ಗಡಿಯಲ್ಲಿ ಬಾಲಬಿಚ್ಚಿದ್ರೆ ಹುಷಾರ್…ಭಾರತಕ್ಕೆ ಪಾಕ್ ವಾರ್ನಿಂಗ್!

ಇಸ್ಲಾಮಾಬಾದ್/ ಶ್ರೀನಗರ್: ಜಮ್ಮುವಿನ ಸಂಜ್ವಾನದಲ್ಲಿನ ಸೇನಾ ಶಿಬಿರದ ವಸತಿ ಕಟ್ಟೆದ ಮೇಲೆ ನಡೆದ ದಾಳಿಯ ಹಿಂದೆ ತನ್ನ ಕೈವಾಡ ಇಲ್ಲ ಎಂದು ಹೇಳಿದ್ದ ಪಾಕಿಸ್ತಾನ ಸೋಮವಾರ ಗಡಿಭಾಗದಿಂದ ದಾಳಿ ನಡೆಸಿದ್ರೆ ಹುಷಾರ್ ಎಂದು ಭಾರತಕ್ಕೆ ಎಚ್ಚರಿಕೆ ನೀಡಿದೆ.

ದಾಳಿ ನಡೆದಾಗಲೆಲ್ಲಾ ಭಾರತೀಯ ಅಧಿಕಾರಿಗಳು ಸಿದ್ಧ ನಮೂನೆಯ ಉತ್ತರ ನೀಡುವ ಮೂಲಕ ಬೇಜವಾಬ್ದಾರಿ ಹೇಳಿಕೆ ನೀಡುತ್ತಾರೆ. ಸೂಕ್ತವಾದ ತನಿಖೆ ಆರಂಭವಾಗುವ ಮೊದಲೇ ಆರೋಪಿಸುತ್ತಾರೆ ಎಂದು ಪಾಕಿಸ್ತಾನದ ವಿದೇಶಾಂಗ ಸಚಿವಾಲಯ ನೀಡಿರುವ ಪ್ರಕಟಣೆಯಲ್ಲಿ ತಿಳಿಸಿದೆ.

ಈ ನಿಟ್ಟಿನಲ್ಲಿ ಪಾಕಿಸ್ತಾನದ ವಿರುದ್ಧದ ಆಧಾರ ರಹಿತ ಹೇಳಿಕೆ ನೀಡುವುದನ್ನು ಅಂತಾರಾಷ್ಟ್ರೀಯ ಸಮುದಾಯ ಭಾರತಕ್ಕೆ ತಾಕೀತು ಮಾಡಲಿ ಎಂದು ಮನವಿ ಮಾಡಿಕೊಳ್ಳುತ್ತೇವೆ.

ಅಷ್ಟೇ ಅಲ್ಲ ಕಾಶ್ಮೀರದಲ್ಲಿ ನಡೆಯುವ ಮಾನವ ಹಕ್ಕುಗಳ ಉಲ್ಲಂಘನೆ ಹಾಗೂ ಗಡಿಭಾಗದಲ್ಲಿ ನಡೆಯುವ ಅಪ್ರಚೋದಿತ ದಾಳಿ ನಿಲ್ಲಲಿ ಎಂದು ಹೇಳಿದೆ. ಪದೇ, ಪದೇ ಕಾಲುಕೆರೆದು ಜಗಳಕ್ಕೆ ನಿಲ್ಲುವ ಚಾಳಿ ಹೊಂದಿರುವ ಪಾಕಿಸ್ತಾನ ಈಗಾಗಲೇ ಹಲವು ಬಾರಿ ಕಳ್ಳಾಟ ನಡೆಸುವ ಮೂಲಕ ಮುಖವಾಡ ಕಳಚಿಬಿದ್ದಿರುವುದನ್ನು ಇಲ್ಲಿ ನೆನಪಿಸಿಕೊಳ್ಳಬಹುದಾಗಿದೆ.