ಮುಂಬಯಿ: ಬಿಗೆಸ್ಟ್‌ ಪ್ಯಾನ್‌ ಇಂಡಿಯಾ ಸಿನಿಮಾಗಳಲ್ಲಿ ಒಂದಾಗರುವ ʼಪ್ರಾಜೆಕ್ಟ್ ಕೆʼ ಸಿನಿಮಾ ತಂಡ ಭಾನುವಾರ (ಜೂ.25 ರಂದು) ಹೊಸ ಅಪ್ಡೇಟ್‌ ವೊಂದನ್ನು ನೀಡಿದೆ.
ಸುಮಾರು 500 ಕೋಟಿ ರೂ. ಬಜೆಟ್‌ ನಲ್ಲಿ ತಯರಾಗುತ್ತಿರುವ ʼಪ್ರಾಜೆಕ್ಟ್ ಕೆʼ ಸಟ್ಟೇರಿದ ದಿನದಂದಲೇ ದೊಡ್ಡ ಮಟ್ಟದಲ್ಲಿ ಸುದ್ದಿಯಾಗುತ್ತಿದೆ. ಅದಕ್ಕೆ ಒಂದು ಕಾರಣ ಸಿನಿಮಾದ ಮಲ್ಟಿ ಸ್ಟಾರ್ಸ್‌ ಗಳು. ಸಿನಿಮಾದಲ್ಲಿ ಪ್ರಭಾಸ್, ದೀಪಿಕಾ ಪಡುಕೋಣೆ ಮತ್ತು ಅಮಿತಾಬ್ ಬಚ್ಚನ್ ಅವರು ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಸಿನಿಮಾಕ್ಕೆ ಮತ್ತೊಬ್ಬ ಸೂಪರ್‌ ಸ್ಟಾರ್‌ ಎಂಟ್ರಿಯಾಗಿದ್ದಾರೆ.
ʼಪ್ರಾಜೆಕ್ಟ್ ಕೆʼಚಿತ್ರವು ಗ್ರಾಫಿಕ್ಸ್ ಮತ್ತು ವಿಎಫ್‌ಎಕ್ಸ್ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಈಗಾಗಲೇ ಸುಮಾರು ಶೇ. 70-75 ರಷ್ಟು ಸಿನಿಮಾ ಮುಗಿದಿದೆ. ದೀಪಿಕಾ ಹಾಗೂ ಬಿಗ್‌ ಬಿ ಅವರ ಪಾತ್ರದ ಕೆಲ ಸೀನ್‌ ಗಳು ಶೂಟ್‌ ಆಗಲು ಬಾಕಿಯಿದೆ.
ಈ ಹಿಂದೆ ನಟ ಕಮಲ್ ಹಾಸನ್ ಅವರು ʼಪ್ರಾಜೆಕ್ಟ್ ಕೆʼ ಸಿನಿಮಾದಲ್ಲಿ ನಟಿಸಲಿದ್ದಾರೆ. ಅದಕ್ಕಾಗಿ 150 ಕೋಟಿ ರೂ. ಸಂಭಾವನೆಯನ್ನು ಪಡೆಯಲಿದ್ದಾರೆ ಎನ್ನುವ ಸುದ್ದಿಯೊಂದು ಹಬ್ಬಿತ್ತು. ಇದು ಪ್ರಭಾಸ್ ಅವರಿಗಿಂತ ದುಪ್ಪಟ್ಟು ಸಂಭಾವನೆ ಎಂದು ವರದಿ ಆಗಿತ್ತು.
ಇದೀಗ ಗೊಂದಲಗಳಿಗೆ ತೆರೆ ಎಳೆದಿದ್ದು, ಕಮಲ್ ಹಾಸನ್ ಸಿನಿಮಾದಲ್ಲಿ ನಟಿಸುವುದು ಪಕ್ಕಾ ಆಗಿದೆ. ಈ ಬಗ್ಗೆ ಸಿನಿಮಾ ಪ್ರೂಡಕ್ಷನ್‌ ಹೌಸ್‌ ವೈಜಯಂತಿ ಮೂವೀಸ್‌ ಟೀಸರ್‌ ವೊಂದರ ಮೂಲಕ ʼನಾಯಕನ್‌ʼ ಎಂಟ್ರಿಯ ಬಗ್ಗೆ ಅಧಿಕೃತವಾಗಿ ಹೇಳಿದೆ.
‘ಪ್ರಾಜೆಕ್ಟ್ ಕೆ’ ಚಿತ್ರದಲ್ಲಿ ಕಮಲ್ ಹಾಸನ್ ಹಿಂದೆಂದೂ ಕಾಣದ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ಸಿನಿಮಾ ಎಲ್ಲವೂ ಅಂದುಕೊಂಡಂತೆ ಆದರೆ ಜನವರಿ 12, 2024 ರಂದು ತೆರೆಗೆ ಬರಲಿದೆ.
ಚಿತ್ರಕ್ಕೆ ಸಂತೋಷ್ ನಾರಾಯಣನ್ ಅವರ ಸಂಗೀತ ಸಂಯೋಜನೆ , ಜೋರ್ಡ್ಜೆ ಸ್ಟೋಜಿಲ್ಕೋವಿಕ್ ಅವರ ಛಾಯಾಗ್ರಾಹಕ ಮತ್ತು ಕೋಟಗಿರಿ ವೆಂಕಟೇಶ್ವರ ರಾವ್ ಸಂಕಲನವಿರಲಿದೆ.
