ಮೀರಾಬಾಯಿ ಚಾನು : ಟೋಕಿಯೊಗೆ ಭಾರತದ ಏಕೈಕ ವೇಟ್‌ಲಿಫ್ಟರ್‌

ಹೊಸದಿಲ್ಲಿ : ಸಾಯಿಕೋಮ್‌ ಮೀರಾಬಾಯಿ ಚಾನು ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಲಿರುವ ಏಕೈಕ ವೇಟ್‌ಲಿಫ್ಟರ್‌ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಶನಿವಾರ ಅಂತಾರಾಷ್ಟ್ರೀಯ ವೇಟ್‌ಲಿಫ್ಟಿಂಗ್‌ ಫೆಡರೇಶನ್‌ ಪ್ರಕಟಿಸಿದ “ಅಬ್ಸಲ್ಯೂಟ್‌ ರ್‍ಯಾಂಕಿಂಗ್‌’ನಲ್ಲಿ ದ್ವಿತೀಯ ಸ್ಥಾನಕ್ಕೆ ಏರಿದ ಕಾರಣ ಮೀರಾಬಾಯಿ ಅವರಿಗೆ ಈ ಅವಕಾಶ ಲಭಿಸಿತು.

ಮಾಜಿ ವಿಶ್ವ ಚಾಂಪಿಯನ್‌ ಮೀರಾಬಾಯಿ ಚಾನು (49 ಕೆ.ಜಿ.) ಆರಂಭಿಕ ರ್‍ಯಾಂಕಿಂಗ್‌ನಲ್ಲಿ 4ನೇ ಸ್ಥಾನದಲ್ಲಿದ್ದರು. ಆದರೆ ಉತ್ತರ ಕೊರಿಯಾದ ಲಿಫ್ಟರ್ ಟೋಕಿಯೊ ಕೂಟದಿಂದ ಹಿಂದೆ ಸರಿದ ಕಾರಣ ಮೀರಾಬಾಯಿ ರ್‍ಯಾಂಕಿಂಗ್‌ ಯಾದಿಯಲ್ಲಿ ದ್ವಿತೀಯ ಸ್ಥಾನಕ್ಕೇರಿದರು.

ಇದನ್ನೂ ಓದಿ:ಕೋವಿಡ್ ಸಂಕಷ್ಟದಲ್ಲಿರುವವರ ನೆರವಿಗೆ ಯುವಿ “ಮಿಷನ್‌-1000 ಬೆಡ್‌’ ಅಭಿಯಾನ

ಇದು ಮೀರಾಬಾಯಿ ಚಾನು ಪಾಲಿನ ದ್ವಿತೀಯ ಒಲಿಂಪಿಕ್ಸ್‌. 2016ರ ರಿಯೋ ಕೂಟದಲ್ಲೂ ಅವರು ಭಾರತವನ್ನು ಪ್ರತಿನಿಧಿಸಿದ್ದರು. ಆದರೆ ಗಮನಾರ್ಹ ಸಾಧನೆಯನ್ನೇನೂ ದಾಖಲಿಸಿರಲಿಲ್ಲ.