ನೈಪಿಡಾವ್‌: ಮ್ಯಾನ್ಮಾರ್‌ನ ಕಾಚಿನ್‌ ರಾಜ್ಯದಲ್ಲಿ ನಡೆಯುತ್ತಿದ್ದ ಕಾರ್ಯಕ್ರಮವೊಂದರ ಮೇಲೆ ಮ್ಯಾನ್ಮಾರ್‌ ಸೇನೆಯು ವೈಮಾನಿಕ ದಾಳಿ ನಡೆಸಿದೆ.
ಘಟನೆಯಿಂದಾಗಿ ಕನಿಷ್ಠ 60 ಮಂದಿ ಸಾವನ್ನಪ್ಪಿದ್ದು, 100ಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದಾರೆ.
ಪ್ರತ್ಯೇಕತಾವಾದಿಗಳಾದ ಕಾಚಿನ್‌ ಸ್ವಾತಂತ್ರ್ಯ ಸಂಸ್ಥೆಯ 62ನೇ ಸಂಸ್ಥಾಪನಾ ದಿನದ ಕಾರ್ಯಕ್ರಮ ಭಾನುವಾರ ರಾತ್ರಿ ವೇಳೆ ನಡೆಯುತ್ತಿತ್ತು.
ಸ್ಥಳೀಯ ಗಾಯಕರು, ನೃತ್ಯ ಕಲಾವಿದರು ಸೇರಿದಂತೆ ಅನೇಕರು ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು. ಅದೇ ವೇಳೆ ಈ ದಾಳಿ ನಡೆದಿದೆ. 3 ಜೆಟ್‌ಗಳನ್ನು ಬಳಸಿಕೊಂಡು ಸೇನೆಯು ದಾಳಿ ನಡೆಸಿದ್ದಾಗಿ ವರದಿಯಾಗಿದೆ.
ಹಲವು ಪ್ರಸಿದ್ಧ ಗಾಯಕರು ಸೇರಿದಂತೆ ಅನೇಕರು ಸಾವನ್ನಪ್ಪಿರುವ ಅನುಮಾನವಿದೆ.
ಯೋಧರು ಕಾರ್ಯಕ್ರಮ ನಡೆಯುತ್ತಿದ್ದ ಸ್ಥಳದ ಸುತ್ತಲೂ ಚೆಕ್‌ಪಾಯಿಂಟ್‌ಗಳನ್ನು ರಚಿಸಿಕೊಂಡಿದ್ದು, ಗಾಯಾಳುಗಳನ್ನು ಆಸ್ಪತ್ರೆಗೆ ಸಾಗಿಸಲು ಅನುಮತಿ ನೀಡುತ್ತಿಲ್ಲ ಎನ್ನುವ ವರದಿಯಾಗಿದೆ.
ಮ್ಯಾನ್ಮಾರ್‌ನಲ್ಲಿ ಜನಾಂಗೀಯ ಅಲ್ಪಸಂಖ್ಯಾತರು ಮತ್ತು ಸರ್ಕಾರದ ಮಧ್ಯೆ ಜಗಳದಿಂದಾಗಿ ಹಿಂಸಾಚಾರ ಹೆಚ್ಚಾಗಿದೆ.
