ವನಿತಾ ವಿಶ್ವಕಪ್‌ ಕ್ರಿಕೆಟ್‌: ನ್ಯೂಜಿಲ್ಯಾಂಡಿಗೆ 9 ವಿಕೆಟ್‌ ಜಯ

ಡರ್ಬಿ: ಐಸಿಸಿ ವನಿತಾ ವಿಶ್ವಕಪ್‌ ಕ್ರಿಕೆಟ್‌ ಕೂಟದ ಶನಿವಾರದ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್‌ ತಂಡವು ಶ್ರೀಲಂಕಾ ತಂಡವನ್ನು 9 ವಿಕೆಟ್‌ಗಳಿಂದ ಭರ್ಜರಿಯಾಗಿ ಸೋಲಿಸಿದೆ.

ಮೊದಲು ಬ್ಯಾಟಿಂಗ್‌ ನಡೆಸಿದ ಶ್ರೀಲಂಕಾ ತಂಡವು ಹೋಲಿ ಹಡಲ್‌ಸ್ಟನ್‌ ಅವರ ದಾಳಿಗೆ ತತ್ತರಿಸಿ 9 ವಿಕೆಟಿಗೆ 188 ರನ್‌ ಗಳಿಸಲಷ್ಟೇ ಶಕ್ತವಾಯಿತು. ತನ್ನ 10 ಓವರ್‌ಗಳ ದಾಳಿಯಲ್ಲಿ ಹಡಲ್‌ಸ್ಟನ್‌ 35 ರನ್‌ ನೀಡಿ ಐದು ವಿಕೆಟ್‌ ಕಿತ್ತು ಶ್ರೀಲಂಕಾ ಕುಸಿತಕ್ಕೆ ಕಾರಣರಾಗಿದ್ದರು.

ಇದಕ್ಕುತ್ತರವಾಗಿ ಸೂಝಿ ಬೇಟ್ಸ್‌ ಅವರ ಆಕರ್ಷಕ ಶತಕದಿಂದಾಗಿ ನ್ಯೂಜಿಲ್ಯಾಂಡ್‌ ತಂಡವು ಇನ್ನೂ 74 ಎಸೆತ ಬಾಕಿ ಇರುತ್ತಲೇ ಕೇವಲ ಒಂದು ವಿಕೆಟ್‌ ನಷ್ಟದಲ್ಲಿ ಜಯ ಸಾಧಿಸಿತು.  ಮೊದಲ ವಿಕೆಟ್‌ ಪತನದ ಬಳಿಕ ಬೇಟ್ಸ್‌ ಅವರನ್ನು ಸೇರಿಕೊಂಡ ಆ್ಯಮಿ ಸ್ಯಾಟರ್ತ್‌ವೈಟ್‌ ಅವರು ಮುರಿಯದ ದ್ವಿತೀಯ ವಿಕೆಟಿಗೆ 170 ರನ್ನುಗಳ ಜತೆಯಾಟದಲ್ಲಿ ಪಾಲ್ಗೊಂಡು ತಂಡಕ್ಕೆ ಭರ್ಜರಿ ಜಯ ತಂದುಕೊಟ್ಟರು. ಸ್ಯಾಟರ್ತ್‌ವೈಟ್‌ 78 ಮತ್ತು ಬೇಟ್ಸ್‌ 106 ರನ್‌ ಗಳಿಸಿ ಅಜೇಯರಾಗಿ ಉಳಿದರು.