ಪೆಟ್ರೋಲ್‌ ಬಂಕ್‌ನಲ್ಲಿ ಖಾದಿ ಅಂಗಡಿ

ಹೊಸದಿಲ್ಲಿ: ದೇಶದಲ್ಲಿ ಖಾದಿ ಉದ್ಯಮಕ್ಕೆ ಉತ್ತೇಜನ ನೀಡುವ ನಿಟ್ಟಿನಲ್ಲಿ ಖಾದಿ ಮತ್ತು ಗ್ರಾಮೋದ್ಯೋಗ ಆಯೋಗ (ಕೆವಿಐಸಿ)ವು ಇಂಡಿಯನ್‌ ಆಯಿಲ್‌ ಸಂಸ್ಥೆಯೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದು, ಪೆಟ್ರೋಲ್‌ ಬಂಕ್‌ಗಳಲ್ಲಿಯೂ ಖಾದಿ ಅಂಗಡಿಗಳನ್ನು ತೆರೆದಿದೆ.

ದೇಶದ ನಾಲ್ಕು ಪ್ರಮುಖ ನಗರಗಳ 4 ಪೆಟ್ರೋಲ್‌ ಬಂಕ್‌ಗಳಲ್ಲಿ ಈ ಅಂಗಡಿ ತೆರೆಯಲಾಗಿದೆ. ರುದ್ರಾಪುರ, ಅಹ್ಮದಾಬಾದ್‌, ಔರಂಗಾಬಾದ್‌ ಮತ್ತು ಪುಣೆಯ ಪೆಟ್ರೋಲ್‌ ಬಂಕ್‌ನಲ್ಲಿ ಖಾದಿ ಅಂಗಡಿಯನ್ನು ಆ.15ರಂದು ಕೆವಿಐಸಿ ಉದ್ಘಾಟಿಸಿದೆ. ಜತೆಗೆ 50 ಪ್ರಮುಖ ರೈಲು ನಿಲ್ದಾಣಗಳಲ್ಲಿಯೂ ಆ.14ರಂದು ಖಾದಿ ಅಂಗಡಿ ತೆರೆಯಲಾಗಿದೆ.