ತೆರೆ ಮೇಲೆ ಬರಲಿದೆ ಡ್ರೋನ್ ಪ್ರತಾಪ್ ವಂಚನೆ : ಪ್ರತಾಪ್ ಪಾತ್ರದಲ್ಲಿ ಪ್ರಥಮ್

ಬೆಂಗಳೂರು : ಸುಳ್ಳು ಹೇಳಿ ಫೇಮಸ್ ಆದ ಡ್ರೋನ್ ಪ್ರತಾಪ್ ಕುರಿತು ಸಿನಿಮಾ ಮಾಡಲು ಬಿಗ್ ಬಾಸ್ ವಿಜೇತ, ನಟ ಹಾಗೂ ಸಿನಿಮಾ ನಿರ್ದೇಶಕ ಒಳ್ಳೆಯ ಹುಡುಗ ಖ್ಯಾತಿಯ ಪ್ರಥಮ್ ಮುಂದಾಗಿದ್ದಾರೆ.

ಡ್ರೋನ್ ಕಂಡು ಹಿಡಿದಿರುವುದಾಗಿ ನಂಬಿಸಿ, ಹಲವು ಸಭೆ-ಸಮಾರಂಭಗಳಲ್ಲಿ ಭಾಷಣ ಮಾಡಿ ಖ್ಯಾತಿ ಪಡೆದ ಪ್ರತಾಪ್ ಬಂಡವಾಳ ಕೊನೆಗೂ ಬಯಲಾಯಿತು. ಆತ ಯಾವುದೇ ರೀತಿಯ ಡ್ರೋನ್ ತಯಾರಿಸಿಲ್ಲ ಎನ್ನುವ ವಿಚಾರ ತಿಳಿಯುತ್ತಿದ್ದಂತೆ ಆತನ ವಿರುದ್ಧ ಸಾಕಷ್ಟು ಟೀಕೆಗಳು ಕೇಳಿ ಬಂದವು. ಇದೀಗ ಆತನ ವಂಚನೆಯ ಕಥೆಯನ್ನು ಹಾಸ್ಯಮಯವಾಗಿ ತೆರೆ ಮೇಲೆ ತರಲು ಹೊರಟಿದ್ದಾರೆ ಪ್ರಥಮ್.

ಈ ಸಿನಿಮಾವನ್ನು ಸ್ವತಃ ಪ್ರಥಮ್ ನಿರ್ದೇಶನ ಮಾಡುವುದರ ಜೊತೆ ನಟನಾಗಿಯೂ ಕಾಣಿಸಿಕೊಳ್ಳುತ್ತಿದ್ದಾರೆ. ಪ್ರತಾಪ್‌ ಬಗ್ಗೆ ಅರಿತುಕೊಳ್ಳಲು ಸುಮಾರು ನಾಲ್ಕು ತಿಂಗಳು ನಾನು ವ್ಯಯಿಸಿದ್ದೇನೆ. ಡ್ರೋನ್ ಪ್ರತಾಪನ ಸಾಕಷ್ಟು ಭಾಷಣಗಳನ್ನು ಕೇಳಿ ಆತನ ಹಾವ-ಭಾವ ಅಭ್ಯಸಿಸಿದ್ದೇನೆ. ಆತನ ಪಾತ್ರ ನಿರ್ವಹಿಸುವಷ್ಟರ ಮಟ್ಟಿಗೆ ಸ್ವಯಂ ತರಬೇತಿಗೊಂಡಿದ್ದೇನೆ” ಎಂದಿದ್ದಾರೆ ಪ್ರಥಮ್.

ಇನ್ನು ಈ ಸಿನಿಮಾವನ್ನು ‘ಗೌರಿ ಗಣೇಶ’, ‘ಸುಬ್ಬಾ ಶಾಸ್ತ್ರಿ’, ‘ಉಂಡು ಹೋದ ಕೊಂಡು ಹೋದ’ ಸಿನಿಮಾಗಳ ರೀತಿಯಲ್ಲಿಯೇ ಮಾಡುವ ಇರಾದೆ ಇದೆ. ಇದಕ್ಕಾಗಿ ಸಾಕಷ್ಟು ತಯಾರಿ ಮಾಡಿದ್ದು, ಹಾಸ್ಯಮಯವಾದ ಚಿತ್ರಕತೆ ತಯಾರಿಸಲಾಗಿದೆ” ಎಂದಿದ್ದಾರೆ ಪ್ರಥಮ್.”ಸಿನಿಮಾದ ಮುಖ್ಯ ಪಾತ್ರದಲ್ಲಿ ನಟ ತಬಲಾ ನಾಣಿ ಸಹ ಇರಲಿದ್ದಾರೆ. ಜೊತೆಗೆ ಸಿನಿಮಾದಲ್ಲಿ ಇಬ್ಬರು ನಾಯಕಿಯರು ಇರಲಿದ್ದಾರೆ. ಅದರಲ್ಲಿ ಒಬ್ಬ ನಾಯಕಿ ಮುಂಬೈ ಮೂಲದವರಾಗಿರುತ್ತಾರೆ” ಎಂದಿದ್ದಾರೆ ಪ್ರಥಮ್.