ಸುದೀಪ್‌ ನಿರ್ದೇಶಿಸಿ, ನಟಿಸಿರುವ “ಕೆಂಪೇಗೌಡ’ ಚಿತ್ರ ಹಿಟ್‌ ಆಗುತ್ತಿದ್ದಂತೆ, “ಕೆಂಪೇಗೌಡ-2′ ಸಿನಿಮಾ ಬರುತ್ತದೆ ಎಂಬ ಸುದ್ದಿ ಓಡಾಡುತ್ತಲೇ ಇತ್ತು. ಆದರೆ, ಯಾವಾಗ ಸೆಟ್ಟೇರುತ್ತದೆ ಎಂಬ ಬಗ್ಗೆ ಮಾಹಿತಿ ಇರಲಿಲ್ಲ. ಈಗ ಬಹುತೇಕ ಅಂತಿಮವಾಗಿದೆ. ಇದೇ ಶುಕ್ರವಾರದಂದು “ಕೆಂಪೇಗೌಡ-2′ ಚಿತ್ರ ಲಾಂಚ್‌ ಆಗುತ್ತಿದೆ. “ಕೆಂಪೇಗೌಡ’ ಚಿತ್ರ ನಿರ್ಮಿಸಿದ ಶಂಕರೇಗೌಡ ಅವರೇ “ಕೆಂಪೇಗೌಡ-2′ ಚಿತ್ರವನ್ನು ಮಾಡುತ್ತಿದ್ದಾರೆ.
ಹಾಗಾದರೆ, ಸುದೀಪ್‌ ಅವರೇ “ಕೆಂಪೇಗೌಡ-2’ನಲ್ಲಿ ಮುಂದುವರೆಯುತ್ತಾರಾ ಎಂಬ ಕುತೂಹಲವಂತೂ ಅನೇಕರಿಗಿದೆ. ಆದರೆ, ಚಿತ್ರತಂಡ ಮಾತ್ರ ನಿರ್ದೇಶಕರಿಂದ ಹಿಡಿದು ನಾಯಕ-ನಟರವರೆಗೆ ಎಲ್ಲವನ್ನು ಗೌಪ್ಯವಾಗಿಟ್ಟಿದೆ. ಮೂಲಗಳ ಪ್ರಕಾರ, ಶಂಕರೇಗೌಡ ಅವರು ನಿರ್ಮಿಸುತ್ತಿರುವ “ಕೆಂಪೇಗೌಡ-2′ ಚಿತ್ರದಲ್ಲಿ ಸುದೀಪ್‌ ನಟಿಸುತ್ತಿಲ್ಲ. ಬದಲಾಗಿ ಬೇರೆ ನಾಯಕ ನಟರೊಬ್ಬರು ಪೊಲೀಸ್‌ ಆಗಿ ಅಬ್ಬರಿಸಲಿದ್ದಾರೆಂಬುದು ಗಾಂಧಿನಗರದ ಮಾಹಿತಿ.
ಹಾಗಂತ ಯಾರು ಎಂಬುದನ್ನು ತಿಳಿಯುವ ಕುತೂಹಲಕ್ಕೆ ಇನ್ನೂ ಸ್ವಲ್ಪ ದಿನ ಕಾಯಲೇಬೇಕು. ಒಂದು ದೊಡ್ಡ ಗ್ಯಾಪ್‌ನ ನಂತರ ಮತ್ತೆ ನಿರ್ಮಾಣಕ್ಕೆ ಮರಳಿರುವ ಶಂಕರೇಗೌಡ ಈ ಬಾರಿ ಇನ್ನೊಂದು ಬಿಗ್‌ ಬಜೆಟ್‌ ಸಿನಿಮಾ ನಿರ್ಮಿಸಲು ಯೋಜನೆ ಹಾಕಿಕೊಂಡಿದ್ದಾರೆ. ಬೇಗನೇ ಚಿತ್ರೀಕರಣ ಮುಗಿಸಿ, ಅಷ್ಟೇ ಬೇಗ ಚಿತ್ರ ಬಿಡುಗಡೆ ಮಾಡಲಿದ್ದಾರೆನ್ನಲಾಗಿದೆ.
ಇದು ಶಂಕರೇಗೌಡ ನಿರ್ಮಾಣದ “ಕೆಂಪೇಗೌಡ-2′ ಸುದ್ದಿಯಾದರೆ, “ಹೆಬ್ಬುಲಿ’ ಬಿಡುಗಡೆಯಾದ ಬೆನ್ನಲ್ಲೇ ಆ ಚಿತ್ರದ ನಿರ್ಮಾಪಕರಲ್ಲೊಬ್ಬರಾದ ಉಮಾಪತಿ “ಕೆಂಪೇಗೌಡ-2′ ಸಿನಿಮಾ ಮಾಡುತ್ತಾರೆಂಬ ಸುದ್ದಿಯಾಗಿತ್ತು. ಅದಕ್ಕೆ ಸರಿಯಾಗಿ ಅವರು ತಮ್ಮ ಟ್ವೀಟರ್‌ನಲ್ಲಿ ಅಭಿಮಾನಿ ಮಾಡಿದ “ಕೆಂಪೇಗೌಡ-2′ ಪೋಸ್ಟರ್‌ ಶೇರ್‌ ಮಾಡಿದ್ದಾರೆ.
ಹಾಗಾದರೆ ಎರಡೆರಡು “ಕೆಂಪೇಗೌಡ-2′ ಬರಲು ಸಾಧ್ಯನಾ ಎಂಬ ಪ್ರಶ್ನೆ, ಗೊಂದಲ ಹುಟ್ಟುತ್ತದೆ. ಆ ಎಲ್ಲಾ ಪ್ರಶ್ನೆ, ಗೊಂದಲಗಳಿಗೆ ಸದ್ಯದಲ್ಲೇ ತೆರೆಬೀಳಲಿದೆ. ಇದರ ಜೊತೆಗೆ ಎಲ್ಲರನ್ನು ಕಾಡುವ ಪ್ರಶ್ನೆ “ಕೆಂಪೇಗೌಡ-2’ನಲ್ಲಿ ಈ ಬಾರಿ ಯಾರು ಘರ್ಜಿಸುತ್ತಾರೆಂಬುದು. ಕೆಲವೇ ದಿನಗಳಲ್ಲಿ ಅದಕ್ಕೂ ಉತ್ತರ ಸಿಗಲಿದೆ.
