ಇಂದು ನೀಟ್‌ ಪರೀಕ್ಷೆ; 3,843 ಕೇಂದ್ರಗಳಲ್ಲಿ ಸಿದ್ಧತೆ

ಹೊಸದಿಲ್ಲಿ: ವೈದ್ಯಕೀಯ ಪ್ರವೇಶ ಪರೀಕ್ಷೆಯಾದ ನ್ಯಾಶನಲ್‌ ಎಲಿಜಿಬಿಟಿ – ಕಂ – ಎಂಟ್ರೆನ್ಸ್‌ ಟೆಸ್ಟ್‌ (ನೀಟ್‌) ರವಿವಾರ ದೇಶಾದ್ಯಂತ ನಿಗದಿತ ಪರೀಕ್ಷಾ ಕೇಂದ್ರಗಳಲ್ಲಿ ನಡೆಯಲಿದೆ. ಮೇ 3ಕ್ಕೆ ನಿಗದಿಯಾಗಿದ್ದ ಪರೀಕ್ಷೆಯನ್ನು ಕೋವಿಡ್ ಲಾಕ್‌ಡೌನ್‌ನಿಂದಾಗಿ ಜು. 26ಕ್ಕೆ ಮುಂದೂಡಲಾಗಿತ್ತು. ಅನಂತರ ಸೆ. 13ಕ್ಕೆ ಮುಂದೂಡಲಾಗಿತ್ತು.

ಕೋವಿಡ್ ಮುನ್ನೆಚ್ಚರಿಕೆಗಳನ್ನು ಅಳವಡಿಸಿಕೊಂಡು ರಾಷ್ಟ್ರೀಯ ಪರೀಕ್ಷಾ ಪ್ರಾಧಿಕಾರ (ಎನ್‌ಟಿಎ)ವು ಈ ಪರೀಕ್ಷೆಯನ್ನು ಆಯೋಜಿಸಿದ್ದು, ದೇಶಾದ್ಯಂತ 15.97 ಲಕ್ಷ ವಿದ್ಯಾರ್ಥಿಗಳು ಹಾಜರಾಗಲಿದ್ದಾರೆ.

ಸಾಮಾಜಿಕ ಅಂತರ ಕಾಪಾಡಿಕೊಳ್ಳುವ ದೃಷ್ಟಿಯಿಂದ ಪರೀಕ್ಷಾ ಕೇಂದ್ರಗಳನ್ನು ಹೆಚ್ಚಿಸಲಾಗಿದೆ. ಈ ಮೊದಲು 2,546 ಕೇಂದ್ರಗಳನ್ನು ನಿಗದಿಪಡಿಸಲಾಗಿತ್ತು. ಈ ಬಾರಿ ಅದನ್ನು 3,843ಕ್ಕೆ ಹೆಚ್ಚಿಸಲಾಗಿದೆ. ಪರೀಕ್ಷಾ ಕೋಣೆಯಲ್ಲಿ ಕುಳಿತುಕೊಳ್ಳುವ ಅಭ್ಯರ್ಥಿಗಳ ಸಂಖ್ಯೆಯನ್ನು 24ರಿಂದ 12ಕ್ಕೆ ಇಳಿಸಲಾಗಿದೆ.

ಅಭ್ಯರ್ಥಿಗಳಿಗೆ ಮಾರ್ಗಸೂಚಿ
1 ಪರೀಕ್ಷಾರ್ಥಿಗಳು ನೀಟ್‌ ಅಡ್ಮಿಷನ್‌ ಕಾರ್ಡ್‌ ಮತ್ತು ಎ 4 ಕಾಗದ ದಲ್ಲಿ ಬರೆಯಲಾದ ಸ್ವಯಂ ದೃಢೀಕರಣ ಪತ್ರ ತರಬೇಕು.

2 ಪರೀಕ್ಷಾ ಕೇಂದ್ರ ಪ್ರವೇಶಿಸುವಾಗ ಫೇಸ್‌ ಮಾಸ್ಕ್ ತೆಗೆದು, ಸ್ವತ್ಛ, ಹೊಸ ಮಾಸ್ಕ್ ಧರಿಸಿ ಪ್ರವೇಶಿಸಬೇಕು.

3 ನೀಟ್‌ ವಸ್ತ್ರ ಸಂಹಿತೆಯ ಪ್ರಕಾರ ಅಭ್ಯರ್ಥಿಗಳು ಪಾದ ಮುಚ್ಚಿರುವ ಪಾದರಕ್ಷೆ, ಶೂ ಧರಿಸುವಂತಿಲ್ಲ. ಚಪ್ಪಲಿ ಅಥವಾ ಸ್ಯಾಂಡಲ್‌ ಧರಿಸಿರಬೇಕು.

4 ಅಭ್ಯರ್ಥಿಗಳ ಧರ್ಮಕ್ಕನುಗುಣವಾಗಿ ವಿಶೇಷ ಉಡುಪುಗಳನ್ನು ಧರಿಸುವುದೇ ಆದಲ್ಲಿ ಪರೀಕ್ಷೆಗೆ ಮುನ್ನ ಪರೀಕ್ಷಾ ಕೇಂದ್ರಕ್ಕೆ ಬಂದು ತಪಾಸಣೆಗೆ ಒಳಗಾಗಬೇಕು.

5 ಪರೀಕ್ಷೆ ಬರೆದ ಬಳಿಕ ಅಭ್ಯರ್ಥಿ ಗಳು ಪ್ರವೇಶ ಪತ್ರ,  ಒಎಂಆರ್‌ ಶೀಟ್‌ (ಮೂಲ ಪ್ರತಿ, ದ್ವಿಪತ್ರಿ ಎರಡನ್ನೂ) ಪರಿವೀಕ್ಷಕರಿಗೆ ಒಪ್ಪಿಸಬೇಕು. ಪ್ರಶ್ನೆಪತ್ರಿಕೆಯ ಬುಕ್‌ಲೆಟ್‌ ಕೊಂಡೊಯ್ಯಬಹುದು.