ಸೈಯೆರಾ ನರಸಿಂಹ ರೆಡ್ಡಿ ಚಿತ್ರದ ಮೋಷನ್‌ ಪೋಸ್ಟರ್‌ ಬಿಡುಗಡೆ

ಚಿರಂಜೀವಿ ಅಭಿನಯದ “ಉಯ್ನಾಲವಾಡ ನರಸಿಂಹ ರೆಡ್ಡಿ’ ಚಿತ್ರದಲ್ಲಿ ಸುದೀಪ್‌ ನಟಿಸುತ್ತಾರೆ ಎಂಬ ಸುದ್ದಿ ಕೆಲವು ದಿನಗಳ ಹಿಂದೆ ಬಂದಿತ್ತು. ಅದರ ಹಿಂದೆಯೇ, ಡೇಟ್‌ ಕ್ಲಾಶ್‌ ಆಗುವ ಸಂಭವವಿರುವುದರಿಂದ, ಸುದೀಪ್‌ ನಟಿಸುವುದು ಸಂಶಯ ಎಂಬ ಮಾತೂ ಇತ್ತು. ಇದೀಗ ಚಿತ್ರತಂಡವೇ ಅಧಿಕೃತ ಘೋಷಣೆ ಮಾಡಿದ್ದು, ಚಿತ್ರದ ಕಲಾವಿದರ ಪಟ್ಟಿಯಲ್ಲಿ ಸುದೀಪ್‌ ಅವರ ಹೆಸರನ್ನೂ ಸೇರಿಸಿದೆ. ಅಲ್ಲಿಗೆ, “ಬಾಹುಬಲಿ’ ನಂತರ ಸುದೀಪ್‌ ಮತ್ತೂಮ್ಮೆ ತೆಲುಗು ಚಿತ್ರದಲ್ಲಿ ನಟಿಸಲಿದ್ದಾರೆ.

ಚಿರಂಜೀವಿ ಅಭಿನಯದ “ಉಯ್ನಾಲವಾಡ ನರಸಿಂಹ ರೆಡ್ಡಿ’ ಚಿತ್ರದ ಹೆಸರು ಇದೀಗ ಬದಲಾಗಿದ್ದು, ಚಿತ್ರಕ್ಕೆ “ಸೈಯರಾ ನರಸಿಂಹ ರೆಡ್ಡಿ’ ಎಂದು ಮರುನಾಮಕರಣ ಮಾಡಲಾಗಿದೆ. ಈ ಚಿತ್ರವನ್ನು ಚಿರಂಜೀವಿ ಅವರ ಮಗ ರಾಮಚರಣ್‌ ತೇಜ ನಿರ್ಮಿಸುತ್ತಿದ್ದು, ಸುರೇಂದ್ರ ರೆಡ್ಡಿ ನಿರ್ದೇಶಿಸುತ್ತಿದ್ದಾರೆ. ನಿನ್ನೆ ಮಂಗಳವಾರ, ಚಿರಂಜೀವಿ ಅವರ ಹುಟ್ಟುಹಬ್ಬದ ಪ್ರಯುಕ್ತ ಚಿತ್ರದ ಮೋಷನ್‌ ಪೋಸ್ಟರ್‌ ಸಹ ಬಿಡುಗಡೆ ಮಾಡಲಾಗಿದೆ.

“ಸೈಯರಾ ನರಸಿಂಹ ರೆಡ್ಡಿ’ ಚಿತ್ರದಲ್ಲಿ ಪ್ರತಿಭಾವಂತ ದಂಡೇ ಇದ್ದು, ಚಿರಂಜೀವಿ ಜೊತೆಗೆ ಅಮಿತಾಭ್‌ ಬಚ್ಚನ್‌, ಸುದೀಪ್‌, ನಯನತಾರಾ, ಜಗಪತಿ ಬಾಬು, ವಿಜಯ್‌ ಸೇತುಪತಿ, ನಾಸರ್‌, ರವಿ ಕಿಶನ್‌, ಮುಕೇಶ್‌ ರಿಷಿ, ಸುಬ್ಬರಾಜು ಮುಂತಾದವರು ನಟಿಸುತ್ತಿದ್ದಾರೆ. ಚಿತ್ರಕ್ಕೆ ಪರಚೂರಿ ಸಹೋದರರು ಕಥೆ ಬರೆದರೆ, ಸುರೇಂದ್ರ ರೆಡ್ಡಿ ಚಿತ್ರಕಥೆ ಬರೆಯುವುದರ ಜೊತೆಗೆ ನಿರ್ದೇಶನ ಮಾಡುತ್ತಿದ್ದಾರೆ. ಬಹಳ ದಿನಗಳ ನಂತರ ಈ ಚಿತ್ರಕ್ಕೆ ಸಂಗೀತ ನೀಡುವ ಮೂಲಕ ಎ.ಆರ್‌. ರೆಹಮಾನ್‌ ತೆಲುಗಿಗೆ ಬರುತ್ತಿದ್ದಾರೆ. ರವಿವರ್ಮನ್‌ ಅವರ ಛಾಯಾಗ್ರಹಣ ಈ ಚಿತ್ರಕ್ಕಿದೆ.