Kasaragod: ಸ್ಥಳ ನೀಡಿದರೆ ಕೇರಳದಲ್ಲಿ ಅಣು ಶಕ್ತಿ ನಿಲಯ: ಕೇಂದ್ರ ಸಚಿವ ಖಟ್ಟರ್‌

ಕಾಸರಗೋಡು: ಅಗತ್ಯವಾಗಿರುವ 150 ಎಕ್ರೆ ಸ್ಥಳ ನೀಡಿದರೆ ಕೇರಳದಲ್ಲಿ ಅಣು ವಿದ್ಯುತ್‌ ನಿಲಯ ಮಂಜೂರು ಮಾಡುವುದಾಗಿ ಕೇಂದ್ರ ಇಂಧನ ಸಚಿವ ಮನೋಹರ್‌ ಲಾಲ್‌ ಖಟ್ಟರ್‌ ಹೇಳಿದ್ದಾರೆ. ರಾಜ್ಯದ ವಿದ್ಯುತ್‌ ನಗರ ಅಭಿವೃದ್ಧಿ ಚಟುವಟಕೆಯನ್ನು ಅವಲೋಕಿಸಲು ತಲುಪಿದ ಸಚಿವರು ಈ ವಿಷಯವನ್ನು ಸ್ಪಷ್ಟಪಡಿಸಿದರು. ಕಾಸರಗೋಡಿನಲ್ಲಿ ಚೀಮೇನಿ ಇದಕ್ಕೆ ಸೂಕ್ತ ಸ್ಥಳವೆಂದು ಸಚಿವರು ಹೇಳಿದರು.

ಆದರೆ ಈ ವಿಷಯದಲ್ಲಿ ರಾಜ್ಯ ಸರಕಾರ ತನ್ನ ಅಭಿಪ್ರಾಯವನ್ನು ವ್ಯಕ್ತಪಡಿಸಿಲ್ಲ. ಸೂಕ್ತವಾದ ಸ್ಥಳವನ್ನು ಗುರುತಿಸುವುದು ರಾಜ್ಯ ಸರಕಾರದ ಕೆಲಸ. ಕೇರಳದ ಕರಾವಳಿಯಲ್ಲಿ ಥೋರಿಯಂ ಅಡಕವಾಗಿರುವ ಮೊನೋಸೈಟಿಸ್‌ನ ದೊಡ್ಡ ಗಣಿ ಇದೆಯೆಂದು ಸಚಿವರು ಹೇಳಿದರು. ರಾಜ್ಯದಲ್ಲಿ ಥೋರಿಯಂ ಆಧಾರಿತ ಅಣು ವಿದ್ಯುತ್‌ ನಿಲಯ ಸ್ಥಾಪಿಸಲು ಸಾಧ್ಯವಿದೆ.