ಬೆಂಗಳೂರಿನ ವಿಜ್ಞಾನಿಗಳ ಮಹತ್ವದ ಸಂಶೋಧನೆ: ಬಸವನಹುಳು ಹೊಸ ಪ್ರಭೇದ ಪತ್ತೆ

ಶಿಲ್ಲಾಂಗ್‌: ಮೇಘಾಲಯದ ಈಸ್ಟ್‌ ಖಾಸಿ ಹಿಲ್ಸ್‌ ಜಿಲ್ಲೆಯ ಮಾಸ್ವಮೈ ಎಂಬ ಹಳ್ಳಿಯಲ್ಲಿ ಬಸವನಹುಳು ವಿನ ಹೊಸ ಪ್ರಬೇಧವೊಂದು ಪತ್ತೆಯಾಗಿದೆ. ಬೆಂಗಳೂರಿನ ಅಶೋಕ ಟ್ರಸ್ಟ್‌ ಫಾರ್‌ ರಿಸರ್ಚ್‌ ಇನ್‌ ಎಕಾಲಜಿ ಆ್ಯಂಡ್‌ ದ ಎನ್ವಿರಾನ್ಮೆಂಟ್‌ (ಅಟ್ರೀ) ಸಂಸ್ಥೆಯ ವಿಜ್ಞಾನಿಗಳಾದ ನಿಪು ಕುಮಾರ್‌ ದಾಸ್‌ ಹಾಗೂ

ಎನ್‌.ಎ. ಅರವಿಂದ್‌ ಎಂಬುವರು ಈ ಪ್ರಭೇದಗಳನ್ನು ಪತ್ತೆ ಹಚ್ಚಿದ್ದಾರೆ. ಆ ಹಳ್ಳಿಯಲ್ಲಿರುವ ಸುಣ್ಣದ ಕಲ್ಲಿನ ಗುಹೆಯಲ್ಲಿ ಇವು ಪತ್ತೆಯಾಗಿದ್ದು ಇವುಗಳಿಗೆ ಜಿಯೋರಿಸ್ಸಾ ಮಾಸ್ವಮೈನಿಸ್‌ ಎಂದು ಹೆಸರಿಡಲಾಗಿದೆ.

ಈ ಪ್ರಭೇದದ ಬಸವನಹುಳುಗಳು ಭೌತಿಕವಾಗಿ ತುಂಬಾ ಚಿಕ್ಕವಾಗಿದ್ದು, ಇವುಗಳಲ್ಲಿ ವಯಸ್ಕ ಬಸವನಹುಳು ಕೇವಲ 2 ಮಿಮೀ ಉದ್ದವಿರುತ್ತದೆ. ಇದೇ ಜಾತಿಗೆ ಸೇರಿದ “ಜಿಯೊರಿಸ್ಸಾ ಸರಿಟಾ’ ಪ್ರಭೇದವು 170 ವರ್ಷಗಳ ಹಿಂದೆ ಇದೇ ಪ್ರಾಂತ್ಯದಲ್ಲಿ ಪತ್ತೆಯಾಗಿತ್ತು ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.

ತಮ್ಮಿà ಸಂಶೋಧನೆಯ ಬಗ್ಗೆ ಟ್ವೀಟ್‌ ಮಾಡಿರುವ ಅಟ್ರೀ ಸಂಸ್ಥೆ, “ಸುಣ್ಣದಕಲ್ಲಿನ ಗಣಿಯ ತೇವಾಂಶವಿರುವ ಕಡೆ ಈ ಹೊಸ ಪ್ರಭೇದದ ಬಸವನಹುಳುಗಳು ಪತ್ತೆಯಾಗಿವೆ. ಆದರೆ, ಇವು ಸುಣ್ಣದಕಲ್ಲು ಇರುವ ಪ್ರಾಂತ್ಯಗಳಲ್ಲಿ ಮಾತ್ರ ಇರುತ್ತವೆಯೇ ಎಂಬುದು ಖಚಿತವಾಗಿಲ್ಲ’ ಎಂದಿದೆ.