ಮಲ್ಲಾರು: ಸಿಡಿಲು ಬಡಿದು ಮಹಿಳೆಗೆ ಗಾಯ

ಕಾಪು: ಕಾಪು ಪುರಸಭಾ ವ್ಯಾಪ್ತಿಯ ಮಲ್ಲಾರು ಗ್ರಾಮದ ಗುಡ್ಡೆಕೇರಿಯಲ್ಲಿ ಸೋಮವಾರ ರಾತ್ರಿ ಮನೆಗೆ ಸಿಡಿಲು ಬಡಿದು ಮಹಿಳೆ ಗಾಯಗೊಂಡು, ಲಕ್ಷಾಂತರ ರೂ. ಮೌಲ್ಯದ ಸೊತ್ತು ನಷ್ಟ ಉಂಟಾಗಿದೆ.

ಮಲ್ಲಾರು ಗುಡ್ಡೆಕೇರಿ ನಿವಾಸಿ ಝಾಕಿರಾ ಬಾನು ಗಾಯಾಳುವಾಗಿದ್ದು, ಅವರು ಅಡುಗೆ ಕೋಣೆಯಲ್ಲಿದ್ದಾಗ ಸಿಡಿಲು ಬಡಿದಿದೆ. ಸಿಡಿಲಿನ ರಭಸಕ್ಕೆ ಝಾಕಿರಾ ಬಾನು ಅವರ ತಲೆಗೆ ಏಟಾಗಿದೆ.

ಸಿಡಿಲು ಅಪ್ಪಳಿಸಿದ ಪರಿಣಾಮ ಮನೆಯ ವಿದ್ಯುತ್‌ ವಯರಿಂಗ್‌ ಸಂಪೂರ್ಣ ಸುಟ್ಟು ಹೋಗಿದ್ದು, ಮನೆಯ ಗೋಡೆ ಬಿರುಕು ಬಿಟ್ಟಿದೆ. ಘಟನೆಯ ಸಂದರ್ಭ ಝಾಕಿರಾ ಬಾನು ಅವರ ಮಗಳು ಹಾಗೂ ಮೊಮ್ಮಕ್ಕಳು ಮತ್ತೂಂದು ಕೋಣೆಯಲ್ಲಿದ್ದ ಕಾರಣ ಹೆಚ್ಚಿನ ತೊಂದರೆ ಯುಂಟಾಗಿಲ್ಲ.

ಕಾಪು ಪುರಸಭೆ ಉಪಾಧ್ಯಕ್ಷ ಎಚ್‌. ಉಸ್ಮಾನ್‌, ಮುಖ್ಯಾಧಿಕಾರಿ ರಾಯಪ್ಪ, ಗ್ರಾಮ ಕರಣಿಕ ಮತಾಯಿ ಪಿ.ಎಂ., ಪುರಸಭಾ ಸದಸ್ಯರಾದ ಇಮ್ರಾನ್‌, ಮಾಲಿನಿ ಹಾನಿ ಪರಿಶೀಲಿಸಿದ್ದಾರೆ.