ದನ ಕೊಂದನೆಂದು ಶಂಕಿಸಿ ಬಡಿದರು

ಗಿರಿಧ್‌/ಚಂಡೀಗಡ: ಹರಿಯಾಣದಲ್ಲಿ ರೈಲಿನಲ್ಲಿ ಗುಂಪೊಂದು ಮುಸ್ಲಿಂ ಸಮುದಾಯದ ಯುವಕನನ್ನು ಥಳಿಸಿ ಕೊಂದಿರುವ ಘಟನೆ ಆಕ್ರೋಶಕ್ಕೆ ಕಾರಣವಾಗಿರುವಂತೆಯೇ ಜಾರ್ಖಂಡ್‌ನ‌ ಗಿರಿಧ್‌ನ ಬರಿಯಾಬಾದ್‌ನಲ್ಲಿ ವ್ಯಕ್ತಿಯ ಮೇಲೆ ಮನಬಂದಂತೆ ಥಳಿಸಲಾಗಿದೆ ಮತ್ತು ಆತನ ಮನೆಗೆ ಬೆಂಕಿ ಹಚ್ಚಲಾಗಿದೆ. 

ಮಂಗಳವಾರ ಆ ವ್ಯಕ್ತಿಯ ಮನೆಯ ಮುಂಭಾಗದಲ್ಲಿ ತಲೆ ಇರದ ದನದ ಮೃತದ ಕಂಡುಬಂದಿರುವುದು ಗುಂಪಿಗೆ ಸಿಟ್ಟು ತರಿಸಿತು. ಆತನೇ ಗೋ ಹತ್ಯೆ ಮಾಡಿದ್ದಾನೆಂದು ಶಂಕಿಸಿ 100ಕ್ಕೂ ಅಧಿಕ ಮಂದಿ ಮನೆಗೆ ನುಗ್ಗಿ ಆತನಿಗೆ ಥಳಿಸಿತು. ಮಾತ್ರವಲ್ಲದೆ ಆತನ ಮನೆಗೆ ಬೆಂಕಿ ಹಚ್ಚಿದೆ.ಕೂಡಲೇ ಸ್ಥಳಕ್ಕೆ ಧಾವಿಸಿದ ಪೊಲೀಸರು ಆತನನ್ನು ಧನ್‌ಬಾದ್‌ನ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆತ ಗಂಭೀರವಾಗಿ ಗಾಯಗೊಂಡಿದ್ದಾನೆ. ಆತ ಅಪಾಯದಿಂದ ಪಾರಾಗಿದ್ದಾನೆ ಎಂದು ವೈದ್ಯರು ತಿಳಿಸಿದ್ದಾರೆ.

ನಾಲ್ವರ ಬಂಧನ: ಇದೇ ವೇಳೆ ಮಥುರಾಕ್ಕೆ ತೆರಳುತ್ತಿದ್ದ ರೈಲಿನಲ್ಲಿ ಯುವಕನನ್ನು ಥಳಿಸಿ ಹತ್ಯೆ ಮಾಡಿದ ಘಟನೆಗೆ ಸಂಬಂಧಿಸಿದಂತೆ ಹರ್ಯಾಣ ಪೊಲೀಸರು ಇನ್ನೂ ನಾಲ್ವರನ್ನು ಬಂಧಿಸಿದ್ದಾರೆ. ಅಸುನೀಗಿದ ಯುವಕ ಹರ್ಯಾಣದ ಬಲ್ಲಾಭಗ್ರಾ ಗ್ರಾಮದಿಂದ ದಿಲ್ಲಿಗೆ ಸ್ನೇಹಿತರ ಜತೆ ಪ್ರಯಾಣಿಸುತ್ತಿದ್ದ. ಈ ಸಂದರ್ಭದಲ್ಲಿ ಗುಂಪೊಂದು ಆತ ಗೋಮಾಂಸ ಸಾಗಿಸುತ್ತಿದ್ದಾನೆಂದು ತಿಳಿದು ದಾಳಿ ನಡೆಸಿ ಥಳಿಸಿತ್ತು.

ಬೆಂಗಳೂರು ಸೇರಿ ವಿಶ್ವಾದ್ಯಂತ ಪ್ರತಿಭಟನೆ: ಈ ಘಟನೆ ಖಂಡಿಸಿ ಬೆಂಗಳೂರು, ಹೈದರಾಬಾದ್‌ ಸೇರಿದಂತೆ ದೇಶದ ಹಲವು ಭಾಗಗಳು, ಕೆನಡಾ, ಪಾಕಿಸ್ಥಾನ, ಅಮೆರಿಕ ಗಳಲ್ಲಿಯೂ ಪ್ರತಿಭಟನೆ ನಡೆಸಲಾಯಿತು.