ಸಾಕ್ಷರತಾ ಪರೀಕ್ಷೆ ಬರೆದ 90ರ ಅಜ್ಜಿ!

ತಿರುವನಂತಪುರ: ನಗರದಲ್ಲಿ ಬದುಕು ಕಟ್ಟಿಕೊಂಡಿರುವ ಅನೇಕ ಮಂದಿ ತಮ್ಮ ಇಳಿ ವಯಸ್ಸಿನಲ್ಲೂ ಓದಿ, ಪರೀಕ್ಷೆ ಬರೆದಿರುವುದು ಆಗಾಗ ಸುದ್ದಿಯಾಗುತ್ತಿರುತ್ತದೆ. ಆದರೆ ಇಲ್ಲಿನ ಬುಡಕಟ್ಟು ಮಹಿಳೆಯೊಬ್ಬರು 90ನೇ ವರ್ಷದಲ್ಲಿ ಸಾಕ್ಷರತಾ ಪರೀಕ್ಷೆ ಬರೆದು ಅಚ್ಚರಿ ಮೂಡಿಸಿದ್ದಾರೆ.

ಕೇರಳದ ಬುಡಕಟ್ಟು ಸಮುದಾಯಕ್ಕೆ ಸೇರಿದ ಮಾಕ್ಕಾ ಇಳಿವಯಸ್ಸಿನಲ್ಲಿ ಪರೀಕ್ಷೆ ಬರೆದ ಮಹಿಳೆ. ವಯನಾಡ್‌ನ‌ಲ್ಲಿ ಕೇರಳ ಸಾಕ್ಷರತಾ ಮಿಷನ್‌ ಪ್ರಾಧಿಕಾರ ನಡೆಸಿರುವ ಸಾಕ್ಷರತಾ ಯೋಜನೆಯಡಿ ಪರೀಕ್ಷೆ ಬರೆದ 4500 ಮಂದಿಯಲ್ಲಿ ಈ ಅಜ್ಜಿ ಕೂಡ ಒಬ್ಬರು. ಮಾಕ್ಕಾ ಅವರಿಗೆ ಸಾಕ್ಷರತಾ ಯೋಜನೆಯ ಮೊದಲ ಪರೀಕ್ಷೆ ಇದಾಗಿದೆ. ಮಾಕ್ಕಾ ಕೇರಳ ಬುಡಕಟ್ಟು ಸಮುದಾಯದಲ್ಲೇ ಅತಿ ಹಿರಿಯ ಮಹಿಳೆ. ಅಂತೆಯೇ 16 ವರ್ಷದ ಲಕ್ಷ್ಮೀ ಎಂಬಾಕೆ ಈ ಪರೀಕ್ಷೆ ಬರೆದ ಕಿರಿಯ ಅಭ್ಯರ್ಥಿ. ಓದು, ಬರವಣಿಗೆ ಹಾಗೂ ಗಣಿತ ವಿಷಯಗಳ ಮೇಲೆ ಪರೀಕ್ಷೆ ಇರಲಿದ್ದು, ತಲಾ 100 ಅಂಕಗಳ ಪರೀಕ್ಷೆ ಇದಾಗಿರಲಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.