ಉತ್ತರ ಕೊರಿಯಾ: ಸರ್ವಾಧಿಕಾರಿ ಕಿಮ್‌ ಮಗಳ ಹೆಸರು ಯಾರೂ ಇಡುವಂತಿಲ್ಲ!

ಪ್ಯಾಂಗ್ಯಾಂಗ್‌: ಉತ್ತರ ಕೊರಿಯಾ ಸರ್ವಾಧಿಕಾರಿ ಕಿಮ್‌ ಜಾಂಗ್‌ ಉನ್‌ನ ಆಡಳಿತದಲ್ಲಿ ದೇಶದ ಹೆಣ್ಣು ಮಕ್ಕಳಿಗಿರುವ ಕಟ್ಟುಪಾಡುಗಳು ಜಗತ್ತಿಗೆ ಗೊತ್ತಿಲ್ಲದ ವಿಚಾರವೇನಲ್ಲ.ಇದೀಗ ಆ ಕಟ್ಟುಪಾಡು ಹೆಸರಿಗೂ ಅನ್ವಯಿಸಲಿದ್ದು, ಇನ್ನು ಮುಂದೆ ತನ್ನ ಮಗಳ ಹೆಸರನ್ನು ದೇಶದ ಯಾವ ಹೆಣ್ಣುಮಕ್ಕಳು ಇಟ್ಟುಕೊಳ್ಳುವಂತಿಲ್ಲ ಎಂದು ಕಿಮ್‌ ಆದೇಶ ಹೊರಡಿಸಿದ್ದಾರಂತೆ.

ಹೌದು, ಇತ್ತೀಚೆಗಷ್ಟೇ ಮಿಲಿಟರಿ ಪರೇಡ್‌ನ‌ಲ್ಲಿ ಕಿಮ್‌ ಮಗಳು ಜು-ಎ ಮೊದಲ ಬಾರಿಗೆ ಮಾಧ್ಯಮಗಳ ಮುಂದೆ ಕಾಣಿಸಿಕೊಂಡಿದ್ದಳು.

ಇದರ ನಡುವೆ ದೇಶದ ರಕ್ಷಣಾ ಸಚಿವಾಲಯ ಪ್ರಕಟಣೆಯೊಂದನ್ನು ಹೊರಡಿಸಿದೆ. ಅದೇನಂದರೆ ಇನ್ನು ಮುಂದೆ ದೇಶದಲ್ಲಿ ಹುಟ್ಟಲಿರುವ ಯಾವ ಹೆಣ್ಣುಮಕ್ಕಳಿಗೂ ಕಿಮ್‌ ಪುತ್ರಿ ಜು-ಎ ಹೆಸರು ಇಡುವಂತಿಲ್ಲ. ಅಷ್ಟೇ ಅಲ್ಲ,ಈಗಾಗಲೇ ಈ ಹೆಸರಿನಲ್ಲಿ ಯಾರಾದರೂ ಹೆಣ್ಣು ಮಕ್ಕಳು, ಮಹಿಳೆಯರು ಇದ್ದರೆ ಅವರು ತಮ್ಮ ಹೆಸರನ್ನು ಬದಲಿಸಿಕೊಳ್ಳಬೇಕು. ಹೆಸರು ಬದಲಿಸಿಕೊಳ್ಳಲು 1 ವಾರದ ಗಡುವಷ್ಟೇ ನೀಡುವುದಾಗಿ ಸ್ಥಳೀಯ ಸಂಸ್ಥೆಗಳು ಕೂಡ ಸುತ್ತೋಲೆ ಹೊರಡಿಸಿವೆ ಎಂದು ಸ್ಥಳೀಯರು ಹೇಳಿದ್ದಾರೆ.