ಕೈಗಾರಿಕೆ, ವಾಣಿಜ್ಯ ಕ್ಷೇತ್ರಗಳಿಗೆ ಸಮಾನ ಪ್ರಾಮುಖ್ಯತೆ ಬೇಕು

ಬೆಂಗಳೂರು: ಕೈಗಾರಿಕೆಗಳಿಗೆ ನೀಡುವಷ್ಟೇ ಪ್ರಮುಖ್ಯತೆಯನ್ನು ವಾಣಿಜ್ಯ(ಕಾಮರ್ಸ್‌) ವಿಭಾಗಕ್ಕೂ ನೀಡಿದಾಗ ಮಾತ್ರ ಸಮತೋಲಿತ ಅಭಿವೃದ್ಧಿ ಕಾಣಲು ಸಾಧ್ಯ ಎಂದು ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯ ಅಪಾರ ಮುಖ್ಯಕಾರ್ಯದರ್ಶಿ ಡಿ.ವಿ.ಪ್ರಸಾದ್‌ ಹೇಳಿದರು.

ಮಂಗಳವಾರ ಹಮ್ಮಿಕೊಂಡಿದ್ದ “ಎಫ್ಕೆಸಿಸಿಐ ಎಕ್ಸ್‌ಪೋರ್ಟ್‌ ಎಕ್ಸಲೆನ್ಸ್‌ -2017’ರ  ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಶ್ರೇಷ್ಠ ರಫ್ತುದಾರರಿಗೆ ಪ್ರಶಸ್ತಿ ಪ್ರದಾನ ಮಾಡಿ ಮಾತನಾಡಿದ ಅವರು, “ವಾಣಿಜ್ಯವೂ ಕೈಗಾರಿಕೆಯಷ್ಟೇ ಮುಖ್ಯ ಎಂಬುದನ್ನು ತಿಳಿದುಕೊಳ್ಳಬೇಕು. ಈ ಎರಡರಲ್ಲೂ ಸಮತೋಲಿತ ಬೆಳವಣಿಗೆ ಇರಬೇಕು. ವ್ಯಾಪಾರ ವಿಭಾಗವನ್ನು ನಿರ್ಲಕ್ಷ್ಯ ಮಾಡುವುದು ಸರಿಯಲ್ಲ,’ ಎಂಬ ಸಲಹೆ ನೀಡಿದರು.

“ಕೈಗಾರಿಕೆ ಮತ್ತು ವಾಣಿಜ್ಯ ಎರಡು ಕೂಡ ಒಂದೇ ಇಲಾಖೆಯೊಳಗೆ ಬರುತ್ತದೆ. ಆದರೆ, ಬಹುತೇಕ ಕೈಗಾರಿಕೋದ್ಯಮಿಗಳು ಕೈಗಾರಿಕೆಯ ವಿಸ್ತರಣೆಗೆ ಹೆಚ್ಚಿನ ಗಮನ ಹರಿಸುತ್ತಿದ್ದಾರೆ. ವಾಣಿಜ್ಯ ವಿಭಾಗವನ್ನು ಪ್ರಮುಖವಾಗಿ ತೆಗೆದುಕೊಳ್ಳುತ್ತಿಲ್ಲ,’ ಎಂದರು.

“ಜಿಎಸ್‌ಟಿಯಲ್ಲಿ ದುಬಾರಿ ತೆರಿಗೆಯನ್ನು ಕಡಿಮೆ  ಮಾಡುವಂತೆ ಫ‌ುಡ್‌ ಇಂಡಸ್ಟ್ರಿ, ಗಾರ್ಮೆಂಟ್ಸ್‌  ಸೇರಿದಂತೆ ಹಲವು ಕೈಗಾರಿಕೆಗಳು ರಾಜ್ಯ ಸರ್ಕಾರ, ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆಯ ಗಮನೆ ಸೆಳೆದಿದ್ದವು. ಆದರೆ. ಬೃಹತ್‌ ಕೈಗಾರಿಕೆಗಳು ನಮ್ಮಲ್ಲಿಗೆ ಬಂದಿಲ್ಲ. ಕೈಗಾರಿಕೆಗಳ ಅಭಿವೃದ್ಧಿಗೆ ಇಲಾಖೆಯಿಂದ ಬೇಕಿರುವ ಎಲ್ಲ ರೀತಿಯ ಸಹಾಯ ಸಹಕಾರ ಮಾಡಲಿದ್ದೇವೆ,’ ಎಂದು ಹೇಳಿದರು.

