Macau Open 2024: ಮಕಾವು ಬ್ಯಾಡ್ಮಿಂಟನ್‌: ಶ್ರೀಕಾಂತ್‌, ಆಯುಷ್‌ ಮುನ್ನಡೆ

ಮಕಾವು (ಚೀನ): ಮಕಾವು ಓಪನ್‌ ಸೂಪರ್‌-300 ಬ್ಯಾಡ್ಮಿಂಟನ್‌ ಪಂದ್ಯಾವಳಿಯಲ್ಲಿ ಭಾರತದ ಶಟ್ಲರ್‌ಗಳಾದ ಕೆ. ಶ್ರೀಕಾಂತ್‌, ಆಯುಷ್‌ ಶೆಟ್ಟಿ, ತಸ್ನಿಮ್‌ ಮಿರ್‌ ದ್ವಿತೀಯ ಸುತ್ತಿಗೆ ಮುನ್ನಡೆದಿದ್ದಾರೆ.

4 ತಿಂಗಳ ಬಳಿಕ ಅಂಕಣಕ್ಕಿಳಿದ ಶ್ರೀಕಾಂತ್‌ ಇಸ್ರೇಲ್‌ನ ಡ್ಯಾನಿಲ್‌ ಡುಬೊವೆಂಕೊ ಅವರನ್ನು 21-14, 21-15 ಅಂತರದಿಂದ ಪರಾಭವಗೊಳಿಸಿದರು. 2023ರ ವಿಶ್ವ ಜೂನಿಯರ್‌ ಚಾಂಪಿಯನ್‌ಶಿಪ್‌ನಲ್ಲಿ ಕಂಚಿನ ಪದಕ ಜಯಿಸಿದ್ದ ಆಯುಷ್‌ ಶೆಟ್ಟಿ ಭಾರತದ ಮತ್ತೋರ್ವ ಆಟಗಾರ ಆಲಾಪ್‌ ಮಿಶ್ರಾ ಅವರನ್ನು 21-13, 21-5ರಿಂದ ಮಣಿಸಿದರು. ದ್ವಿತೀಯ ಸುತ್ತಿನಲ್ಲಿ ಶ್ರೀಕಾಂತ್‌-ಆಯುಷ್‌ ಮುಖಾಮುಖೀ ಆಗಲಿದ್ದಾರೆ.

ವನಿತಾ ಸಿಂಗಲ್ಸ್‌ನಲ್ಲಿ ತಸ್ನಿಮ್‌ ಮಿರ್‌ ತಮ್ಮದೇ ದೇಶದ ದೇವಿಕಾ ಸಿಹಾಗ್‌ ಅವರನ್ನು 15-21, 21-18, 22-20ರಿಂದ ಹಿಮ್ಮೆಟ್ಟಿಸುವಲ್ಲಿ ಯಶಸ್ವಿಯಾದರು. ಇವರ ಮುಂದಿನ ಎದುರಾಳಿ ಜಪಾನ್‌ನ ಟೊಮೋಕಾ ಮಿಯಾಝಾಕಿ.