Junior World Cup ಹಾಕಿ: ಜರ್ಮನಿಗೆ ಶರಣಾದ ಭಾರತ

ಸ್ಯಾಂಟಿಯಾಗೊ (ಚಿಲಿ): ವನಿತಾ ಜೂನಿಯರ್‌ ವಿಶ್ವಕಪ್‌ ಹಾಕಿ ಕೂಟದ ದ್ವಿತೀಯ ಪಂದ್ಯದಲ್ಲಿ ಭಾರತ ದಿಟ್ಟ ಹೋರಾಟ ನೀಡಿಯೂ ಜರ್ಮನಿಗೆ ಶರಣಾಯಿತು. ಅಂತರ 3-4.

ಭಾರತ ಆರಂಭದಿಂದಲೇ ಜಬರ್ದಸ್ತ್ ಆಟವಾಡಿ ಜರ್ಮನಿ ಮೇಲೆರಗಿತು. ಅನು (11ನೇ ನಿಮಿಷ), ರೂಪ್ನಿ ಕುಮಾರಿ (14ನೇ ನಿಮಿಷ), ಮುಮ್ತಾಜ್‌ ಖಾನ್‌ (24ನೇ ನಿಮಿಷ) ಸೇರಿಕೊಂಡು ಮೊದಲೆರಡು ಕ್ವಾರ್ಟರ್‌ಗಳಲ್ಲೇ ಗೋಲು ಸಿಡಿಸಿದರು. ಇದೇ ಅವಧಿಯಲ್ಲಿ ಜರ್ಮನಿ ಕೂಡ 2 ಗೋಲು ಬಾರಿಸಿತು. ಸೋಫಿಯಾ ಶ್ವೇಬ್‌ (17ನೇ ನಿಮಿಷ) ಮತ್ತು ಲಾರಾ ಪುÉತ್‌ (21ನೇ ನಿಮಿಷ) ಭಾರತದ ಮುನ್ನಡೆಯ ಅಂತರವನ್ನು ಕಡಿಮೆ ಮಾಡಿದರು. ಅರ್ಧ ಹಾದಿ ಕ್ರಮಿಸುವ ವೇಳೆ ಭಾರತ 3-2ರ ಮುನ್ನಡೆಯಲ್ಲಿತ್ತು.

ಇಲ್ಲಿಂದ ಮುಂದೆ ಭಾರತೀಯರ ಆಟ ನಡೆಯಲಿಲ್ಲ. 3ನೇ ಕ್ವಾರ್ಟರ್‌ನಲ್ಲಿ ಮತ್ತೆರಡು ಗೋಲು ಸಿಡಿಸುವ ಮೂಲಕ ಜರ್ಮನಿ ಮುನ್ನುಗ್ಗಿತು. 36ನೇ ನಿಮಿಷದಲ್ಲಿ ಮತ್ತೆ ಲಾರಾ ಪುÉತ್‌ ಗೋಲು ಹೊಡೆದು ಪಂದ್ಯವನ್ನು ಸಮಬಲಕ್ಕೆ ತಂದರೆ, ಎರಡೇ ನಿಮಿಷದಲ್ಲಿ ಕ್ಯಾರೋಲಿನ್‌ ಸೀಡೆಲ್‌ 4ನೇ ಗೋಲು ಹೊಡೆದರು. ಕೊನೆಯ ತನಕ ಈ ಅಂತರವೇ ಖಾಯಂ ಆಯಿತು. ಜರ್ಮನಿ ಡಿಫೆನ್ಸ್‌ ವಿಭಾಗದಲ್ಲಿ ಬಲವಾದ ಹಿಡಿತ ಸಾಧಿಸಿತು.

ಭಾರತ ಮೊದಲ ಪಂದ್ಯದಲ್ಲಿ ಕೆನಡಾವನ್ನು 12-0 ಭರ್ಜರಿ ಅಂತರದಿಂದ ಮಣಿಸಿತ್ತು. ಶನಿವಾರ ಬೆಲ್ಜಿಯಂ ವಿರುದ್ಧ ಸೆಣಸಲಿದೆ. ನಾಕೌಟ್‌ ಪ್ರವೇಶದ ಹಿನ್ನೆಲೆಯಲ್ಲಿ ಭಾರತಕ್ಕೆ ಇಲ್ಲಿ ಗೆಲುವು ಅನಿವಾರ್ಯ.