ಮಂಗಳೂರು: ನೈಋತ್ವ ರೈಲ್ವೇ ವಲಯದ ಮೈಸೂರು-ಮಂಗಳೂರು ರೈಲು ಮಾರ್ಗದ ವಿದ್ಯುದೀಕರಣ ಯೋಜನೆ ಬಜೆಟ್‌ನಲ್ಲಿ ಪ್ರಕಟಗೊಂಡು ಐದು ವರ್ಷಗಳಾದರೂ ಇನ್ನೂ ಟೆಂಡರ್‌ ಹಂತದಿಂದ ಮೇಲೇರಿಲ್ಲ.
ಮಂಗಳೂರು-ಬೆಂಗಳೂರು ನಡುವಣ ರೈಲು ಪ್ರಯಾಣದ ಅವಧಿ ದೀರ್ಘ ವಾಗಿದ್ದು, ಕಡಿಮೆಗೊಳಿಸುವ ನಿಟ್ಟಿನಲ್ಲಿ ಮಾರ್ಗವನ್ನು ವಿದ್ಯುದೀಕರಿಸಬೇಕು ಎಂಬ ಬೇಡಿಕೆಯ ಹಿನ್ನೆಲೆಯಲ್ಲಿ 2017ರ ಬಜೆಟ್‌ನಲ್ಲಿ ಈ ಯೋಜನೆ ಪ್ರಕಟಿಸಲಾಗಿತ್ತು. ಮೈಸೂರು-ಹಾಸನ-ಮಂಗಳೂರು ಮಧ್ಯೆ 347 ಕಿ.ಮೀ. ವಿದ್ಯುದೀಕರಣಕ್ಕೆ 461.23 ಕೋಟಿ ರೂ. ಅಂದಾಜಿಸಲಾಗಿತ್ತು.
ಕೇಂದ್ರ ಸರಕಾರದ 2020-21ನೇ ಸಾಲಿನ ಬಜೆಟ್‌ನಲ್ಲಿ 60 ಕೋ.ರೂ. ಅನುದಾನ ಮೀಸಲಿಟ್ಟಿದ್ದು, ನಾಲ್ಕು ವರ್ಷಗಳಲ್ಲಿ ಯೋಜನೆ ಪೂರ್ತಿಗೊಳ್ಳಲಿದೆ ಎಂದು ಅಂದಾಜಿಸಲಾಗಿತ್ತು. ಇದರ ಅನುಷ್ಠಾನವನ್ನು ರೈಲ್‌ ಇಂಡಿಯಾ ಟೆಕ್ನಿಕಲ್‌ಆ್ಯಂಡ್‌ ಎಕಾಮಿಕ್ಸ್‌ ಸರ್ವಿಸ್‌ ಲಿಮಿಟೆಡ್‌ (ರೈಟ್ಸ್‌)ಸಂಸ್ಥೆಗೆ ವಹಿಸಲಾಗಿತ್ತು. ಹಾಸನ-ಅರಸೀಕೆರೆ ವಿಭಾಗದಲ್ಲಿ 2021ರ ಡಿಸೆಂಬರ್‌ನಲ್ಲಿ ಟೆಂಡರ್‌ ಪ್ರಕ್ರಿಯೆ ಮುಗಿದು ಬಿಡ್‌ನ ಟೆಕ್ನಿಕಲ್‌ ಇವೇಲ್ಯೂವೇಶನ್‌ ನಡೆಯುತ್ತಿದೆ.ಮೈಸೂರು-ಹಾಸನ ವಲಯದ ಕಾಮಗಾರಿಗೆ ಜನವರಿ ಅಂತ್ಯದೊಳಗೆ ಟೆಂಡರ್‌ ಕರೆಯುವ ಪ್ರಕ್ರಿಯೆ ನಡೆಯಲಿದೆ. ಆ ಬಳಿಕ ಹಾಸನ- ಮಂಗಳೂರು ನಡುವಣ ವಿದ್ಯುದೀಕರಣಕ್ಕೆ ಪೂರಕ ಪ್ರಕ್ರಿಯೆಗಳು ನಡೆಯಬೇಕಾಗಿವೆ.
