ಸಾಂಪ್ರದಾಯಿಕ ಮಸಾಲ ಮ್ಯಾಕರೋನಿ ಪಾಸ್ತಾ

ಕಾಲ ಬದಲಾದಂತೆ ಜನರು ತಮ್ಮ ಜೀವನ ಶೈಲಿಯನ್ನು ಬದಲಾಯಿಸಿಕೊಳ್ಳುತ್ತಾರೆ. ಆಧುನಿಕತೆಗೆ ತಕ್ಕಂತೆ ಉಡುಗೆ ತೋಡುಗೆಗಳನ್ನು ಬದಲಾಯಿಸಿಕೊಳ್ಳುತ್ತಾರೆ ಅದರಂತೆ ಆಹಾರ ಪದ್ಧತಿಯಲ್ಲೂ ಜನರು ಆಧುನಿಕತೆಗೆ ಒಗ್ಗಿಕೊಳ್ಳುತ್ತಿದ್ದಾರೆ.

ಇಂದಿನ ಯುವ ಪೀಳಿಗೆಯಲ್ಲಿ ಇವುಗಳನ್ನು ಇಷ್ಟಪಡದವರು ಇಲ್ಲವೇ ಇಲ್ಲ ಅದುವೇ ”ಪಾಸ್ತಾ” . ಇದು ಸಾಂಪ್ರದಾಯಕ ಇಟಾಲಿಯನ್‌ ಪಾಕ ಪದ್ಧತಿಯ ಒಂದು ಪ್ರಧಾನ ಆಹಾರವಾಗಿದೆ. ಪಾಸ್ತಾ ನಮ್ಮ ಭಾರತೀಯರ ಆಹಾರ ಅಲ್ಲ ,ಆದರೆ ಅದು ಈಗ ಭಾರತೀಯರಿಗೂ ಚಿರಪರಿಚಿತ ತಿಂಡಿ ತಿನಿಸಾಗಿದೆ.

ಮಕ್ಕಳಿಂದ ಹಿರಿಯರವರೆಗೂ ಎಲ್ಲರೂ ಪಾಸ್ತಾವನ್ನು ಇಷ್ಟಪಟ್ಟು ತಿನ್ನುತ್ತಾರೆ. ನೀವು ಪಾಸ್ತಾ ತಿನ್ನಲು ಹೊಟೇಲ್‌ ಗೆ ಹೋಗಬೇಕಾಗಿಲ್ಲ ಮನೆಯಲ್ಲೇ ರುಚಿಕರವಾದ ಪಾಸ್ತಾ ವನ್ನು ತಯಾರಿಸಬಹುದಾಗಿದೆ. ಪಾಸ್ತಾವನ್ನು ಅನೇಕ ರುಚಿಯಲ್ಲಿ ಸ್ವಾದಿಷ್ಟಕರವಾಗಿ ಮಾಡಬಹುದು.ಆದರೆ ನಾವಿಲ್ಲಿ ಭಾರತೀಯ ಶೈಲಿಯ “ಮಸಾಲ ಮ್ಯಾಕರೋನಿ ಪಾಸ್ತಾ“ವನ್ನು ತಯಾರಿಸುವ ವಿಧಾನವನ್ನು ತಿಳಿಸುತ್ತಿದ್ದೇವೆ.

ಬೇಕಾಗುವ ಸಾಮಗ್ರಿಗಳು
ಮ್ಯಾಕರೋನಿ ಪಾಸ್ತಾ 1 ಕಪ್‌, ಈರುಳ್ಳಿ-1,ಟೊಮೆಟೋ 2,ಕ್ಯಾರೆಟ್‌ ಸ್ವಲ್ಪ,ಬೀನ್‌ ಸ್ವಲ್ಪ, ಹಸಿ ಮೆಣಸು-2, ಶುಂಠಿ ಸ್ವಲ್ಪ,ಬೆಳ್ಳುಳ್ಳಿ-3ರಿಂದ 5 ಎಸಳು, ಎಣ್ಣೆ-4 ಚಮಚ, ದೊಣ್ಣೆ ಮೆಣಸು (ಕ್ಯಾಪ್ಸಿಕಂ)- ಸ್ವಲ್ಪ, ಚಿಲ್ಲಿ ಸಾಸ್‌-2 ಚಮಚ,ಟೊಮೆಟೋ ಸಾಸ್‌ 2 ಚಮಚ, ನೀರು- 3ಕಪ್‌, ಚೀಸ್‌ ಸ್ವಲ್ಪ, ಕೊತ್ತಂಬರಿ ಸೊಪ್ಪು ಸ್ವಲ್ಪ, ರುಚಿಗೆ ತಕ್ಕಷ್ಟು ಉಪ್ಪು.

ತಯಾರಿಸುವ ವಿಧಾನ
– ಒಂದು ಪಾತ್ರೆಗೆ 2 ಕಪ್‌ ನೀರನ್ನು ಹಾಕಿ, ಮ್ಯಾಕರೋನಿ ಪಾಸ್ತಾವನ್ನು ಹಾಕಿ ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ,ಸುಮಾರು 6 ರಿಂದ 7 ನಿಮಿಷಗಳ ಕಾಲ ಬೇಯಿಸಿ.ನಂತರ ನೀರಿನಿಂದ ಪಾಸ್ತಾವನ್ನು ಬೇರ್ಪಡಿಸಿ ಬೇರೆ ಪಾತ್ರೆಗೆ ಹಾಕಿರಿ.
– ತದನಂತರ ಒಂದು ಬಾಣಲೆಗೆ ಎಣ್ಣೆಯನ್ನು ಹಾಕಿ ಶುಂಠಿ,ಬೆಳ್ಳುಳ್ಳಿ,ಈರುಳ್ಳಿ ,ಹಸಿಮೆಣಸು,ದೊಣ್ಣೆ ಮೆಣಸನ್ನು ಹಾಕಿ ಸ್ವಲ್ಪ ಹೊತ್ತು ಹುರಿಯಿರಿ.
-ನಂತರ ಟೊಮೆಟೋ,ಕ್ಯಾರೆಟ್‌,ಬೀನ್ಸ್‌ ನ್ನು ಹಾಕಿ 5ರಿಂದ 7 ನಿಮಿಷಗಳ ಕಾಲ ಬೇಯಿಸಿರಿ.
-ಆಮೇಲೆ ಚಿಲ್ಲಿ ಸಾಸ್‌, ಟೊಮೆಟೋ ಸಾಸ್‌,ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ ಸರಿಯಾಗಿ ಮಿಕ್ಸ್‌ ಮಾಡಿಕೊಳ್ಳಿ.
– ತದನಂತರ ಅದೇ ಬಾಣಲೆಗೆ ಬೇಯಿಸಿಟ್ಟ ಪಾಸ್ತಾವನ್ನು ಹಾಕಿ ಮಿಕ್ಸ್‌ ಮಾಡಿ.
– ಭಾರತೀಯ ಶೈಲಿಯ ಮಸಾಲ ಮ್ಯಾಕರೋನಿ ಪಾಸ್ತಾವನ್ನು ಚೀಸ್‌ ಮತ್ತು ಕೊತ್ತಂಬರಿ ಸೊಪ್ಪಿನೊಂದಿಗೆ ಅಲಂಕರಿಸಿರಿ.
-ರುಚಿಕರವಾದ ಮಸಾಲ ಮ್ಯಾಕರೋನಿ ಪಾಸ್ತಾ ಸವಿಯಲು ಸಿದ್ಧ.