25ಕ್ಕೆ ಅಮೆರಿಕಕ್ಕೆ ಮೋದಿ

ಹೊಸದಿಲ್ಲಿ: ಜಾಗತಿಕ ಹವಾಮಾನ ಬದಲಾವಣೆ ಕುರಿತಂತೆ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಭಾರತವನ್ನು ಹೀಗಳೆದ ಬೆನ್ನಲ್ಲೇ, ಈ ಮಾಸಾಂತ್ಯಕ್ಕೆ ಪ್ರಧಾನಿ ನರೇಂದ್ರ ಮೋದಿ, ಅಮೆರಿಕ ಪ್ರವಾಸ ಕೈಗೊಳ್ಳಲಿದ್ದಾರೆ. ಜೂ. 25 ಮತ್ತು 26ರಂದು ಮೋದಿ ಅವರು ಶ್ವೇತಭವನದಲ್ಲಿ ದ್ವಿಪಕ್ಷೀಯ ಸಂಬಂಧ ಕುರಿತಂತೆ ಟ್ರಂಪ್‌ ಜತೆ ಮಾತು ಕತೆ ನಡೆಸಲಿದ್ದಾರೆ.

ಐರೋಪ್ಯ ಒಕ್ಕೂಟದ ರಾಷ್ಟ್ರಗಳ ಜತೆಗೆ ಮುನಿಸಿಕೊಂಡಿರುವ ಟ್ರಂಪ್‌, ಜಾಗತಿಕ ತಾಪಮಾನ ವಿಚಾರದಲ್ಲಿ ಚೀನ ಮತ್ತು ಭಾರತದ ವಿರುದ್ಧ ಮಾತನಾಡಿ ಕೆಲವು ಅಸಮಾಧಾನಗಳಿಗೂ ಕಾರಣವಾಗಿದ್ದಾರೆ. ಜತೆಗೆ ಅಮೆರಿಕ ಫ‌ಸ್ಟ್‌ ಎನ್ನುವ ಅವರ ನೀತಿಯಿಂದಾಗಿ, ಅಂತಾರಾಷ್ಟ್ರೀಯ ಕಂಪೆನಿಗಳು ಭಾರತದ ಉದ್ಯೋಗಿಗಳ ಕೊರತೆ ಅನುಭವಿಸುತ್ತಿವೆ. ಭಾರತದ ಐಟಿ ಮಂದಿಗೆ ಎಂದಿಗೂ ಬಾಗಿಲು ತೆರೆದಿದ್ದ ಅಮೆರಿಕದ ಸಿಲಿಕಾನ್‌ ವ್ಯಾಲಿ ಪ್ರವೇಶಕ್ಕೆ ಟ್ರಂಪ್‌ ನಿರ್ಬಂಧ ಹೇರಿದ್ದಾರೆ. ಈ ಎಲ್ಲ ಅಂಶಗಳ ಬಗ್ಗೆ ಮೋದಿ ಅವರು, ಟ್ರಂಪ್‌ ಜತೆ ಮಾತುಕತೆ ನಡೆಸಲಿದ್ದಾರೆ ಎಂದು ಹೇಳಲಾಗುತ್ತಿದೆ.

ಇದೆಲ್ಲದಕ್ಕಿಂತ ಹೆಚ್ಚಾಗಿ, ಪಾಕಿಸ್ಥಾನ ಪ್ರಾಯೋಜಿತ ಭಯೋತ್ಪಾದನೆ ಬಗ್ಗೆಯೂ ಮೋದಿ ಅವರು ಟ್ರಂಪ್‌ ಜತೆ ಪ್ರಸ್ತಾವ ಮಾಡಲಿದ್ದಾರೆ ಎಂದು ಮೂಲಗಳು ಹೇಳಿವೆ. ಆದರೆ, ಟ್ರಂಪ್‌ ಭೇಟಿ ಮಾಡಲು ಅಮೆರಿಕಕ್ಕೆ ಹೋದ ಜಗತ್ತಿನ ಹಲವಾರು ನಾಯಕರಿಗೆ ಇರಿಸು ಮುರಿಸು ಆಗಿದ್ದೇ ಹೆಚ್ಚು.