ಕೊಂಕಣ ರೈಲ್ವೇಯ ಕಾರವಾರದಿಂದ ತೋಕೂರು ವರೆಗೆ ಹಾಗೂ ದಕ್ಷಿಣ ರೈಲ್ವೇಯ ಪಾಲಕ್ಕಾಡ್‌ ವಿಭಾಗದ ತೋಕೂರಿನಿಂದ ಶೋರ್ನೂರ್‌ ವರೆಗಿನ ವಿದ್ಯುದೀಕರಣಗೊಂಡಿರುವ ಕಾರಣ ಯಶವಂತಪುರ-ಕಾರವಾರ ರೈಲು ಕಾರವಾರದಿಂದ ಮಂಗಳೂರು ವರೆಗೆ ವಿದ್ಯುತ್‌ ಮೂಲಕ ಸಂಚರಿಸುತ್ತಿದೆ. ವೇಗವೂ ವರ್ಧನೆಯಾಗಿದ್ದು, 50 ನಿಮಿಷ ಮುಂಚಿತವಾಗಿ ಮಂಗಳೂರು ಜಂಕ್ಷನ್‌ಗೆ ತಲುಪುತ್ತದೆ. ಅಲ್ಲಿಂದ ಡೀಸೆಲ್‌ ಎಂಜಿನ್‌ ಮೂಲಕ ಬೆಂಗಳೂರಿಗೆ ಸಾಗುತ್ತದೆ.
ಕೊಂಕಣ ರೈಲ್ವೇ: ಶೇ. 87 ವಿದ್ಯುದೀಕರಣ ಪೂರ್ಣ
ಕೊಂಕಣ ರೈಲು ಮಾರ್ಗದಲ್ಲಿ ವಿದ್ಯುತ್‌ ಕಾಮಗಾರಿ ಶೇ. 87ರಷ್ಟು ಪೂರ್ಣಗೊಂಡಿದೆ. ಒಟ್ಟು 1,287 ಕೋ.ರೂ. ವೆಚ್ಚದಲ್ಲಿ 741 ಕಿ.ಮೀ. ವಿದ್ಯುದೀಕರಣ ಯೋಜನೆಗೆ 2015ರಲ್ಲಿ ಶಿಲಾನ್ಯಾಸ ನಡೆದಿತ್ತು. ಇದೀಗ ರೋಹಾ-ರತ್ನಾಗಿರಿ ಮಾರ್ಗದಲ್ಲಿ 204 ಕಿ.ಮೀ. ಹಾಗೂ ತೋಕೂರು-ಕಾರವಾರ ವರೆಗಿನ 239 ಕಿ.ಮೀ. ಮಾರ್ಗ ವಿದ್ಯುದೀಕರಣವಾಗಿದೆ.
ಹಾಸನ-ಅರಸೀಕೆರೆ ವಲಯದ ಟೆಂಡರ್‌ ಪ್ರಕ್ರಿಯೆ ಪೂರ್ಣಗೊಂಡಿದ್ದು ಪೂರಕ ಕ್ರಮಗಳು ಅಂತಿಮ ಹಂತದಲ್ಲಿವೆ. ಉಳಿದಂತೆ ಮೈಸೂರು-ಹಾಸನ ವಲಯದ ಟೆಂಡರ್‌ ಈ ತಿಂಗಳಿನಲ್ಲಿ ಕರೆಯುವ ಸಾಧ್ಯತೆಗಳಿವೆ. ಹಾಸನದಿಂದ ಮಂಗಳೂರು ವರೆಗಿನ ಕಾಮಗಾರಿಗೆ ಪೂರಕ ಪ್ರಕ್ರಿಯೆಗಳು ಬಳಿಕ ಆರಂಭಗೊಳ್ಳಲಿವೆ.
– ಇ. ವಿಜಯ, ಮುಖ್ಯ ಸಾರ್ವಜನಿಕ
ಸಂಪರ್ಕಾಧಿಕಾರಿ, ನೈಋತ್ಯ ರೈಲ್ವೇ
-ಕೇಶವ ಕುಂದರ್‌
