ಟಿ-ಟ್ವೆಂಟಿ: 35 ಎಸೆತಗಳಲ್ಲಿ ಮಾರ್ಟಿನ್‌ ಗಪ್ಟಿಲ್‌ ಶತಕ

ಲಂಡನ್‌: ಇಂಗ್ಲಿಷ್‌ ಕೌಂಟಿಯಲ್ಲಿ ವೂರ್ಸೆಸ್ಟರ್‌ಶೈರ್‌ ಪರ ಆಡುತ್ತಿರುವ ನ್ಯೂಜಿಲ್ಯಾಂಡಿನ ಸ್ಫೋಟಕ ಆರಂಭಕಾರ ಮಾರ್ಟಿನ್‌ ಗಪ್ಟಿಲ್‌ ನಾರ್ಥಂಪ್ಟನ್‌ಶೈರ್‌ ವಿರುದ್ಧದ “ಟಿ20 ಬ್ಲಾಸ್ಟ್‌’ ಸರಣಿಯಲ್ಲಿ 35 ಎಸೆತಗಳಲ್ಲಿ ಶತಕ ಬಾರಿಸಿ ಸುದ್ದಿಯಾಗಿದ್ದಾರೆ. ಇದು ಟಿ20 ಇತಿಹಾಸದ 4ನೇ ಅತೀ ವೇಗದ ಶತಕವಾಗಿದೆ.

ಮಾರ್ಟಿನ್‌ ಗಪ್ಟಿಲ್‌ 38 ಎಸೆತಗಳಿಂದ 102 ರನ್‌ ಚಚ್ಚಿದರು (12 ಬೌಂಡರಿ, 7 ಸಿಕ್ಸರ್‌). ಇವರ ಸಾಹಸದಿಂದ ವೂರ್ಸೆಸ್ಟರ್‌ಶೈರ್‌ 9 ವಿಕೆಟ್‌ಗಳ ಪ್ರಚಂಡ ಗೆಲುವು ಸಾಧಿಸಿತು. 188 ರನ್‌ ಗುರಿಯನ್ನು ಬೆನ್ನುಹತ್ತಿದ್ದ ವೂರ್ಸೆಸ್ಟರ್‌ಶೈರ್‌ 7 ಓವರ್‌ಗಳಿರುವಂತೆಯೇ 9 ವಿಕೆಟ್‌ಗಳ ಜಯಭೇರಿ ಮೊಳಗಿಸಿತು. ಜೋ ಕ್ಲರ್ಕ್‌ 33 ಎಸೆತಗಳಿಂದ ಅಜೇಯ 61 ರನ್‌ ಬಾರಿಸಿದರು. 2013ರ ಐಪಿಎಲ್‌ನಲ್ಲಿ ಆರ್‌ಸಿಬಿಯ ಕ್ರಿಸ್‌ ಗೇಲ್‌ ಪುಣೆ  ವಿರುದ್ಧ 30 ಎಸೆತಗಳಲ್ಲಿ ಶತಕ ಸಿಡಿಸಿದ್ದು ಟಿ20 ದಾಖಲೆಯಾಗಿದೆ. ರೋಹಿತ್‌ ಶರ್ಮ,  ಮಿಲ್ಲರ್‌ ಕೂಡ 35 ಎಸೆತಗಳಲ್ಲಿ ಸೆಂಚುರಿ ಹೊಡೆದಿದ್ದಾರೆ.