ನಾಯಕರಿಗೆ ನಾಲ್ಕೇಟು; ಗಡ್ಕರಿ ಮಾತು ಪ್ರಧಾನಿ ಮೋದಿ ವಿರುದ್ಧ: NCP

ಮುಂಬಯಿ : ‘ಭರವಸೆ ಈಡೇರಿಸಲು ವಿಫ‌ಲರಾಗುವ ನಾಯಕರಿಗೆ ಜನರು ನಾಲ್ಕು ಬಾರಿಸಬೇಕು’ ಎಂದು ಕೇಂದ್ರ ಸಚಿವ ನಿತಿನ್‌ ಗಡ್ಕರಿ ಈಚೆಗೆ ಹೇಳಿರುವ ಮಾತಿಗೆ ತಿರುಗೇಟು ನೀಡಿರುವ ಎನ್‌ಸಿಪಿ, ‘ಗಡ್ಕರಿ ಅವರ ಈ ಮಾತುಗಳು ಪ್ರಧಾನಿ ನರೇಂದ ಮೋದಿ ಅವರ ವೈಫ‌ಲ್ಯದ ಬಗ್ಗೆ ಬಿಜೆಪಿಯೊಳಗಿನ ಧ್ವನಿಯನ್ನು ಪ್ರತಿಬಿಂಬಿಸುತ್ತದೆ ‘ ಎಂದು ಹೇಳಿದೆ. 

ಎನ್‌ಸಿಪಿ ವಕ್ತಾರ ನವಾಬ್‌ ಮಲಿಕ್‌ ಅವರು ಇಂದು ಸೋಮವಾರ ಸುದ್ದಿಗಾರರೊಂದಿಗೆ ಮಾತನಾಡುತ್ತಾ, ‘ನಿತಿನ್‌ ಗಡ್ಕರಿ ತಾನು ಪ್ರಧಾನಿ ಮೋದಿ ಅವರಿಗೆ ಪರ್ಯಾಯ ನಾಯಕ ಎಂಬುದನ್ನು ಬಿಂಬಿಸಲು ಪ್ರಯತ್ನಿಸಿರುವಂತಿದೆ; ಮುಂಬರುವ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ಸೋಲುವುದೇ ಖಚಿತ ಇರುವುದರಿಂದ ಗಡ್ಕರಿ ಈ ಮಾತನ್ನು ಆಡಿದ್ದಾರೆ’ ಎಂದು ಹೇಳಿದರು. 

‘ರಾಜಸ್ಥಾನ, ಮಧ್ಯ ಪ್ರದೇಶ ಮತ್ತು ಛತ್ತೀಸ್‌ಗಢದಲ್ಲಿ ಬಿಜೆಪಿ ಸೋಲನುಭವಿಸಿದ ತರುವಾಯ ಗಡ್ಕರಿ ಈ ಬಿಚ್ಚು ಮನಸ್ಸಿನ ಮಾತನ್ನಾಡಿರುವುದರಿಂದ ಲೋಕಸಭಾ ಚುನಾವಣೆ ಬಳಿಕ ಮೋದಿಯಾಗಲೀ ಬಿಜೆಪಿ ಸರಕಾರವಾಗಲೀ ಇರದು ಎಂಬುದರ ಸುಳಿವು ಇದಾಗಿದೆ’ ಎಂದು ಮಲಿಕ್‌ ಹೇಳಿದರು.