ಕೋಡಿಬೆಂಗ್ರೆ ಹಂಗಾರಕಟ್ಟೆ ಬಂದರು: ಇಂದಿನಿಂದ ಮೀನುಗಾರಿಕೆ ಆರಂಭ

ಮಲ್ಪೆ: ಕೋಡಿಬೆಂಗ್ರೆ ಹಂಗಾರಕಟ್ಟೆ ಬಂದರಿನಲ್ಲಿ ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಸ್ಥಗಿತಗೊಂಡಿದ್ದ ಯಾಂತ್ರಿಕ ಮೀನುಗಾರಿಕೆ ಜಿಲ್ಲಾಡಳಿತದ ಅನುಮತಿ ಯೊಂದಿಗೆ ಮೀನುಗಾರಿಕೆ ಇಲಾಖೆ ವಿಧಿಸಿದ ನಿಯಮಾವಳಿಗೆ ಅನುಸಾರವಾಗಿ ಟ್ರಾಲ್‌ ಬೋಟುಗಳು ಸೋಮವಾರದಿಂದ ಕಡಲಿಗಿಳಿಯಲಿವೆ.

ಈಗಾಗಲೇ ಮೀನು ಮಾರಾಟ ಫೆಡರೇಶನ್‌ ನೇತೃತ್ವದಲ್ಲಿ ಕೋಡಿಬೆಂಗ್ರೆ ಮತ್ತು ಹಂಗಾರಕಟ್ಟೆ ಬಂದರಿನಲ್ಲಿ ಮೀನುಗಾರಿಕೆ ಇಲಾಖೆಯಿಂದ ಅನುಮತಿ ಪಡೆದ ನಿಗದಿತ ಟ್ರಾಲ್‌ಬೋಟುಗಳು ಮೀನು ಗಾರಿಕೆ ನಡೆಸಲು ಸಿದ್ದತೆ ನಡೆಸುತ್ತಿದೆ. ಸಾಮಾಜಿಕ ಅಂತರವನ್ನು ಕಾಯ್ದುಕೊಳ್ಳಲು ಸ್ಥಳಗಳನ್ನು ಗುರುತಿಸಲಾಗುತ್ತಿದ್ದು, ಮೀನುಗಾರಿಕೆ ನಡೆಸುವಾಗ ಮಾಸ್ಕ್ ಗಳನ್ನು ಖಡ್ಡಾಯವಾಗಿ ಧರಿಸುವಂತೆ ಸೂಚಿಸಲಾಗಿದೆ.

ಬಂದರಿನಲ್ಲಿ ಸುಮಾರು 50ರಷ್ಟು ಸಣ್ಣ ಟ್ರಾಲ್‌ಬೋಟುಗಳು ಇವೆ. ಮೀನುಗಾರಿಕೆ ತೆರಳಲು ಇಲಾಖೆಯಲ್ಲಿ ಪಾಸ್‌ ದೊರೆತ ಬೋಟುಗಳು ಕಡಲಿಗೆ ಇಳಿಯಲಿವೆ ಎಂದು ಕೋಡಿಬೆಂಗ್ರೆ ಹಂಗಾರಕಟ್ಟೆ ಯಾಂತ್ರಿಕ ಮೀನುಗಾರ ಸಂಘದ ಅಧ್ಯಕ್ಷ ಬಿ.ಬಿ. ಕಾಂಚನ್‌ ತಿಳಿಸಿದ್ದಾರೆ.

ಬಹಿರೊಂಗ ಹರಾಜು ನಿಷೇಧ
ಸಾಮಾಜಿಕ ಅಂತರವನ್ನು ಕಾಯ್ದುಕೊಳ್ಳುವ ಉದ್ದೇಶದಿಂದ ಬಂದರಿನಲ್ಲಿ ಬಹಿರಂಗ ಹರಾಜು ಮಾಡುವುದನ್ನು ನಿಷೇಧಿಸಿದೆ. ಬೋಟುಗಳಿಂದ ತಂದ ಮೀನನ್ನು ಫೆಡರೇಶನ್‌ ಮೂಲಕವೇ ಖರೀದಿಸಿ ಮಾರಾಟ ಮಾಡಲಾಗುವುದು.
 -ಯಶ್‌ಪಾಲ್‌ ಎ. ಸುವರ್ಣ, ಅಧ್ಯಕ್ಷರು ಮೀನು ಮಾರಾಟ ಫೆಡರೇಶನ್‌