ಬೆನಕಟ್ಟಿ: ಹಚ್ಚ ಹಸರಿನ ತಪ್ಪಲಿನ ಗುಡ್ಡದ ಪ್ರದೇಶದ ಮಧ್ಯೆ ಉದ್ಭವಗೊಂಡಿರುವ ಉತ್ತರ ಕರ್ನಾಟಕ ಬಹುಸಂಖ್ಯಾತ ಭಕ್ತರ ಆರಾಧ್ಯ ದೇವನಾಗಿರುವ ಜಾಲಿಕಟ್ಟಿ- ಜೀವಾಪೂರ ಗ್ರಾಮದ ಶ್ರೀ ಬಸವೇಶ್ವರ ಜಾತ್ರೆ ಆ.21ರಂದು ಆರಂಭಗೊಂಡು ಆ.25ರಂದು ಮಂಗಲಗೊಳ್ಳಲಿದೆ.
ಋಷಿ-ಮುನಿಗಳ ತಪೋವನ, ಸುತ್ತಲೂ ಹಸಿರು ಕಾನನ, ದೇವಸ್ಥಾನ ಹತ್ತಿರ ಕೊಳ್ಳವಿದೆ. ದೇವಸ್ಥಾನದಲ್ಲಿ ಕಪ್ಪು ಕಲ್ಲಿನ ಸುಂದರ ಕೆತ್ತನೆಯುಳ್ಳ ನಂದಿ ವಿಗ್ರಹವಿದೆ. ಇದೇ ಶ್ರೀ ಬಸವೇಶ್ವರ. ಶ್ರೀ ಬಸವೇಶ್ವರ ಮುಂಭಾಗದಲ್ಲಿ ಶ್ರೀ ವೀರಭದ್ರೇಶ್ವರ, ಶಿವಪಾರ್ವತಿ, ನೀಲಾಂಬಿಕಾ ನವಗ್ರಹ ದೇಗುಲಗಳೂ ಇವೆ. ಬೆಟ್ಟದಲ್ಲಿ 117 ಮೆಟ್ಟಿಲಗಳನ್ನೇರಿ ಬಂದರೆ ಕೂಗುವ ಬಸವಣ್ಣ ಎಂಬ ಪುಟ್ಟ ದೇವಾಲಯವಿದೆ. ಗ್ರಾಮದಲ್ಲಿ ಎಲ್ಲ ದೇವಾಲಯವನ್ನು ಹೊಂದಿದ್ದರಿಂದ ಜಾಲಿಕಟ್ಟಿ ಗ್ರಾಮವು ದೇವ ಮಂದಿರ ಗ್ರಾಮವಾಗಿದೆ.
ಇತಿಹಾಸ: 12ನೇ ಶತಮಾನದಲ್ಲಿ ಶರಣರ ವಧೆಯಾಯಿತು. ನಂತರ ಶರಣರು ಕಲ್ಯಾಣ ತೊರೆದು ರಾಜ್ಯದ ಪಶ್ಚಿಮ ಕರಾವಳಿಯ ಮೂಲೆ ಮೂಲೆಗಳಲ್ಲಿ ಸಂಚರಿಸಿದರು. ಶರಣರು ಗೊಡಚಿ, ಕಟಕೋಳ, ಚುಂಚನೂರ, ಬೆನಕಟ್ಟಿ ಮಾರ್ಗವಾಗಿ ಜಾಲಿಕಟ್ಟಿಗೆ ಆಗಮಿಸಿ ಅಲ್ಲಿನ ಬೆಟ್ಟದ ಪ್ರದೇಶದಲ್ಲಿ ತಂಗಿದರು. ಅಲ್ಲಿ ಶರಣ ಮಾಚಿದೇವ(ಮಾಚಯ್ಯ)ನ ಅನುಚರಣರೆಲ್ಲ ಕೆಲ ಕಾಲ ಜಾಲಿಗಿಡದ ಬುಡದಲ್ಲಿ ತಂಗಿ ಪೂಜೆ ಮಾಡಿದರು ಅದಕ್ಕಾಗಿ ಜಾಲಿಕಟ್ಟಿ ಎಂಬ ನಾಮಕರಣವಾಯಿತೆಂದು ಪ್ರತೀತಿಯಿದೆ.
