“ಮಿಣಿ ಮಿಣಿ’ಗೆ ಮಧ್ಯಂತರ ತಡೆ

ಬೆಂಗಳೂರು: ಮಾಜಿ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿಯವರ ಭಾವಚಿತ್ರ ಅಥವಾ ಅವರ ಹೆಸರಿನ ಜೊತೆಗೆ “ಮಿಣಿ ಮಿಣಿ’ ಶಬ್ದ ಬಳಸಿ ಯಾವುದೇ ಮಾಧ್ಯಮ ಗಳಲ್ಲಿ ಪ್ರಸಾರ ಹಾಗೂ ಅಪಹಾಸ್ಯ ಮಾಡದಂತೆ ನಗರ ಸಿವಿಲ್‌ ನ್ಯಾಯಾಲಯ ಮಧ್ಯಂತರ ತಡೆ ನೀಡಿದೆ.

ಈ ವಿಚಾರವಾಗಿ ಎಲ್ಲಾ ದೃಶ್ಯ, ಮುದ್ರಣ ಹಾಗೂ ಸಾಮಾಜಿಕ ಮಾಧ್ಯಮಗಳನ್ನು ಪ್ರತಿವಾದಿಗಳನ್ನಾಗಿ ಮಾಡಿ ಮಾಜಿ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಸಲ್ಲಿಸಿದ್ದ ಸಿವಿಲ್‌ ದಾವೆಯ ವಿಚಾರಣೆ ನಡೆಸಿದ ನಗರದ 20ನೇ ಕೋರ್ಟ್‌ನ ನ್ಯಾಯಾಧೀಶ ಡಿ.ಎಸ್‌. ವಿಜಯಕುಮಾರ್‌ ಶನಿವಾರ ವಿಚಾರಣೆ ನಡೆಸಿದರು.

ವಿಚಾರಣೆ ವೇಳೆ ಕುಮಾರಸ್ವಾಮಿ ಪರ ವಕೀಲ ಶೇಕ್‌ ಜಬಿವುಲ್ಲಾ ವಾದ ಮಂಡಿಸಿ, ತಮ್ಮ ಕಕ್ಷಿದಾರರ ಭಾವಚಿತ್ರ ಹಾಗೂ ಹೆಸರಿನ ಜೊತೆಗೆ ಮಿಣಿ ಮಿಣಿ ಪದ ಬಳಕೆ ಮಾಡುವ ಮೂಲಕ ಅವರ (ಕುಮಾರಸ್ವಾಮಿ) ಗೌರವಕ್ಕೆ ಧಕ್ಕೆ ತರಲಾ ಗುತ್ತಿದೆ. ಆದ್ದರಿಂದ ಅದಕ್ಕೆ ತಡೆ ನೀಡಬೇಕು ಎಂದು ಕೋರಿದರು.

ಇದನ್ನು ಮಾನ್ಯ ಮಾಡಿದ ನ್ಯಾಯಾಧೀಶರು, ಪತ್ರಿಕೆ, ಟಿ.ವಿ ಚಾನೆಲ್‌, ಸಾಮಾಜಿಕ ಜಾಲತಾಣ ಸೇರಿ ಯಾವುದೇ ಮಾಧ್ಯಮಗಳಲ್ಲಿ ಮಿಣಿ ಮಿಣಿ ಪದವನ್ನು ಕುಮಾರಸ್ವಾಮಿ ಚಿತ್ರ ಅಥವಾ ವಿಡಿಯೋದೊಂದಿಗೆ ಸೇರಿಸಿ ಪ್ರಕಟಣೆ ಅಥವಾ ಪ್ರಸಾರ ಮಾಡಬಾರದು, ವಿಡಿಯೋ ಅಪ್‌ಲೋಡ್‌ ಮಾಡಬಾರದು ಎಂದು ಆದೇಶಿಸಿದರು.