ಹೊಸ ರವಿಚಂದ್ರನ್‌

ಸೋಮವಾರ ಸದ್ದಿಲ್ಲದೆ ರವಿಚಂದ್ರನ್‌ ಅವರ ಚಿತ್ರವೊಂದು ಶುರುವಾಗಿದೆ. ಕೆ. ಮಂಜು ಸಿನಿಮಾಸ್‌ ಲಾಂಛನದಲ್ಲಿ ಕೆ. ಮಂಜು ಹಾಗೂ ಗುಜ್ಜಲ್‌ ಪುರುಷೋತ್ತಮ್‌ ನಿರ್ಮಿಸುತ್ತಿರುವ ಹೊಸ ಚಿತ್ರದಲ್ಲಿ ರವಿಚಂದ್ರನ್‌ ನಟಿಸುತ್ತಿರುವುದಷ್ಟೇ ಅಲ್ಲ, ವಿಭಿನ್ನ ಗೆಟಪ್‌ನಲ್ಲಿ ಕಾಣಿಸಿಕೊಳ್ಳುತ್ತಿರುವುದು ವಿಶೇಷ.

ತಮಿಳಿನ “ಧ್ರುವಂಗಳ್‌ ಪದಿನಾರು’ ಚಿತ್ರದಿಂದ ಸ್ಫೂರ್ತಿ ಪಡೆದಿದೆ ಎಂದು ಹೇಳಲಾಗುತ್ತಿರುವ ಈ ಚಿತ್ರವನ್ನು ಶಿವಗಣೇಶ್‌ ನಿರ್ದೇಶಿಸುತ್ತಿದ್ದಾರೆ. ಈ ಹಿಂದೆ “ಜಿಗರ್‌ ಥಾಂಡಾ’ ಹಾಗೂ “ತ್ರಾಟಕ” ಚಿತ್ರಗಳನ್ನು ನಿರ್ದೇಶನ ಮಾಡಿರುವ ಶಿವಗಣೇಶ್‌, ಈ ಚಿತ್ರಕ್ಕೆ ಚಿತ್ರಕಥೆ ರಚಿಸಿದ್ದಾರೆ. ಇನ್ನು ಈ ಚಿತ್ರಕ್ಕೆ ಶ್ರೀಕಾಂತ್‌ ಸಂಭಾಷಣೆ ಬರೆದಿದ್ದಾರೆ.   

ಕುತೂಹಲಕಾರಿ ಕಥಾಹಂದರ ಹೊಂದಿರುವ ಈ ಚಿತ್ರದಲ್ಲಿ ರವಿಚಂದ್ರನ್‌ ಅವರು ಭಿನ್ನ ರೀತಿಯಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅವರ ಉಡುಗೆ, ತೊಡುಗೆ ಹೊಸರೀತಿಯಲ್ಲಿರುತ್ತದಂತೆ. ರವಿಚಂದ್ರನ್‌ ಜೊತೆಗೆ ಅಚ್ಯುತಕುಮಾರ್‌, ಯಶ್‌ ಶೆಟ್ಟಿ, ಚೈತ್ರಾ ರಾವ್‌, ನಿಸರ್ಗ, ಚೇತನ್‌, ಅರ್ಜುನ್‌ ಗೌಡ, ಗಿರೀಶ್‌ ಮುಂತಾದವರು ನಟಿಸುತ್ತಿರುವ ಈ ಚಿತ್ರಕ್ಕೆ ಗೌತಮ್‌ ಶ್ರೀವತ್ಸ ಸಂಗೀತ ಸಂಯೋಜಿಸುತ್ತಿದ್ದಾರೆ.

ಇನ್ನು ವಿನೋದ್‌ ಭಾರತಿ ಛಾಯಾಗ್ರಹಣ, ಸುರೇಶ್‌ ಆರ್ಮುಗಂ ಸಂಕಲನ ಮತ್ತು ವಿ. ನಾಗೇಂದ್ರ ಪ್ರಸಾದ್‌ ಅವರ ಗೀತಸಾಹಿತ್ಯ ಈ ಚಿತ್ರಕ್ಕಿದೆ. ಬೆಂಗಳೂರಲ್ಲದೆ ಕೊಡಗು, ಊಟಿ, ಉತ್ತರ ಭಾರತ ಮುಂತಾದ ಕಡೆ ಚಿತ್ರೀಕರಣ ನಡೆಯಲಿದೆ.