ಒಂದು ವರ್ಷದಲ್ಲಿ ಕೊಂಕಣ್‌ ರೈಲು ವಿದ್ಯುದೀಕರಣ

ಪಣಜಿ: ಕೊಂಕಣ ರೈಲು ಸೇವೆಯನ್ನು ಮುಂದಿನ ಒಂದು ವರ್ಷದೊಳಗೆ ವಿದ್ಯುದೀಕರಣಗೊಳಿಸಲಾಗುವುದು ಎಂದು ಕೇಂದ್ರ ರೈಲ್ವೇ ಸಚಿವ ಪಿಯೂಶ್‌ ಗೋಯಲ್‌ ಹೇಳಿದ್ದಾರೆ. ವಿದ್ಯುತ್‌ ಶಕ್ತಿಯನ್ನು ಉಪಯೋಗಿಸುವುದರಿಂದ ಮಾಲಿನ್ಯ ನಿಯಂತ್ರಣವಾಗಲಿದೆ ಎಂದು ಸಚಿವರು ಹೇಳಿದ್ದಾರೆ. ಇಲ್ಲದಿದ್ದರೆ ಡೀಸೆಲ್‌ ಎಂಜಿನ್‌ಗಳನ್ನು ಬಳಸುವುದರಿಂದ ಇದು ಮಾಲಿನ್ಯಗಳನ್ನು ಹೊರಗೆ ಬಿಡುತ್ತದೆ ಎಂದು ಅವರು ಹೇಳಿದ್ದಾರೆ.

ಗೋವಾ ರಾಜ್ಯವನ್ನು ಮಾಲಿನ್ಯ ಮುಕ್ತ ರಾಜ್ಯವನ್ನಾಗಿ ಮಾಡುವ ಸಂಕಲ್ಪವೂ ಕೇಂದ್ರ ಸರಕಾರದ ಮುಂದಿದೆ ಎಂದು ಅವರು ಹೇಳಿದ್ದಾರೆ. ಒಮ್ಮೆ ಗೋವಾ ರಾಜ್ಯವನ್ನು ಮಾಲಿನ್ಯ ಮುಕ್ತ ನಗರವನ್ನಾಗಿಸಿದ ಬಳಿಕ ಮತ್ತೆ ಆ ಮಾರ್ಗದಲ್ಲಿ ಡೀಸೆಲ್‌ ಎಂಜಿನ್‌ ಅನ್ನು ಓಡಿಸಲು ಸಾಧ್ಯವಿಲ್ಲ. ಈ ನಿಟ್ಟಿನಲ್ಲಿ ಇಡೀ ಕೊಂಕಣ ರೈಲ್ವೆ ವಲಯವನ್ನು ವಿದ್ಯುತ್‌ ರೈಲುಗಳಾಗಿ ಬದಲಾವಣೆ ಮಾಡಿಕೊಂಡರೆ ಗೋವಾವನ್ನು ಮಾಲಿನ್ಯ ಮುಕ್ತ ರಾಜ್ಯವನ್ನಾಗಿಸಬಹುದಾಗಿದೆ.

ಗೋವಾದ ಪ್ರವಾಸೋದ್ಯಮವನ್ನು ಉತ್ತೇಜಿಸುವ ಸಲುವಾಗಿ ಈಗಾಗಲೇ ಶಿಮ್ಲಾದಲ್ಲಿ ಆರಂಭಗೊಂಡಿರುವ ‘ವಿಸ್ಟಾ ಡೋಮ್‌’ ರೈಲು ಸೇವೆಯನ್ನು ಗೋವಾದಲ್ಲೂ ಪ್ರಾರಂಭಿಸುವ ಸಾಧ್ಯತೆ ಇದೆ. ‘ವಿಸ್ಟಾ ಡೋಮ್‌’ ರೈಲುಗಳೆಂದರೆ ರೈಲಿನ ಎಡ-ಬಲ ಮತ್ತು ಮೇಲಿನ ಭಾಗ ಪೂರ್ತಿ ಗಾಜಿನಿಂದ ಮುಚ್ಚಿರಲಿದೆ. ಇದು ಪ್ರವಾಸೋದ್ಯಮಕ್ಕೆ ಇನ್ನಷ್ಟು ಉತ್ತೇಜನ ನೀಡಲಿದೆ.