ಮುಂಬೈ: ಇಂಗ್ಲೆಂಡ್ ವಿರುದ್ದದ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ನೀಡಿ ತಂಡದ ಗೆಲುವಿಗೆ ಕಾರಣವಾಗಿದ್ದ ವೇಗಿ ಜಸ್ಪ್ರೀತ್ ಬುಮ್ರಾ ಅವರನ್ನು ಮುಂದಿನ ಪಂದ್ಯದಲ್ಲಿ ಕಣಕ್ಕಿಳಿಸದೇ ಇರಲು ತಂಡದ ಮ್ಯಾನೇಜ್ ಮೆಂಟ್ ಚಿಂತಿಸುತ್ತಿದೆ. ವಿಶಾಖಪಟ್ಟಣ ಪಂದ್ಯದಲ್ಲಿ 9 ವಿಕೆಟ್ ಕಿತ್ತಿದ್ದ ಬುಮ್ರಾ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದಿದ್ದರು.
ಕೋಚ್ ರಾಹುಲ್ ದ್ರಾವಿಡ್ ಮತ್ತು ನಾಯಕ ರೋಹಿತ್ ಶರ್ಮಾ ಅವರು ಮುಂದಿನ ರಾಜ್ ಕೋಟ್ ಟೆಸ್ಟ್ ಪಂದ್ಯಕ್ಕೆ ಬುಮ್ರಾಗೆ ವಿಶ್ರಾಂತಿ ನೀಡಲು ಬಯಸಿದ್ದಾರೆ ಎಂದು ವರದಿಯಾಗಿದೆ.
ಐಪಿಎಲ್‌ ಗೆ ಅವರ ಫಿಟ್‌ನೆಸ್ ಮತ್ತು ವರ್ಷದ ನಂತರ ಟಿ20 ವಿಶ್ವಕಪ್ ನಲ್ಲಿ ಭಾರತದ ಅಭಿಯಾನದಲ್ಲಿ ಅವರು ಪ್ರಮುಖ ಪಾತ್ರ ವಹಿಸುವ ಕಾರಣ ಈ ನಿರ್ಧಾರ ಮಾಡಲಾಗಿದೆ ಎನ್ನಲಾಗಿದೆ.
ಆಯ್ಕೆಗಾರರ ಯೋಜನೆಗಳ ಪ್ರಕಾರ ಎರಡನೇ ಟೆಸ್ಟ್‌ಗೆ ವಿರಾಮ ಪಡೆದಿರುವ ಮೊಹಮ್ಮದ್ ಸಿರಾಜ್ ಪುನರಾಗಮನ ಮಾಡುವ ಸಾಧ್ಯತೆಯಿದೆ. ಸರಣಿಯ ಅಂತಿಮ ಎರಡು ಟೆಸ್ಟ್‌ಗಳಿಗೆ ಬುಮ್ರಾ ಮತ್ತೆ ತಂಡ ಸೇರಲಿದ್ದಾರೆ. ರಾಜ್ ಕೋಟ್ ಪಂದ್ಯದಲ್ಲಿ ಸಿರಾಜ್ ಬೌಲಿಂಗ್ ದಾಳಿಯ ಜವಾಬ್ದಾರಿಯನ್ನು ವಹಿಸಿಕೊಳ್ಳುತ್ತಾರೆ. ಅಧಿಕೃತ ತಂಡದ ಆಯ್ಕೆ ಮಂಗಳವಾರ ಖಚಿತವಾಗುವ ನಿರೀಕ್ಷೆಯಿದೆ.
ಕೆಲಸದ ಹೊರೆಯ ಕಾರ್ಯತಂತ್ರದ ನಿರ್ವಹಣೆಯು ಇಬ್ಬರು ವೇಗದ ಬೌಲರ್‌ ಗಳಿಗೆ ನಿರ್ಣಾಯಕವಾಗಿದೆ. ಇನ್ನೊಬ್ಬ ಮ್ಯಾಚ್-ವಿನ್ನರ್ ಮೊಹಮ್ಮದ್ ಶಮಿ ಇನ್ನೂ ಅಂತಾರಾಷ್ಟ್ರೀಯ ಪುನರಾಗಮನಕ್ಕೆ ಸಿದ್ಧವಾಗಿಲ್ಲ. ಕ್ರಿಕ್‌ಬಝ್‌ನ ಇತ್ತೀಚಿನ ವರದಿ ಪ್ರಕಾರ ಶಮಿಯನ್ನು ಪಾದದ ಚಿಕಿತ್ಸೆಗಾಗಿ ಲಂಡನ್‌ ಗೆ ಕಳುಹಿಸಲಾಗಿದೆ. ಅವರ ಚೇತರಿಕೆಯ ಅವಧಿಯು ಆರಂಭದಲ್ಲಿ ನಿರೀಕ್ಷಿಸಿದ್ದಕ್ಕಿಂತ ಹೆಚ್ಚಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.
