ರೈಲ್ವೇ ಟ್ಯಾಂಕರ್‌ನಲ್ಲಿ ಗ್ಯಾಸ್‌ ಸಾಗಾಟದ ವೇಳೆ ಸೋರಿಕೆ; ವಾಪಸ್‌ ನಿಲ್ದಾಣಕ್ಕೆ

ಸುರತ್ಕಲ್‌: ಇಲ್ಲಿನ ಎಚ್‌ಪಿಸಿಎಲ್‌ನಿಂದ ರೈಲ್ವೇ ಟ್ಯಾಂಕರ್‌ ಮೂಲಕ ಗ್ಯಾಸ್‌ ಸಾಗಾಟದ ವೇಳೆ ಸೋರಿಕೆಯಾದ ಬಗ್ಗೆ ವರದಿಯಾಗಿದ್ದು, ತತ್‌ಕ್ಷಣ ಟ್ಯಾಂಕರನ್ನು ಹಿಂದಕ್ಕೆ ಕರೆಸಿಕೊಳ್ಳಲಾಗಿದೆ. ಏಳೆಂಟು ಕಿಮೀ ಸಾಗಿದ ಮೇಲೆ ಇದು ಗಮನಕ್ಕೆ ಬಂದಿದ್ದು, ರೈಲು ನಿಲ್ದಾಣಕ್ಕೆ ವಾಪಸ್‌ ಬಂದಿದೆ. ಆ ಸಂದರ್ಭ ಜೋಕಟ್ಟೆ ರೈಲ್ವೇ ಗೇಟ್‌ ಬಳಿ ಜನರನ್ನು ದೂರ ಸರಿಸಲಾಗಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದು, ಅಗ್ನಿಶಾಮಕ ದಳದ ಒಂದು ವಾಹನವನ್ನು ಸನ್ನದ್ಧ ಸ್ಥಿತಿಯಲ್ಲಿ ಇರಿಸಲಾಗಿತ್ತು. ಸ್ವಲ್ಪ ಕಾಲ ಜೋಕಟ್ಟೆ ಸುತ್ತಮುತ್ತ ಆತಂಕದ ವಾತಾವರಣ ಕಂಡು ಬಂತು ಎಂದು ಮೂಲಗಳು ತಿಳಿಸಿವೆ.