ಇಂದಿನಿಂದ ಕೆಪಿಎಲ್‌ ಮೈಸೂರು ಚರಣ ಆರಂಭ

ಮೈಸೂರು: ಕರ್ನಾಟಕ ಪ್ರೀಮಿಯರ್‌ ಲೀಗ್‌ (ಕೆಪಿಎಲ್‌) ಟಿ20 ಕ್ರಿಕೆಟ್‌ ಮೈಸೂರು ಚರಣ ಸೋಮವಾರದಿಂದ ಆರಂಭವಾಗಲಿದೆ. ಶ್ರೀಕಂಠದತ್ತ ನರಸಿಂಹರಾಜ್‌ ಒಡೆಯರ್‌ ಕ್ರೀಡಾಂಗಣದಲ್ಲಿ ನಡೆಯಲಿರುವ ಪಂದ್ಯಗಳಿಗೆ ಮೈಸೂರು ರಾಜ ಮನೆತನದ ಮಹಾರಾಣಿ ಪ್ರಮೋದಾ ದೇವಿ ಚಾಲನೆ ನೀಡಲಿದ್ದಾರೆ.

ಉದ್ಘಾಟನಾ ಪಂದ್ಯದಲ್ಲಿ ಆತಿಥೇಯ ಮೈಸೂರು ವಾರಿಯರ್ಸ್ ತಂಡ ಬಿಜಾಪುರ ಬುಲ್ಸ್‌ ತಂಡವನ್ನು ಎದುರಿಸಲಿದೆ. ಈ ಕುರಿತಂತೆ ರವಿವಾರವೇ ಸಾಂಸ್ಕೃತಿಕ ನಗರಿಯಲ್ಲಿ ಪತ್ರಿಕಾಗೋಷ್ಠಿ ಹಮ್ಮಿಕೊಳ್ಳಲಾಗಿತ್ತು. ಕರ್ನಾಟಕದ ಕ್ರಿಕೆಟ್‌ ದಂತಕಥೆ ಜಿ.ಆರ್‌.ವಿಶ್ವನಾಥ್‌ ಕೂಟದ ಬಗ್ಗೆ ತಮ್ಮ ಅನಿಸಿಕೆ ಹಂಚಿಕೊಂಡರು. ಇದೇ ವೇಳೆ ಕೆಪಿಎಲ್‌ 8 ತಂಡಗಳ ನಾಯಕರು ಹಾಜರಿದ್ದರು. ಈ ವೇಳೆ ಗರಿಷ್ಠ ರನ್‌ ಸಾಧಕನಿಗೆ ನೀಡುವ ಆರೆಂಜ್‌ ಕ್ಯಾಪ್‌. ಗರಿಷ್ಠ ವಿಕೆಟ್‌ ಪಡೆದ ಆಟಗಾರನಿಗೆ ನೀಡುವ ಪರ್ಪಲ್‌ ಕ್ಯಾಪ್‌ ಅನ್ನು ವಿಶ್ವನಾಥ್‌ ಅನಾವರಣ ಮಾಡಿದರು.

ಕರ್ನಾಟಕ ಕ್ರಿಕೆಟ್‌ ಸಂಸ್ಥೆ ಮಾಧ್ಯಮ ವಕ್ತಾರ ವಿನಯ್‌ ಮೃತ್ಯುಂಜಯ ಮಾತನಾಡಿದರು. ಮೈಸೂರು ಕೆಪಿಎಲ್‌ ಕ್ರಿಕೆಟ್‌ಗೆ ಅಪಾರ ಅಭಿಮಾನಿ ಬಳಗವನ್ನು ಹೊಂದಿದೆ. ಹೀಗಾಗಿ ಇಲ್ಲಿ ಕೂಟವನ್ನು ಆಯೋಜಿಸುವುದಕ್ಕೆ ಮುಂದೆ ಬಂದೆವು. ಇಲ್ಲಿ ಮತ್ತಷ್ಟು ಹೆಚ್ಚಿನ ಜನಪ್ರಿಯತೆಯನ್ನು ನಾವುಗಳಿಸಿಕೊಳ್ಳಲಿದ್ದೇವೆ ಎನ್ನುವ ವಿಶ್ವಾಸವಿದೆ ಎಂದು ತಿಳಿಸಿದರು.