ಜ.22: ಮುಕ್ತ ನ್ಯಾಯಾಲಯದಲ್ಲಿ ಶಬರಿಮಲೆ ತೀರ್ಪು ಪುನರ್‌ ವಿಮರ್ಶೆ

ಹೊಸದಿಲ್ಲಿ : ಎಲ್ಲ ವಯೋವರ್ಗದ ಮಹಿಳೆಯರು ಕೇರಳದ ಪ್ರಸಿದ್ಧ ಶಬರಿಮಲೆ ದೇವಸ್ಥಾನವನ್ನು ಪ್ರವೇಶಿಸಬಹುದಾಗಿದೆ ಎಂದು ತಾನು ನೀಡಿದ್ದ ತೀರ್ಪಿನ ಮರು ವಿಮರ್ಶೆ ಕೋರಿ ಸಲ್ಲಿಸಲಾಗಿರುವ ಎಲ್ಲ  ಅರ್ಜಿಗಳ ವಿಚಾರಣೆಯನ್ನು ಜನವರಿ 22ರಂದು ಮುಕ್ತ ನ್ಯಾಯಾಲಯದಲ್ಲಿ ಕೈಗೊಳ್ಳಲಾಗುವುದು ಎಂದು ಸುಪ್ರೀಂ ಕೋರ್ಟ್‌ ಇಂದು ಹೊರಡಿಸಿರುವ ತನ್ನ ಆದೇಶದಲ್ಲಿ ಹೇಳಿದೆ.

ಹಾಗಿದ್ದರೂ ತಾನು ಕೊಟ್ಟಿರುವ ತೀರ್ಪಿಗೆ ಯಾವುದೇ ತಡೆಯಾಜ್ಞೆಯನ್ನು ನೀಡೆನೆಂದು ಸುಪ್ರೀಂ ಕೋರ್ಟ್‌ ಹೇಳಿದೆ. ಅರ್ಥಾತ್‌ ಶಬರಿಮಲೆ ದೇವಳವನ್ನು ಎಲ್ಲ ವಯೋವರ್ಗದ ಮಹಿಳೆಯರು ಈಗಲೂ ಪ್ರವೇಶಿಸಬಹುದಾಗಿದೆ !

ಶಬರಿಮಲೆ ದೇವಳ ಪ್ರವೇಶಕ್ಕೆ ಸಂಬಂಧಿಸಿದ ತೀರ್ಪಿನ ಪುನರ್‌ ವಿಮರ್ಶೆ ಕೋರಿ ಸಲ್ಲಿಸಲಾಗಿರುವ ಸುಮಾರು 48 ಅರ್ಜಿಗಳ ವಿಚಾರಣೆಯನ್ನು  ಸುಪ್ರೀಂ ಕೋರ್ಟಿನ ವರಿಷ್ಠ ನ್ಯಾಯಮೂರ್ತಿ ರಂಜನ್‌ ಗೊಗೋಯ್‌ ಮತ್ತು ಜಸ್ಟಿಸ್‌ಗಳಾದ ಆರ್‌ ಎಫ್ ನಾರಿಮನ್‌, ಎ ಎಂ ಖಾನ್‌ವಿಲ್ಕರ್‌, ಡಿವೈ ಚಂದ್ರಚೂಡ್‌ ಮತ್ತು ಇಂದೂ ಮಲ್ಹೋತ್ರ ಅವರನ್ನು ಒಳಗೊಂಡ ಪೀಠವು ಸೋಮವಾರ ಕೈಗೆತ್ತಿಕೊಂಡಿತ್ತು. 

ಕೇರಳದ ಶಬರಿಮಲೆ ದೇವಳವನ್ನು ಎಲ್ಲ ವಯೋವರ್ಗದ ಮಹಿಳೆಯರು ಪ್ರವೇಶಿಸಬಹುದಾಗಿದೆ ಎಂದು ಆಗಿನ ವರಿಷ್ಠ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ ನೇತೃತ್ವದ ಐವರು ನ್ಯಾಯಮೂರ್ತಿಗಳನ್ನು ಒಳಗೊಂಡ ಸಂವಿದಾನ ಪೀಠ 4:1 ಅಂತರದಲ್ಲಿ  ಕಳೆದ ಸೆ.28ರಂದು ಐತಿಹಾಸಿಕ ತೀರ್ಪು ನೀಡಿತ್ತು.