ಬಾಹುಬಲಿ 2 ವೀಕ್ಷಿಸಲು ಬಂದು ಪೊಲೀಸರಿಗೆ ಸಿಕ್ಕಿಬಿದ್ದ ನಟೋರಿಯಸ್ ಕಳ್ಳ

ಭುವನೇಶ್ವರ್:ಜಗತ್ತಿನಾದ್ಯಂತ ರಾಜಮೌಳಿ ನಿರ್ದೇಶನದ ಬಾಹುಬಲಿ 2 ಸಿನಿಮಾದ ಸುದ್ದಿಯೇ ಎಲ್ಲೆಡೆ ಹರಿದಾಡುತ್ತಿದೆ. ಬಾಹುಬಲಿ 2 ಸಿನಿಮಾ ಎಲ್ಲಾ ದಾಖಲೆಗಳನ್ನು ಮುರಿದಿರುವುದು ಒಂದೆಡೆಯಾದರೆ, ಮತ್ತೊಂದೆಡೆ ಬಾಹುಬಲಿ 2 ಸಿನಿಮಾ ನೋಡಲು ಬಂದು ನಟೋರಿಯಸ್ ಕಳ್ಳನೊಬ್ಬ ಪೊಲೀಸರ ಬಲೆಗೆ ಬಿದ್ದ ಸ್ವಾರಸ್ಯಕರ ಘಟನೆಯೊಂದು ಒಡಿಶಾದಲ್ಲಿ ನಡೆದಿದೆ.

ಈತ ನಟೋರಿಯಸ್ ಕಳ್ಳ, ಸುಮಾರು 50 ಎಟಿಎಂಗಳನ್ನು ದೋಚಿ ಪೊಲೀಸರ ಕಣ್ಣಿಗೆ ಮಣ್ಣೆರಚಿ ಕಳೆದ 7 ವರ್ಷಗಳಿಂದ ತಲೆಮರೆಸಿಕೊಂಡು ತಿರುಗಾಡುತ್ತಿದ್ದ.

ಅಂತೂ ಬಾಹುಬಲಿ 2 ಸಿನಿಮಾ ನೋಡಲು ಬಂದ ಮೋಸ್ಟ್ ವಾಂಟೆಡ್ ದರೋಡೆಕೋರನನ್ನು ಪೊಲೀಸರು ಚಿತ್ರಮಂದಿರದೊಳಗೆ ಬಂಧಿಸಿದ್ದಾರೆ. 

ಸಂಭವ್ ಆಚಾರ್ಯ ಎಂಬ ಎಟಿಎಂ ಕಳ್ಳನನ್ನು ಭುವನೇಶ್ವರದ ವಿಶೇಷ ಪೊಲೀಸ್ ತಂಡ ಬಂಧಿಸಿದೆ. ವರದಿಗಳ ಪ್ರಕಾರ, ಬಾಹುಬಲಿ 2 ಸಿನಿಮಾ ವೀಕ್ಷಿಸುತ್ತಿದ್ದ ಸಂಭವ್ ಇಂಟರ್ವಲ್ ಬಿಟ್ಟಾಗ ಹೊರಗೆ ಬಂದ ವೇಳೆ ಬಂಧಿಸಿದ್ದಾರೆ. ಈ ಸಂದರ್ಭದಲ್ಲಿ ಆತನ ಬಳಿ ಇದ್ದ ಕೆಲವು ಎಟಿಎಂ ಕಾರ್ಡ್ ಗಳನ್ನು ವಶಕ್ಕೆ ಪಡೆದಿದ್ದಾರೆ ಎಂದು ವರದಿ ತಿಳಿಸಿದೆ.

ಸಂಭವ್ ಆಚಾರ್ಯ ಸುಮಾರು 50 ಎಟಿಎಂಗಳಲ್ಲಿ ದರೋಡೆ ನಡೆಸಿದ್ದ, ಅಲ್ಲದೇ ಆತನ ವಿರುದ್ಧ ಭುವನೇಶ್ವರ್ ಹಾಗೂ ಕೆಲವು ಜಿಲ್ಲಾ ಠಾಣೆಗಳಲ್ಲಿ ದೂರುಗಳು ದಾಖಲಾಗಿವೆ.