ವಿಮಾನ ನಿಲ್ದಾಣದಲ್ಲಿ ಚಿನ್ನ ವಿಜೇತೆ ಮೌಮಾದಾಸ್‌ಗೆ ಸಂಕಷ್ಟ

ಹೊಸದಿಲ್ಲಿ: ಭಾರತೀಯ ಟೇಬಲ್‌ ಟೆನಿಸ್‌ ತಂಡದ ಆಟಗಾರ್ತಿ ಮೌಮಾ ದಾಸ್‌ ಕಾಮನ್‌ವೆಲ್ತ್‌ ಕೂಟ ಮುಗಿಸಿ ಭಾರತಕ್ಕೆ ಮರಳುವಾಗ ವಿಮಾನ ನಿಲ್ದಾಣದಲ್ಲಿ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಅವರ ಚೆಕ್‌ ಇನ್‌ ಬ್ಯಾಗೇಜ್‌ನಲ್ಲಿ ಪವರ್‌ ಬ್ಯಾಂಕ್‌ ಇದೆ ಎಂಬ ಕಾರಣಕ್ಕೆ ದಿಲ್ಲಿಯ ಸೀಮಾಸುಂಕಾಧಿಕಾರಿಗಳು ಬ್ಯಾಗ್‌ ಕೊಡದೆ ತಡೆಹಿಡಿದಿದ್ದರು. ಇದನ್ನು ವಿಮಾನಯಾನ ಸಂಸ್ಥೆ ಮಾಡಿದ ಟ್ವೀಟ್‌ ಮೂಲಕ ಮೌಮಾ ದಾಸ್‌ ತಿಳಿದುಕೊಂಡರು. ಮಂಗಳವಾರ ರಾತ್ರಿ ಈ ಸಮಸ್ಯೆ ಇತ್ಯರ್ಥವಾಗಿದೆ.

ವಿಷಯ ತಿಳಿದ ತತ್‌ಕ್ಷಣ ಮೌಮಾ ಗೊಂದಲಕ್ಕೊಳಗಾಗಿದ್ದಾರೆ. ತಮ್ಮ ಬ್ಯಾಗ್‌ನಲ್ಲಿ ಪವರ್‌ ಬ್ಯಾಂಕ್‌ ಇರಲಿಲ್ಲ ಎನ್ನುವುದು ಅವರ ಖಚಿತ ವಾದವಾಗಿತ್ತು. ಕಡೆಗೆ ಅವರು ಇತರ ಆ್ಯತ್ಲೀಟ್‌ಗಳೊಂದಿಗೆ ಚರ್ಚಿಸಿದಾಗ ಸಂಘಟಕರು ನೀಡಿದ ಬ್ಯಾಗ್‌ನಲ್ಲಿ ಪವರ್‌ ಬ್ಯಾಂಕ್‌ ಇದ್ದಿದ್ದು ತಿಳಿದು ಬಂದಿದೆ. ಗೊತ್ತಾಗದೇ ನಡೆದ ಈ ತಪ್ಪಿಗೆ ಕ್ಷಮೆ ಕೇಳಿ ಮೌಮಾ ಲಗೇಜ್‌ ಬಿಡಿಸಿಕೊಂಡಿದ್ದಾರೆ. ಅಷ್ಟರ ನಡುವೆಯೇ ಕ್ರೀಡಾ ಸಚಿವ ರಾಥೋಡ್‌ ಮಧ್ಯಪ್ರವೇಶಿಸಿ, ವಿತ್ತ ಇಲಾಖೆಗೆ ಪರಿಸ್ಥಿತಿ ಸರಿಪಡಿಸುವಂತೆ ಮಾಡಿದ್ದರು.