“ಕೈಗಾರಿಕಾ ವಲಯದ ಮೂಲ ಸೌಕರ್ಯಕ್ಕೆ ಸಂಬಂಧಿಸಿದಂತೆ ಇಲಾಖೆಯಲ್ಲಿ ಬಂಡವಾಳದ ಕೊರತೆ ಇದೆ. ರಾಜ್ಯದಲ್ಲಿ 161 ಕೈಗಾರಿಕಾ ವಲಯವಿದೆ. ಅಲ್ಲಿನ ಕೈಗಾರಿಕಾ ಸಂಘಟನೆಗಳೇ ಸ್ವಯಂ ಪ್ರೇರಿತವಾಗಿ ಕೈಗಾರಿಕಾ ವಲಯದ ಅಭಿವೃದ್ಧಿ ಮಾಡುವ ಮೂಲಕ ಸರ್ಕಾರದೊಂದಿಗೆ ಸಹಕರಿಸಬೇಕು,’ ಎಂದರು.

ಎಫ್ಕೆಸಿಸಿಐ ಅಧ್ಯಕ್ಷ ಎಂ.ಸಿ.ದಿನೇಶ್‌ ಮಾತನಾಡಿ, “ರಾಜ್ಯದ ಉತ್ಪನ್ನಗಳ ರಫ್ತು ಪ್ರಮಾಣ ಇನ್ನಷ್ಟು ಹೆಚ್ಚಿಸಲು 2 ವರ್ಷದಲ್ಲಿ ಅಧ್ಯಯನವೊಂದನ್ನು ನಡೆಸಬೇಕು. ಕೈಗಾರಿಕೋದ್ಯಮಕ್ಕೆ ಪೂರಕವಾದ ವಾತಾವರಣ ಸೃಷ್ಟಿಸಬೇಕು. ಕೈಗಾರಿಕಾ ಪ್ರದೇಶದ ಮೂಲ ಸೌಕರ್ಯ ಅಭಿವೃದ್ಧಿಯ ಜತೆಗೆ ಕೈಗಾರಿಕೆಗಳು ಎದುರಿಸುತ್ತಿರುವ ಸಮಸ್ಯೆಗಳಿಗೂ ಪರಿಹಾರ ನೀಡಬೇಕು,’ ಎಂದರು.

ಬಯೊಕಾನ್‌ ಸಂಸ್ಥೆಗೆ ಬೆಸ್ಟ್‌ ಎಕ್ಸ್‌ಪೋರ್ಟ್‌ ಪ್ರಶಸ್ತಿ, ರಾಜೇಶ್‌ ಎಕ್ಸ್‌ಪೋರ್ಟ್ಸ್ ಸಂಸ್ಥೆಗೆ ಸ್ಟಾರ್‌ ಎಕ್ಸ್‌ಪೋರ್ಟ್‌ ಪ್ರಶಸ್ತಿ ಸೇರಿದಂತೆ 44 ವಿಭಾಗದಲ್ಲಿ ರಪು¤ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ಎಫ್ಕೆಸಿಸಿಐ ಕೆ.ರವಿ, ಸುಧಾಕರ್‌ ಶೆಟ್ಟಿ, ತಲ್ಲಂ ಧ್ವಾರಕನಾಥ್‌, ವಸಂತ್‌ ಬಂಗೇರಾ ಮೊದಲಾದವರು ಉಪಸ್ಥಿತರಿದ್ದರು.

ಕೈಗಾರಿಕೆಗಳು ತಮ್ಮ ಉತ್ಪನ್ನಗಳನ್ನು ರಫ್ತು ಮಾಡುವುದನ್ನು ಎಫ್ಕೆಸಿಸಿಐ ಗುರುತಿಸಿ, ಪ್ರೋತ್ಸಾಹ ನೀಡುವುದರಿಂದ ಇನ್ನಷ್ಟು ಸೇವೆಗೆ ಪ್ರೇರಣೆ ಸಿಗುತ್ತದೆ. ಗ್ರಾಹಕರಿಗೂ ಉತ್ಕೃಷ್ಟವಾದ ಸೇವೆ ನೀಡಲು ಸಾಧ್ಯವಾಗುತ್ತದೆ. ಹಾಗೆಯೇ ಗುಣಮಟ್ಟದ ಉತ್ಪನ್ನವನ್ನು ದೇಶ ಮತ್ತು ಅಂತಾರಾಷ್ಟ್ರೀಯ ಮಟ್ಟದ ಗ್ರಾಹಕರಿಗೆ ತಲುಪಿಸಲು ಉತ್ತೇಜನ ಸಿಗುತ್ತದೆ. 
-ನೀರಜ್‌ ಶೆಟ್ಟಿ, ನಿರ್ದೇಶಕ ಸೆಮಿ-ಸೆಬಿನ್ಸ್‌ ಗ್ರೂಪ್‌( ಬೆಸ್ಟ್‌ ಡಿಸ್ಟಿಕ್‌ ಎಕ್ಸ್‌ಪೋರ್ಟ್‌ ಅವರ್ಡ್‌ ಫಾರ್‌ ತುಮಕೂರು)