ಕಾಂಗ್ರೆಸ್‌ ತ್ಯಜಿಸಿ ಬಿಜೆಪಿ ಸೇರಿದ ಮಿಜೋರಾಂ ಸ್ಪೀಕರ್‌ ರಾಜೀನಾಮೆ

ಐಜಾಲ್‌ : ಆಳುವ ಕಾಂಗ್ರೆಸ್‌ ಪಕ್ಷಕ್ಕೆ ರಾಜೀನಾಮೆ ನೀಡಿ ಭಾರತೀಯ ಜನತಾ ಪಕ್ಷ ಸೇರಿರುವ ಮಿಜೋರಾಂ ಸ್ಪೀಕರ್‌ ಹಿಫೇ ಅವರು ಇಂದು ಸೋಮವಾರ ತಮ್ಮ ಹುದ್ದೆಗೆ, ಸದನ ಸದಸ್ಯತ್ವಕ್ಕೆ ಮತ್ತು ಕಾಂಗ್ರೆಸ್‌ ಪಕ್ಷದ ಸದಸ್ಯತ್ವಕ್ಕೆ  ರಾಜೀನಾಮೆ ನೀಡಿರವುದಾಗಿ ಪ್ರಕಟಿಸಿದ್ದಾರೆ. 

ಹಿಫೇ ಅವರು ತಮ್ಮ ರಾಜೀನಾಮೆ ಪತ್ರವನ್ನು ಉಪ ಸ್ಪೀಕರ್‌ ಆರ್‌ ಲಾಲ್‌ರಿನವ್‌ಮಾ ಅವರಿಗೆ ನೀಡಿದ್ದು ಅವರು ತ್ಯಾಗಪತ್ರವನ್ನು ಸ್ವೀಕರಿಸಿರುವುದಾಗಿ ತಿಳಿದು ಬಂದಿದೆ.

ಹಿರಿಯ ನಾಯಕರಾಗಿರುವ ಹಿಫೇ ಅವರು 2013ರಲ್ಲಿ ಪಲಾಕ್‌ ಕ್ಷೇತ್ರದಿಂದ 40 ಸದಸ್ಯ ಬಲದ ರಾಜ್ಯ ವಿಧಾನಸಭೆಗೆ ಕಾಂಗ್ರೆಸ್‌ ಪಕ್ಷದ ಮೂಲಕ ಗೆದ್ದಿದ್ದರು. 

ಈಶಾನ್ಯ ಭಾರತದಲ್ಲೀಗ ಏಕೈಕ ಕಾಂಗ್ರೆಸ್‌ ಆಳ್ವಿಕೆ ಇರುವ ರಾಜ್ಯವಾಗಿರುವ ಮಿಜೋರಾಂ ಇದೇ ನ.28ರಂದು ವಿಧಾನಸಭಾ ಚುನಾವಣೆಯನ್ನು ಕಾಣಲಿದೆ.