Advertisement
ಪ್ರಧಾನಿ ಮೋದಿ ಅವರು ಮೂರು ದಿನಗಳ ಐರೋಪ್ಯ ದೇಶಗಳ ಪ್ರವಾಸ ದಲ್ಲಿದ್ದು, ಜರ್ಮನಿ ಭೇಟಿ ಮುಗಿಸಿ ಮಂಗಳವಾರ ಡೆನ್ಮಾರ್ಕ್‌ಗೆ ತೆರಳಿದ್ದಾರೆ. ಕೋಪನ್‌ಹೇಗನ್‌ಗೆ ಬಂದಿಳಿದ ಪ್ರಧಾನಿ ಮೋದಿಯವರನ್ನು ಅಲ್ಲಿನ ಪ್ರಧಾನಿ ಫೆಡೆರಿಕ್ಸನ್‌ ಸ್ವಾಗತಿಸಿದರು. ಬಳಿಕ ಇಬ್ಬರೂ ನಾಯಕರು ಮಾತುಕತೆ ನಡೆಸಿದ್ದು, ರಷ್ಯಾ-ಉಕ್ರೇನ್‌ ಯುದ್ಧದ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದಾರೆ.
ಭಾರತ ಮತ್ತು ಡೆನ್ಮಾರ್ಕ್‌ ಪ್ರಧಾನಿಗಳು ಹಾಗೂ ಉಭಯ ದೇಶಗಳ ಪ್ರತಿನಿಧಿಗಳ ನಡುವೆ ಮಾತುಕತೆ ನಡೆಯಿತು. ಈ ಸಂದರ್ಭದಲ್ಲಿ ಇಂಡೋ-ಫೆಸಿಫಿಕ್‌ ವಲಯದಲ್ಲಿ ಶಾಂತಿಯ ಬಗ್ಗೆಯೂ ಚರ್ಚಿಸಲಾಯಿತು. ಕೌಶಲ ಅಭಿವೃದ್ಧಿ, ಹವಾಮಾನ, ನವೀಕರಿಸಬಹುದಾದ ಇಂಧನ, ಆರ್ಕ್‌ಟಿಕ್‌, ಪಿ2ಪಿ ಒಪ್ಪಂದಗಳ ಬಗ್ಗೆ ಚರ್ಚೆ ನಡೆಸಲಾಯಿತು. ಭಾರತದ ಮೂಲ ಸೌಕರ್ಯ ಮತ್ತು ಹಸುರು ಕೈಗಾರಿಕೆ ಗಳಲ್ಲಿ ಹೂಡಿಕೆ ಮಾಡಲು ಸಾಕಷ್ಟು ಅವಕಾಶವಿದೆ ಎಂದು ಪ್ರಧಾನಿ ಮೋದಿ ಹೇಳಿದರು.
Related Articles
ಬುಧವಾರ ಭಾರತ ಮತ್ತು ನಾರ್ಡಿಕ್‌ ದೇಶಗಳ ನಡುವೆ ಶೃಂಗ ಸಭೆ ನಡೆಯಲಿದೆ. ಇದರಲ್ಲಿ ಡೆನ್ಮಾರ್ಕ್‌ ಜತೆಗೆ ಐಯರ್ಲೆಂಡ್‌, ಫಿನ್ಲಂಡ್‌, ಸ್ವೀಡನ್‌ ಮತ್ತು ನಾರ್ವೆಗಳ ಮುಖ್ಯಸ್ಥರು ಭಾಗಿಯಾಗಲಿದ್ದಾರೆ. ಭಾರತವು ಈ ದೇಶಗಳೊಂದಿಗೆ ಸುಮಾರು 500 ಕೋಟಿ ಡಾಲರ್‌ಗಳಷ್ಟು ವ್ಯಾಪಾರ ವಹಿವಾಟು ಹೊಂದಿದೆ. ಶೃಂಗ ಸಭೆಯ ಜತೆಯಲ್ಲೇ ಡೆನ್ಮಾರ್ಕ್‌ ರಾಣಿ ಕ್ವೀನ್‌ ಮಾರ್ಗರೆಟ್‌ 2 ಅವರನ್ನು ಪ್ರಧಾನಿ ಮೋದಿ ಭೇಟಿ ಮಾಡಲಿದ್ದಾರೆ. ಬಳಿಕ ಫ್ರಾನ್ಸ್‌ಗೆ ತೆರಳಲಿದ್ದಾರೆ.
Advertisement