ನಿದಾ ದಾರ್‌ ಪಾಕ್‌ ನಾಯಕಿ: 18 ವರ್ಷದ ಆಯೇಷಾ ನಿವೃತ್ತಿ ಖಾತ್ರಿ

ಲಾಹೋರ್‌: ಪಾಕಿಸ್ಥಾನ ಕ್ರಿಕೆಟ್‌ನಲ್ಲಿ ಭಾರೀ ಸಂಚಲನ ಮೂಡಿ ಸಿದ 18 ವರ್ಷದ ಆಯೇಷಾ ನಸೀಮ್‌ ಅವರ ನಿವೃತ್ತಿಯನ್ನು ಪಿಸಿಬಿ ದೃಢ ಪಡಿಸಿದೆ. ಜತೆಗೆ ಮುಂಬರುವ ಏಷ್ಯಾಡ್‌ ಗಾಗಿ ತಂಡವನ್ನು ಅಂತಿಮ ಗೊಳಿಸಿದ್ದು, ನಿದಾ ದಾರ್‌ ಅವರನ್ನು ನೂತನ ನಾಯಕಿಯನ್ನಾಗಿ ನೇಮಿಸಿದೆ.

ಆಕ್ರಮಣಕಾರಿ ಬ್ಯಾಟರ್‌ ಆಯೇಷಾ ನಸೀಮ್‌ ರವಿವಾರ ಅಂತಾರಾಷ್ಟ್ರೀಯ ಕ್ರಿಕೆಟಿಗೆ ದಿಢೀರ್‌ ನಿವೃತ್ತಿ ಘೋಷಿಸಿದ ಸುದ್ದಿ ಹಬ್ಬಿತ್ತು. ಇದಕ್ಕೆ ಅವರು “ವೈಯಕ್ತಿಕ’ ಕಾರಣವನ್ನು ನೀಡಿದ್ದರು. ಆದರೆ ಇದು “ಧಾರ್ಮಿಕ’ ಕಾರಣದೊಂದಿಗೆ ತಳುಕು ಹಾಕಿತ್ತು. ಇದನ್ನು 48 ಗಂಟೆಗಳ ತನಕ ಕಾದು ನೋಡಲು ನಿರ್ಧರಿಸಿದ ಪಿಸಿಬಿ, ಮಂಗಳವಾರ ಇದನ್ನು ಅಧಿಕೃತವಾಗಿ ಪ್ರಕಟಿಸಿತು.

ಆಯೇಷಾ ನಸೀಮ್‌ 4 ಏಕದಿನ ಹಾಗೂ 30 ಟಿ20 ಅಂತಾರಾಷ್ಟ್ರೀಯ ಪಂದ್ಯ ಗಳಲ್ಲಿ ಪಾಕಿಸ್ಥಾನವನ್ನು ಪ್ರತಿ ನಿಧಿ ಸಿದ್ದರು. 2020 ಮತ್ತು 2023ರ ಐಸಿಸಿ ಟಿ20 ವಿಶ್ವಕಪ್‌ ಪಂದ್ಯಾವಳಿಯಲ್ಲೂ ಆಡಿದ್ದರು. ಟಿ20ಯಲ್ಲಿ 128.12ರಷ್ಟು ಉತ್ಕೃಷ್ಟ ಸ್ಟ್ರೈಕ್‌ರೇಟ್‌ ಇವರದಾಗಿತ್ತು.

ಏಷ್ಯಾಡ್‌ ತಂಡ: ನಿದಾ ದಾರ್‌ (ನಾಯಕಿ), ಅಲಿಯಾ ರಿಯಾಜ್‌, ಅನೋಷಾ ನಾಸಿರ್‌, ದಿಯಾನಾ ಬೇಗ್‌, ಫಾತಿಮಾ ಸನಾ, ಮುನೀಬಾ ಅಲಿ, ನಾಜಿಹಾ ಅಲ್ವಿ, ನಶ್ರಾ ಸಂಧು, ನತಾಲಿಯಾ ಪರ್ವೇಜ್‌, ಒಮೈಮಾ ಸೊಹೇಲ್‌, ಸದಾಫ್ ಶಮಾಸ್‌, ಶಾವಾಜ್‌ ಜುಲ್ಫಿಕರ್‌, ಸಿದ್ರಾ ಅಮೀನ್‌, ಸಯೇದಾ ಅರೂಬ್‌ ಶಾ, ಉಮ್‌ ಎ ಹನಿ.