ಬದಲಾವಣೆಗೆ ಬಾಕ್ಸರ್‌ಗಳು ಸಿದ್ಧವಿದ್ದಾರೆ ಎಂದು “ಬಾಕ್ಸಿಂಗ್‌ ಇಂಡಿಯಾ’ ತಿಳಿಸಿದೆ. 

ಅಂತಿಮಗೊಂಡ ತೂಕ ವಿಭಾಗ
ಅಂತಾರಾಷ್ಟ್ರೀಯ ಬಾಕ್ಸಿಂಗ್‌ ಸಂಸ್ಥೆ ಪುರುಷರ ವಿಭಾಗದಲ್ಲಿ 52 ಕೆಜಿ, 57 ಕೆಜಿ, 63 ಕೆಜಿ, 69 ಕೆಜಿ, 75 ಕೆಜಿ, 81 ಕೆಜಿ, 91 ಕೆಜಿ, +91 ಕೆಜಿಯನ್ನು ಅಂತಿಮಗೊಳಿಸಿದೆ. ಮಹಿಳೆಯರ ವಿಭಾಗದಲ್ಲಿ 51 ಕೆಜಿ, 57 ಕೆಜಿ, 64 ಕೆಜಿ, 69 ಕೆಜಿ, 75 ಕೆಜಿಯನ್ನು ಅಂತಿಮಗೊಳಿಸಲಿದೆ. ಅಂದರೆ ಮುಂದಿನ ವರ್ಷದ ಒಲಿಂಪಿಕ್ಸ್‌ನಲ್ಲಿ ಈ ವಿಭಾಗದಲ್ಲಿ ಮಾತ್ರ ಸ್ಪರ್ಧೆಗಳು ನಡೆಯಲಿವೆ.