ಜಲ ಅಭಿಯಾನಕ್ಕೆ ಪ್ರಧಾನಿ ಇಂದು ಚಾಲನೆ 

ಹೊಸದಿಲ್ಲಿ: “ಜಲ ಶಕ್ತಿ ಅಭಿಯಾನ: ಕ್ಯಾಚ್‌ ದ ರೈನ್‌’ ಅಭಿಯಾನವನ್ನು  ಸೋಮವಾರ ಪ್ರಧಾನಮಂತ್ರಿ ನರೇಂದ್ರ ಮೋದಿ ಉದ್ಘಾಟಿಸಲಿ­ದ್ದಾರೆ. ಮಾ.22 ರಂದು “ವಿಶ್ವಜಲ ದಿನ’ವೂ ಆಗಿರುವುದರಿಂದ ಈ ಕಾರ್ಯ­ಕ್ರಮ ಮಹತ್ವ ಪಡೆದಿದೆ. ಇದರ ಜತೆಗೆ, ದೇಶದಲ್ಲಿ ನದಿಗಳ ಜೋಡಣೆಗೆ ಸಂಬಂಧಿಸಿ­ದಂತೆ ಉತ್ತರ ಪ್ರದೇಶ ಮತ್ತು ಮಧ್ಯಪ್ರದೇಶ ಮುಖ್ಯಮಂತ್ರಿಗಳು ಕೆನ್‌ ಬೆಟ್ವಾ ಲಿಂಕ್‌ ಯೋಜನೆ ಬಗ್ಗೆ ಒಪ್ಪಂದಕ್ಕೆ ಸಹಿ ಹಾಕಲಿದ್ದಾರೆ.

ಸೋಮವಾರದಿಂದ ನ.30ರ ವರೆಗೆ ದೇಶದ ಗ್ರಾಮೀಣ ಮತ್ತು ನಗರ, ಪಟ್ಟಣ ಪ್ರದೇಶದಲ್ಲಿ ಈ ಅಭಿಯಾನ ಹಮ್ಮಿಕೊಳ್ಳಲಾಗುತ್ತದೆ. ಅದನ್ನು ಜನರ ಆಂದೋಲನವನ್ನಾಗಿ ಮಾಡಲಾಗುತ್ತದೆ. ಈ ಮೂಲಕ ನೀರಿನ ಮಹತ್ವದ ಬಗ್ಗೆ ತಳಮಟ್ಟದ ವ್ಯಕ್ತಿಗೂ ತಲುಪಿಸುವ ರೀತಿಯಲ್ಲಿ ನಡೆಸಲಾಗುತ್ತದೆ ಎಂದು ಪ್ರಧಾನಮಂತ್ರಿಗಳ ಕಚೇರಿ ತಿಳಿಸಿದೆ.

ಕೆನ್‌ ಬೆಟ್ವಾ ಲಿಂಕ್‌ ಯೋಜನೆ :

ದೇಶಾದ್ಯಂತ ನದಿಗಳ ಜೋಡಣೆಗಾಗಿನ ಯೋಜನೆ. ಈ ಪೈಕಿ ಮೊದಲ ಯೋಜನೆ ಉತ್ತರ ಪ್ರದೇಶ ಮತ್ತು ಮಧ್ಯಪ್ರದೇಶಗಳಲ್ಲಿ ಅನುಷ್ಠಾನ. ಉ.ಪ್ರ.ದ ಕೆನ್‌ ನದಿಯಿಂದ ಮಧ್ಯ ಪ್ರದೇಶದ ಬೆಟ್ವಾ ನದಿಗೆ ನೀರನ್ನು ಈ ಒಪ್ಪಂದದ ಅನ್ವಯ ಪೂರೈಸಲಾಗುತ್ತದೆ. ಮಾಜಿ ಪ್ರಧಾನಿ ದಿ| ಅಟಲ್‌ ಬಿಹಾರಿ ವಾಜಪೇಯಿ ಅವರ ಕನಸಿನ ಯೋಜನೆಯಂತೆ ಜಾರಿ.

10.62 ಲಕ್ಷ ಹೆಕ್ಟೇರ್‌- ಇಷ್ಟು ಪ್ರದೇಶಕ್ಕೆ ನೀರಾವರಿ

103 ಮೆ.ವ್ಯಾ- ಇಷ್ಟು ಪ್ರಮಾಣದಲ್ಲಿ ವಿದ್ಯುತ್‌ ಉತ್ಪಾದನೆ

9 ಮಧ್ಯ ಪ್ರದೇಶದ ಜಿಲ್ಲೆಗಳು

4 ಉತ್ತರ ಪ್ರದೇಶದ ಜಿಲ್ಲೆಗಳು

90% ಕೇಂದ್ರದ ವಿತ್ತೀಯ ನೆರವು

18,057 ಕೋಟಿ ರೂ. ಒಟ್ಟು ವೆಚ್ಚ

ಏನು ಮಾಡಲಾಗುತ್ತದೆ? :

ಚುನಾವಣೆ  ರಾಜ್ಯಗಳನ್ನು ಬಿಟ್ಟು ಉಳಿದೆಡೆ ಗ್ರಾ.ಪಂ. ಮಟ್ಟದಲ್ಲಿ ನೀರು ಮತ್ತು ಅದರ ಸಂರಕ್ಷಣೆ ಬಗ್ಗೆ ಜಲ ಪ್ರತಿಜ್ಞೆ ಸ್ವೀಕಾರ

ಸ್ಥಳೀಯ ಮಟ್ಟದಲ್ಲಿ ನೀರಿನ ಸಂರಕ್ಷಣೆ ಬಗ್ಗೆ ಅರಿವು, ಆಯಾ ಸ್ಥಳದ ಹವಾಮಾನ ಮತ್ತು ಮಣ್ಣಿನ ಗುಣಕ್ಕೆ ಅನುಗುಣವಾಗಿ ಜಲ ಸಂರಕ್ಷಣೆಗೆ ಕ್ರಮ