ಕೆಲವೇ ದಿನಗಳ ಹಿಂದಷ್ಟೇ ಶ್ರೀನಗರ ಕಿಟ್ಟಿ ಚಿತ್ರವೊಂದರ ಪಾತ್ರಕ್ಕಾಗಿಯೇ ದಪ್ಪ ಗಡ್ಡ ಬಿಟ್ಟು, ಹೊಸ ಗೆಟಪ್‌ನಲ್ಲಿದ್ದರು. ಈಗ ನೋಡಿದರೆ ಆ ಲುಕ್‌ ಚೇಂಜ್‌ ಆಗಿದೆ. ಹೌದು, ಅವರೀಗ ತಮ್ಮ ಗಡ್ಡವನ್ನು ಸಂಪೂರ್ಣ ತೆಗೆಸಿ, ಹ್ಯಾಂಡ್‌ಸಮ್‌ ಆಗಿ ಕಾಣುತ್ತಿದ್ದಾರೆ. ಅಷ್ಟಕ್ಕೂ ಅವರು ಅಷ್ಟೊಂದು ಗಡ್ಡ ಬಿಟ್ಟಿದ್ದು, “ಮೋಡ ಕವಿದ ವಾತಾವರಣ’ ಚಿತ್ರಕ್ಕಾಗಿ. ಆ ಚಿತ್ರದ ಫೋಟೋ ಶೂಟ್‌ ಮೊನ್ನೆಯಷ್ಟೇ ಮುಗಿದಿದೆ. ಅದಕ್ಕಾಗಿಯೇ ಕಿಟ್ಟಪ್ಪ ತಿಂಗಳುಗಟ್ಟಲೆ ದಾಡಿ ಬಿಟ್ಟಿದ್ದರು. ಈಗ ಹೊಸ ಸಿನಿಮಾಗಾಗಿ ದಾಡಿ ತೆಗೆದಿದ್ದಾರೆ.
ಅಂದಹಾಗೆ, ಕೆಳಗಿನ ಈ ಫೋಟೋ ನೋಡಿದರೆ, ಅವರ ಹೊಸ ಗೆಟಪ್‌ ಏನೆಂಬುದು ಈಗಾಗಲೇ ಗೊತ್ತಾಗಿರುತ್ತೆ. ಹೌದು, ಶ್ರೀನಗರ ಕಿಟ್ಟಿ ಖಡಕ್‌ ಪೊಲೀಸ್‌ ಅಧಿಕಾರಿಯಾಗಿ ನಟಿಸುತ್ತಿದ್ದಾರೆ. ಅವರ ಹೈಟ್‌ಗೆ ತಕ್ಕಂತೆಯೇ ಅವರಿಗೆ ಖಡಕ್‌ ಪೊಲೀಸ್‌ ಅಧಿಕಾರಿ ಪಾತ್ರ ಸಿಕ್ಕಿದೆ. ಅಷ್ಟಕ್ಕೂ ಕಿಟ್ಟಿ ಅಭಿನಯಿಸುತ್ತಿರುವ ಚಿತ್ರ ಯಾವುದು ಗೊತ್ತಾ? ಅದು “ಗರುಡ’. ಬೆಂಗಳೂರಲ್ಲಿ ನಡೆದ ಚಿತ್ರೀಕರಣದಲ್ಲಿ ಕಿಟ್ಟಿ ಅವರ ಭಾಗದ ದೃಶ್ಯವನ್ನು ಚಿತ್ರೀಕರಿಸಲಾಗಿದೆ. ಈ ಚಿತ್ರದಲ್ಲಿ ಕಿಟ್ಟಿ ಸಖತ್‌ ಪವರ್‌ಫ‌ುಲ್‌ ಪೊಲೀಸ್‌ ಅಧಿಕಾರಿಯಂತೆ. ಆದರೆ, ಅವರಿಲ್ಲಿ ಯಾರನ್ನು ಬಗ್ಗು ಬಡಿಯುತ್ತಾರೆ ಎಂಬುದಕ್ಕೆ “ಗರುಡ’ ಬರುವವರೆಗೂ ಕಾಯಬೇಕು.
