ಮಂಗಳೂರಿನ ರೂಪಮೌಳಿಗೆ ಮಿಸೆಸ್‌ ಗ್ಲೋಬಲ್‌ ಪ್ರಶಸ್ತಿ

ಮಂಗಳೂರು : ಮಂಗಳೂರಿನಲ್ಲಿ ಹುಟ್ಟಿ ಬೆಳೆದ ರೂಪಮೌಳಿ ಈಗ “ಮಿಸೆಸ್‌ ಗ್ಲೋಬಲ್‌ ಇಂಟರ್‌ನ್ಯಾಶನಲ್‌ ಕ್ಲಾಸಿಕ್‌- 2017′ ಪ್ರಶಸ್ತಿ ಕಿರೀಟವನ್ನು ಮುಡಿಗೇರಿಸಿಕೊಂಡಿದ್ದಾರೆ.

ರಷ್ಯಾದ ಮಾಸ್ಕೋದಲ್ಲಿ ನಡೆದ ಈ ಸ್ಪರ್ಧೆಯಲ್ಲಿ 30 ದೇಶಗಳ ಸ್ಪರ್ಧಿಗಳು ಭಾಗವಹಿಸಿದ್ದರು.ಸ್ಪರ್ಧಿಗಳಿಗೆ ಐಸ್‌ಬ್ರೇಕರ್‌, ಟ್ಯಾಲೆಂಟ್‌, ಫೋಟೋಶೂಟ್‌, ಸಮೂಹ ಚರ್ಚೆ, ಆಶುಭಾಷಣ, ರಾಷ್ಟ್ರೀಯ ವಸ್ತ್ರ ವಿನ್ಯಾಸ ಮುಂತಾದ ಸ್ಪರ್ಧೆಗಳನ್ನು ಏರ್ಪಡಿಸಲಾಗಿತ್ತು.

ರಾಷ್ಟ್ರೀಯ ವಸ್ತ್ರ ವಿನ್ಯಾಸದಲ್ಲಿ ಅವರು ನವಿಲು ಬಣ್ಣದ ರೇಷ್ಮೆ ವಸ್ತ್ರ ಧರಿಸಿ ಭಾರೀ ಮೆಚ್ಚುಗೆಗೆ ಪಾತ್ರರಾದರು. ಅವರು ಮಿಸೆಸ್‌ ಫೋಟೋಜೆನಿಕ್‌ ಮತ್ತು ಜೂರೀಸ್‌ ಚಾಯ್ಸ ಎಂಬ ಎರಡು ಉಪಪ್ರಶಸ್ತಿಗಳನ್ನು ಪಡೆದರು.

ರೂಪಮೌಳಿ ಅವರು ಮಂಗಳೂರಿನ ಆನಂದ ಹೆಗ್ಡೆ- ಸುಗಂಧಿ ಹೆಗ್ಡೆ ದಂಪತಿಯ ಪುತ್ರಿ. ಸೈಂಟ್‌ ಆ್ಯನ್ಸ್‌ ಕೆನರಾ ಪ.ಪೂ. ಕಾಲೇಜ್‌; ಬಳಿಕ ಬೆಂಗಳೂರಿನಲ್ಲಿ ಪದವಿ ಓದಿ ಸ್ವಲ್ಪಕಾಲ ಸರಕಾರದ ಕೃಷಿ ಇಲಾಖೆಯಲ್ಲಿ ಸೇವೆ ಸಲ್ಲಿಸಿದ್ದರು. ಈಗ ಸ್ವಂತ ಉದ್ಯಮ ನಡೆಸುತ್ತಿದ್ದಾರೆ. ಅವರ ಪತಿ ಇಂದುಮೌಳಿ ಸ್ನಾತಕೋತ್ತರ ಪದವೀಧರ. ಈ ದಂಪತಿಯ ಪುತ್ರ ನಿಪುಣ್‌ ಮೌಳಿ ಎಂಜಿನಿಯರಿಂಗ್‌ ಪದವೀಧರರಾಗಿದ್ದು ಅಮೆರಿಕದಲ್ಲಿ ಎಂಎಸ್‌ ಓದುತ್ತಿದ್ದಾರೆ.