Manipur: ಸ್ನೈಪರ್‌ಗಳಿಂದ ಹಿರಿಯ ಪೊಲೀಸ್‌ ಅಧಿಕಾರಿ ಹತ್ಯೆ

ಇಂಫಾಲ/ನವದೆಹಲಿ: ಈಶಾನ್ಯ ಮಣಿಪುರದಲ್ಲಿ ಶಂಕಿತ ಕುಕಿ ಉಗ್ರಗಾಮಿಗಳು ರಾಜ್ಯ ಪೊಲೀಸ್‌ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರನ್ನು ಗುಂಡು ಹಾರಿಸಿ ಕೊಂದಿದ್ದಾರೆ. ಮಯೆನ್ಮಾರ್‌ ಗಡಿ ಸಮೀಪ ಇರುವ ಬಿಎಸ್‌ಎಫ್ನ ಹೆಲಿಪ್ಯಾಡ್‌ ಸಮೀಪ ಈ ಘಟನೆ ನಡೆದಿದೆ. ಉಪ ವಿಭಾಗಾಧಿಕಾರಿ ಮಟ್ಟ (ಎಸ್‌ಡಿಪಿಒ) ಪೊಲೀಸ್‌ ಅಧಿಕಾರಿ ಚಿಂಗ್‌ತಾಮ್‌ ಆನಂದ್‌ ಎಂಬುವರನ್ನು ಸ್ನೆ„ಪರ್‌ಗಳು (ದೂರದ ಸ್ಥಳದಿಂದ ಗುರಿ ಇಟ್ಟು ಗುಂಡು ಹಾರಿಸುವವರು ) ಕೊಂದಿದ್ದಾರೆ.

ಮಯೆನ್ಮಾರ್‌ಗೆ ಹೊಂದಿಕೊಂಡಿರುವ ಮಣಿಪುರದ ಮೊರೆ ಎಂಬಲ್ಲಿ ಈ ಘಟನೆ ನಡೆದಿದೆ. ಹೊಸತಾಗಿ ನಿರ್ಮಾಣವಾಗಿರುವ ಹೆಲಿಪ್ಯಾಡ್‌ ಅನ್ನು ಪರೀಕ್ಷಿಸುತ್ತಿರುವ ಸಂದರ್ಭದಲ್ಲಿ ಗುಂಡು ಹಾರಾಟದ ಘಟನೆ ನಡೆದಿದೆ. ಮೊರೆ ಎಂಬ ಪಟ್ಟಣದಿಂದ ಮಣಿಪುರ ರಾಜ್ಯ ಪೊಲೀಸ್‌ ಅಧಿಕಾರಿಗಳನ್ನು ಹೊರ ಕಳುಹಿಸಬೇಕು ಎಂಬ ಬೇಡಿಕೆಯ ನಡುವೆಯೇ ಈ ಘಟನೆ ನಡೆದಿದೆ. ಈ ಹಿನ್ನೆಲೆಯಲ್ಲಿ ಇಂಫಾಲದಲ್ಲಿ ಸಿಎಂ ಎನ್‌.ಬೀರೇನ್‌ ಸಿಂಗ್‌ ನೇತೃತ್ವದಲ್ಲಿ ಸಭೆ ನಡೆದು, ಪರಿಸ್ಥಿತಿಯ ಬಗ್ಗೆ ಪರಾಮರ್ಶೆ ನಡೆಸಲಾಯಿತು.

ಮೇನಿಂದ ನಡೆಯುತ್ತಿರುವ ಹಿಂಸಾಕೃತ್ಯಗಳಲ್ಲಿ ಕನಿಷ್ಠ 180 ಮಂದಿ ಅಸುನೀಗಿ, 60 ಸಾವಿರಕ್ಕೂ ಅಧಿಕ ಮಂದಿ ನೆಲೆ ಕಳೆದುಕೊಂಡಿದ್ದಾರೆ.