ಸಿದ್ಧಾರ್ಥ್ ಮಹೇಶ್‌ ಈ ಚಿತ್ರಕ್ಕೆ ನಾಯಕ. ಧನಕುಮಾರ್‌ ಈ ಚಿತ್ರದ ನಿರ್ದೇಶಕರು. ಇನ್ನು, ಪ್ರಸಾದ್‌ ರೆಡ್ಡಿ ಅವರು ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಈ ಚಿತ್ರಕ್ಕೂ ಸಿದ್ಧಾರ್ಥ್ ಮಹೇಶ್‌ ಅವರೇ ಕಥೆ ಬರೆದಿದ್ದಾರೆ. ಇಲ್ಲಿ ಪೊಲೀಸ್‌ ಅಧಿಕಾರಿಯ ಪಾತ್ರ ಹೈಲೈಟ್‌ ಆಗಿರುವುದರಿಂದ ಆ ಪಾತ್ರಕ್ಕೆ ಯಾರು ಸೂಕ್ತ ಅಂತ ಯೋಚಿಸುವಾಗ, ಕಣ್ಣೆದುರಿಗೆ ಕಿಟ್ಟಪ್ಪ ಅವರು ಬಂದಿದ್ದಾರೆ. ತಡಮಾಡದೆಯೇ, ಚಿತ್ರತಂಡ ಕಿಟ್ಟಿ ಅವರನ್ನು ಸಂಪರ್ಕಿಸಿ, ಪೊಲೀಸ್‌ ಅಧಿಕಾರಿ ಪಾತ್ರ ಮಾಡುವಂತೆ ಕೇಳಿಕೊಂಡಿದೆ. ಅದಕ್ಕೆ ಸರಿಯಾಗಿ ಕಿಟ್ಟಿ ಅವರಿಗೂ ಅದೊಂದು ವಿಶೇಷ ಪಾತ್ರವೆನಿಸಿ, ಗ್ರೀನ್‌ಸಿಗ್ನಲ್‌ ಕೊಟ್ಟಿದ್ದಾರೆ.
ಅಲ್ಲಿಗೆ ಖಡಕ್‌ ಪೊಲೀಸ್‌ ಅಧಿಕಾರಿಯಾಗಿ ಕಿಟ್ಟಿ ಈಗಾಗಲೇ ಕ್ಯಾಮೆರಾ ಮುಂದೆ ನಿಂತಿದ್ದೂ ಆಗಿದೆ. ಅವರ ಗತ್ತು-ಗಮ್ಮತ್ತು ಹೇಗಿರುತ್ತೆ ಎಂಬುದಕ್ಕೆ ಸಿನಿಮಾ ರಿಲೀಸ್‌ ಆಗೋವರೆಗೆ ಕಾಯಲೇಬೇಕು. “ಗರುಡ’ದಲ್ಲಿ ಆಶಿಕಾ ಮತ್ತು ಐಂದ್ರಿತಾ ರೇ ನಾಯಕಿಯರಾಗಿ ನಟಿಸುತ್ತಿದ್ದಾರೆ. ಉಳಿದಂತೆ ಆದಿ ಲೋಕೇಶ್‌, ರಂಗಾಯಣ ರಘು, ಮುಖ್ಯಮಂತ್ರಿ ಚಂದ್ರು, ಆನಂದ್‌, ಸುಜಯ್‌, ಭರತ್‌ ಸಿಂಗ್‌ ಸೇರಿದಂತೆ ಅನೇಕರು ನಟಿಸುತ್ತಿದ್ದಾರೆ. ಚಿತ್ರಕ್ಕೆ ರಘು ದೀಕ್ಷಿತ್‌ ಸಂಗೀತ ನೀಡುತ್ತಿದ್ದಾರೆ. ಜೈ ಆನಂದ್‌ ಛಾಯಾಗ್ರಹಣವಿದೆ.
