Ireland V/s Bangladesh: ಐರ್ಲೆಂಡ್‌-ಬಾಂಗ್ಲಾದೇಶ ಟೆಸ್ಟ್‌ನಲ್ಲಿ ಮುಶ್ಫಿಕರ್‌ ರಹೀಂ ಶತಕ

ಢಾಕಾ: ಮುಶ್ಫಿಕರ್‌ ರಹೀಂ ಅವರ ಶತಕ ಸಾಹಸದಿಂದ ಐರ್ಲೆಂಡ್‌ ಎದುರಿನ ಟೆಸ್ಟ್‌ ಪಂದ್ಯದ ದ್ವಿತೀಯ ದಿದನಾಟದಲ್ಲಿ ಬಾಂಗ್ಲಾದೇಶ 369 ರನ್‌ ಗಳಿಸಿ ಭಾರೀ ಹಿಡಿತ ಸಾಧಿಸಿದೆ. ಐರ್ಲೆಂಡ್‌ ಮೊದಲ ಇನ್ನಿಂಗ್ಸ್‌ನಲ್ಲಿ 214ಕ್ಕೆ ಆಲೌಟ್‌ ಆಗಿತ್ತು.

155 ರನ್‌ ಹಿನ್ನಡೆಗೆ ಸಿಲುಕಿದ ಐರ್ಲೆಂಡ್‌ ದ್ವಿತೀಯ ಇನ್ನಿಂಗ್ಸ್‌ನಲ್ಲೂ ಕುಸಿತ ಅನುಭವಿಸಿದ್ದು, 4 ವಿಕೆಟಿಗೆ 27 ರನ್‌ ಗಳಿಸಿದೆ. ಇನ್ನೂ 128 ರನ್‌ ಹಿನ್ನಡೆಯಲ್ಲಿದೆ.

ಬಾಂಗ್ಲಾ 2ಕ್ಕೆ 34 ರನ್‌ ಗಳಿಸಿದಲ್ಲಿಂದ ದಿನದಾಟ ಮುಂದುವರಿಸಿತ್ತು. ಮಧ್ಯಮ ಕ್ರಮಾಂಕದ ಬ್ಯಾಟರ್‌ ರಹೀಂ 126 ರನ್ನುಗಳ ಕೊಡುಗೆ ಸಲ್ಲಿಸಿದರು (166 ಎಸೆತ, 15 ಬೌಂಡರಿ, 1 ಸಿಕ್ಸರ್‌). ಇದು 85ನೇ ಟೆಸ್ಟ್‌ನಲ್ಲಿ ರಹೀಂ ಬಾರಿಸಿದ 10ನೇ ಶತಕ. ಮೆಹಿದಿ ಹಸನ್‌ ಮಿರಾಜ್‌ 55, ಲಿಟನ್‌ ದಾಸ್‌ 43 ರನ್‌ ಹೊಡೆದರು.