ಕಾರ್ಯಕ್ರಮಗಳು
ಆ.21ರಂದು ಶ್ರೀ ಬಸವೇಶ್ವರ ರಥೋತ್ಸವಕ್ಕೆ ಕಳಸ ಇಡಲಾಗುವುದು, ರಾತ್ರಿ ಭಜನಾ ಮಂಡಳದವರಿಂದ ಭಜನಾ ಜಾಗರಣೆ ಜರುಗಲಿದೆ. ಆ.22ರಂದು ಬೆಳಗ್ಗೆ 6 ಗಂಟೆಗೆ ಶ್ರೀ ಬಸವೇಶ್ವರ, ಈಶ್ವರ ದೇವರುಗಳಿಗೆ ರುದ್ರಾಭಿಷೇಕ, ಬಿಲ್ವಾರ್ಚನೆ ಜರುಗಲಿದೆ. ಮದ್ಲೂರ ಗ್ರಾಮದ ಕುರಿಯವರ ಮನೆತನದಿಂದ ನೈವೇದ್ಯ ಆಗಮಿಸುವುದು. ಸಂಜೆ 4 ಗಂಟೆಗೆ ಮಲ್ಲಪಾಪೂರ ಗಾಳೇಶ್ವರ ಮಠದ ಶ್ರೀ ಚಿದಾನಂದ ಅವಧೂತ ಅಜ್ಜನವರ ನೇತೃತ್ವದಲ್ಲಿ ರಥೋತ್ಸವಕ್ಕೆ ಪೂಜೆ ಸಲ್ಲಿಸಲಾಗುವುದು. ಜಾಲಿಕಟ್ಟಿ, ಜೀವಾಪೂರ, ತಲ್ಲೂರ ದೇಸಾರ ವಾಡೆಯಿಂದ ವಿವಿಧ ವಾದ್ಯ ಮೇಳದೊಂದಿಗೆ ಆರತಿಗಳು ಗ್ರಾಮಕ್ಕೆ ಆಗಮಿಸುವವು. ಶ್ರೀ ಬಸವೇಶ್ವರನ ಪಲ್ಲಕಿ, ನಂದಿಕೋಲ ಉತ್ಸವ, ನಂತರ ಸಂಜೆ 5 ಗಂಟೆಗೆ ಶ್ರೀ ಬಸವೇಶ್ವರನ ರಥೋತ್ಸವ ಜರುಗಲಿದೆ. ಆ.23ರಂದು ಬಯಲು ಜಾತ್ರೆ ವಿಜೃಂಭಣೆಯಿಂದ ಜರುಗಲಿದೆ. ಅದೇ ದಿನ ರಾತ್ರಿ 10 ಗಂಟೆಗೆ ಶ್ರೀ ಕೂಗು ಬಸವೇಶ್ವರ ಪವರ್‌ ಸ್ಟಾರ್‌ ನಾಟ್ಯ ಸಂಘ ಹಾಗೂ ಗೆಳೆಯರ ಬಳಗದವರಿಂದ “ವಿಷದ ಹುತ್ತಕ್ಕೆ ಹಾಲೆರೆದ ಮುತ್ತೈದೆ’ ಸಾಮಾಜಿಕ ನಾಟಕ ಪ್ರದರ್ಶನಗೊಳ್ಳಲಿದೆ.
ಆ.25ರಂದು ಸಂಜೆ 5 ಗಂಟೆಗೆ ಶ್ರೀ ಬಸವೇಶ್ವರ ರಥೋತ್ಸವ ಕಳಸ ಇಳಿಸುವುದರೊಂದಿಗೆ ಜಾತ್ರೆ ಮಂಗಲಗೊಳ್ಳಲಿದೆ ಎಂದು ಶ್ರೀ ಬಸವೇಶ್ವರ ದೇವಸ್ಥಾನದ ಟ್ರಸ್ಟ್‌ ಕಮಿಟಿ ಅಧ್ಯಕ್ಷರು, ಉಪಾಧ್ಯಕ್ಷರು, ನಿರ್ದೇಶಕರು ಹಾಗೂ ಜಾಲಿಕಟ್ಟಿ-ಜೀವಾಪೂರ ಗ್ರಾಮಸ್ಥರು ತಿಳಿಸಿದ್ದಾರೆ.
–
ಮಹಾಂತೇಶ ಗಿಲಾಕಿ
