ಹಾಕಿ: ಮನ್‌ಪ್ರೀತ್‌ ನಾಯಕ

ಹೊಸದಿಲ್ಲಿ: ಎಫ್ಐಎಚ್‌ ಪ್ರೊ ಲೀಗ್‌ ಹಾಕಿ ಕೂಟಕ್ಕೆ 20 ಸದಸ್ಯರ ಭಾರತ ತಂಡ ಪ್ರಕಟಗೊಂಡಿದೆ. ಸ್ಟಾರ್‌ ಮಿಡ್‌ಫೀಲ್ಡರ್‌, ಒಲಿಂಪಿಯನ್‌ ಕಪ್ತಾನ ಮನ್‌ಪ್ರೀತ್‌ ಸಿಂಗ್‌ ತಂಡವನ್ನು ಮುನ್ನಡೆಸಲಿದ್ದಾರೆ.

ಯುವ ಡ್ರ್ಯಾಗ್‌ಫ್ಲಿಕರ್‌ ಜುಗ್ರಾಜ್‌ ಸಿಂಗ್‌ ಮತ್ತು ಸ್ಟ್ರೈಕರ್‌ ಅಭಿಷೇಕ್‌ ಈ ತಂಡದ ಹೊಸ ಆಟಗಾರರು.

ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಕಂಚಿನ ಪದಕ ಗೆದ್ದ ತಂಡದಲ್ಲಿದ್ದ ಪಿ.ಆರ್‌. ಶ್ರೀಜೇಶ್‌, ಮನ್‌ದೀಪ್‌ ಸಿಂಗ್‌, ಸುರೇಂದರ್‌ ಕುಮಾರ್‌, ಹರ್ಮನ್‌ಪ್ರೀತ್‌ ಸಿಂಗ್‌, ಲಲಿತ್‌ ಕುಮಾರ್‌ ಉಪಾಧ್ಯಾಯ ತಂಡಕ್ಕೆ ಮರಳಿದ್ದಾರೆ. ಇವರಲ್ಲಿ ಡ್ರ್ಯಾಗ್‌ಫ್ಲಿಕರ್‌ ಹರ್ಮನ್‌ಪ್ರೀತ್‌ಗೆ ಉಪನಾಯಕತ್ವ ನೀಡಲಾಗಿದೆ.

ಸದ್ಯ ಬೆಂಗಳೂರಿನ ಸಾಯ್‌ ಕೇಂದ್ರದಲ್ಲಿರುವ ತಂಡ ಫೆ. 4ರಂದು ದಕ್ಷಿಣ ಆಫ್ರಿಕಾ ಪ್ರವಾಸ ತೆರಳಲಿದೆ. ಫೆ. 8ರಿಂದ 13ರ ವರೆಗೆ ಕೂಟ ನಡೆಯಲಿದೆ. ಇಲ್ಲಿ ದಕ್ಷಿಣ ಆಫ್ರಿಕಾ, ಫ್ರಾನ್ಸ್‌ ಮತ್ತು ಭಾರತ ಮುಖಾಮುಖೀಯಾಗಲಿವೆ.