ಚಿತ್ರೋತ್ಸವಗಳಲ್ಲಿ ‘ಕೋಳಿ ಎಸ್ರು’ ಮಿಂಚು

ಇದೇ ಆಗಸ್ಟ್‌ ನಲ್ಲಿ ಆಸ್ಟ್ರೇಲಿಯಾದ “ಮೆಲ್ಬೋರ್ನ್ ಇಂಡಿಯನ್‌ ಚಿತ್ರೋತ್ಸವ’ದಲ್ಲಿ ಕನ್ನಡದ “ಕೋಳಿ ಎಸ್ರು’ ಸಿನಿಮಾ ಪ್ರದರ್ಶನವಾಗಲಿದೆ. ಕಾ. ತಾ ಚಿಕ್ಕಣ್ಣನವರ ಕತೆಯಾಧಾರಿತ “ಕೋಳಿ ಎಸ್ರು’ ಸಿನಿಮಾಕ್ಕೆ ಚಂಪಾ ಪಿ ಶೆಟ್ಟಿಯವರ ನಿರ್ದೇಶನವಿದ್ದು, “ಏಪ್ರಾನ್‌ ಪ್ರೊಡಕ್ಷನ್ಸ್‌’ ಸಂಸ್ಥೆ ಈ ಸಿನಿಮಾವನ್ನು ನಿರ್ಮಿಸಿದೆ.

ಇನ್ನು ಈ ಬಾರಿಯ “ಮೆಲ್ಬೋರ್ನ್ ಇಂಡಿಯನ್‌ ಚಿತ್ರೋತ್ಸವ’ದಲ್ಲಿ “ಅತ್ಯುತ್ತಮ ನಟಿ ಪ್ರಶಸ್ತಿ’ಗೆ ಭಾರತೀಯ ಚಿತ್ರರಂಗದಿಂದ ಐಶ್ವರ್ಯಾ ರೈ, ಆಲಿಯಾ ಭಟ್‌, ಕಾಜೊಲ…, ಸಾಯಿಪಲ್ಲವಿ, ನೀನಾ ಗುಪ್ತ, ರಾಣಿ ಮುಖರ್ಜಿ ಮುಂತಾದ ಖ್ಯಾತ ನಟಿಯರು ನಾಮಿನೇಟ್‌ ಆಗಿದ್ದು, ಈ ಪಟ್ಟಿಯಲ್ಲಿ “ಕೋಳಿ ಎಸ್ರು’ ಸಿನಿಮಾದಲ್ಲಿನ ಅಭಿನಯಕ್ಕಾಗಿ ನಟಿ ಅಕ್ಷತಾ ಪಾಂಡವಪುರ “ಅತ್ಯುತ್ತಮ ನಟಿ ಪ್ರಶಸ್ತಿ’ಗೆ ನಾಮ ನಿರ್ದೇಶನವಾಗುವ ಮೂಲಕ ಸ್ಥಾನ ಪಡೆದುಕೊಂಡಿದ್ದಾರೆ.

ಇತ್ತೀಚೆಗೆ ನಡೆದ ಕೆನಡಾದ “ಒಟ್ಟಾವ ಇಂಡಿಯನ್‌ ಫಿಲ್ಮ್ ಫೆಸ್ಟಿವಲ್’ನಲ್ಲಿ ಕೂಡ “ಕೋಳಿ ಎಸ್ರು’ ಸಿನಿಮಾ ಪ್ರದರ್ಶನಗೊಂಡಿತ್ತು. ಇದರಲ್ಲಿ ನಿರ್ದೇಶಕಿ ಚಂಪಾಶೆಟ್ಟಿ ಅವರಿಗೆ “ಅತ್ಯುತ್ತಮ ನಿರ್ದೇಶಕಿ ಪ್ರಶಸ್ತಿ’ ಮತ್ತು ಅಕ್ಷತಾ ಪಾಂಡವಪುರ ಅವರಿಗೆ “ಅತ್ಯುತ್ತಮ ನಟಿ ಪ್ರಶಸ್ತಿ’ ದೊರಕಿತ್ತು.