ಕಲ್ಲು ತೂರಾಟ: ವಂದೇ ಭಾರತ್‌ ಕಿಟಕಿ ಗಾಜಿಗೆ ಹಾನಿ

ರಾಯ್ಪುರ: ಇತ್ತೀಚೆಗಷ್ಟೇ ಉದ್ಘಾಟನೆಗೊಂಡ ನಾಗ್ಪುರ-ಬಿಲಾಸ್ಪುರ ವಂದೇ ಭಾರತ್‌ ಎಕ್ಸ್‌ಪ್ರೆಸ್‌ ರೈಲಿನ ಮೇಲೆ ಛತ್ತೀಸ್‌ಗಡದಲ್ಲಿ ದುಷ್ಕರ್ಮಿಯೊಬ್ಬ ಕಲ್ಲು ತೂರಿದ ಪರಿಣಾಮ, ರೈಲಿನ ಕಿಟಕಿಯ ಗಾಜು ಒಡೆದುಹೋಗಿದೆ.

ರಾಯ್ಪುರ ವಿಭಾಗದ ದುರ್ಗ್‌ ಮತ್ತು ಭಿಲಾಯಿ ನಗರ ರೈಲ್ವೆ ನಿಲ್ದಾಣದ ಮಧ್ಯೆ ಈ ಘಟನೆ ನಡೆದಿದೆ. ಕಳೆದ ಭಾನುವಾರವಷ್ಟೇ ಈ ರೈಲಿಗೆ ಪ್ರಧಾನಿ ನರೇಂದ್ರ ಮೋದಿ ಚಾಲನೆ ನೀಡಿದ್ದರು. ಬುಧವಾರ ಸಂಜೆ ರೈಲು ಬಿಲಾಸ್ಪುರದ ಕಡೆಗೆ ಸಂಚರಿಸುತ್ತಿದ್ದಾಗ, ಹೊರಗಿನಿಂದ ಯಾರೋ ಕಲ್ಲು ತೂರಿದ ಕಾರಣ ಕಿಟಕಿ ಗಾಜು ಒಡೆದಿದೆ. ಒಳಗಿದ್ದ ಯಾರಿಗೂ ಗಾಯಗಳಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.